Dalawa ang kumpirmadong nasawi habang isa ang patuloy na pinaghahanap matapos gumuho ang isang bahagi ng isang establisyimento sa Meycauayan, Bulacan.
Ayon sa Bureau of Fire Protection Central Luzon, isa ang natagpuang buhay sa naturang insidente na naganap sa Silver Street, Muralla Industrial Park, sa Barangay Libtong.
Sa inisyal na imbestigasyon, overloading ang naging sanhi ng pagguho.
Nagpapatuloy naman ang Search, Rescue, at Retrieval Operations sa naturang lugar.
Isang sunog ang sumiklab sa isang residential area sa Sta. Mesa, Maynila.
Naganap ang sunog sa V. Mapa Street, na nag-umpisa bandang 4:30 ng madaling araw at idineklara itong fire out dakong 5:53 ng madaling araw.
Ayon sa Bureau of Fire Protection, isang lalaking edad 60-anyos ang nasawi sa insidente.
Sa pagtaya ng BFP, umabot sa P500-K ang halaga ng pinsala ng sunog.
Patuloy na inaalam ng mga otoridad ang sanhi ng sunog. —ulat mula kay Aya Yupangco (Patrol 5)
Bumuo na rin ng transition committee ang Metropolitan Manila Development Authority (MMDA) bilang paghahanda nito sa pagpasok ng administrasyon ni President-elect Ferdinand Bongbong Marcos Jr.
Ayon kay MMDA Public Affairs Director Sharon Gentalian, halos kada linggo nagpupulong ang nasabing komite.
Gayunman, wala pa aniyang impormasyon kaugnay sa magiging pagbabago sa liderato nito.
Noong Marso nang italaga ni Pangulong Rodrigo Duterte ang abogadong si Romando Artes bilang bagong Chairman ng MMDA, matapos mag-resign si Benjamin “Benhur” Abalos Jr., upang magsilbing Campaign Manager ni Marcos.
Matapos namang manalo sa May 9 elections ni BBM, inanunsyo ng kampo nito na tinanggap ni abalos ang pagiging kalihim ng Department of the Interior and Local Government.
Nasunog ang isang residential area ng 21st UP Garden sa Barangay San Vicente, Quezon City, kagabi.
Ayon sa Bureau of Fire Protection (BFP), nag-umpisa ang sunog bandang alas-9 ng gabi at dakong 9:38 ng gabi nang ideklara itong fire out.
Ayon sa mga otoridad, ang naiwang kandila ang tinitingnang sanhi ng insidente.
Wala namang napaulat na nasawi o nasugatan dahil sa sunog, ngunit tinatayang lima hanggang sampung pamilya ang naapektuhan nito.
Nananatili ngayon ang naturang mga pamilya sa isang simbahan sa UP Bliss.
Isang babae ang natagpuang patay makaraang sakalin gamit ang cord ng cellphone charger sa San Miguel, Bulacan.
Hinihinalang ginahasa rin ang biktimang si Regine Sebastian, 30 anyos, na negosyante at single mom dahil wala itong underwear at puno ng pasa ang katawan nang madiskubre sa kanyang bahay.
Suspek sa krimen ang dating boyfriend ng biktimang si alyas Popoy habang witness ang 10 taong gulang na anak ni sebastian.
Ayon kay Col. Jordan Santiago, hepe ng San Miguel Police, nadiskubre nila sa cellphone ng suspek ang pagkakasunod ng kaganapan, chat maging ang mga larawan.
Nakunan din sa CCTV ang pagpasok at paglabas ng suspek sa bahay ng biktima.
Naaresto naman ang suspek at nahaharap na sa kasong murder.
Samantala, hinihintay na ang resulta ng tests upang mabatid kung hinalay ang biktima habang inaalam na kung ninakawan din ito lalo’t nawawala ang nasa 350,000 pesos na halaga ng kanyang alahas.
Isang pulis ang patay matapos paulanan ng bala ng mga hindi nakilalang salarin sa bayan ng Matanao, Davao Del Sur.
Kinilala ang biktimang si Patrolman Hariz Jhun Adayo, 26 anyos, residente ng Poblacion Uno, Bansalan.
Ayon kay Capt. Flor Daisy Angga, acting police chief ng Matanao, patungo sana si Adayo sa bayan ng Hagonoy habang lulan ng kanyang motorsiklo nang tambangan ng riding-in-tandem sa provincial road.
Pagdating ng biktima sa Barangay New Visayas sa Matanao ay pinaputukan ito ng mga salarin.
Naisugod pa sa Davao Del Sur Provincial Hospital sa Digos City ang pulis subalit hindi na ito umabot ng buhay.
Inaalam na ng pulisya ang motibo sa pamamaslang at sino o anong grupo ang posibleng nasa likod nito.
Namemeligro na namang tumaas ang presyo ng tinapay dahil sa delay ng mga delivery ng raw materials.
Ito ang inamin ni Philippine Federation of Bakers’ Association Vice President Luisito Chavez sa gitna ng nagbabadyang global food shortage, na nagsisimula na umanong maramdaman sa bansa.
Dapat anyang pagtuunan ng pansin ng gobyerno ang pagtatanim ng agricultural crops na magagamit ng mga magtitinapay upang mapababa ang production cost at makabawi ang maliliit na negosyo.
Layunin nitong makamit ang food stability at hindi na masyadong umaasa sa mga imported na raw materials.
Una nang inihayag ng Bangko Sentral ng Pilipinas (BSP) na ang walang puknat na price increase ng oil products, pangunahing food items at paghina ng piso ang nangungunang dahilan ng pagtaas ng presyo ng mga bilihin.
Umaaray na ang ilang negosyo sa food industry ng bansa sa kakulangan sa suplay ng ilang raw material na ginagamit sa pagluluto ng pagkain.
Ilan sa mga pahirapang makuha ang suplay ng chipping potatoes na ginagamit sa french fries at harina na isa sa pangunahing ingredient sa paggawa ng tinapay, pastries, pasta at noodles.
Dahil dito, tumaas na ang presyo ng french fries sa ilang fast food restaurant maging sa ilang food stalls, lalo sa Metro Manila.
Ayon kay Agriculture Undersecretary Kristine Evangelista, global concern ang kakulangan sa chipping potatoes na inaangkat sa ibang bansa, gaya ng Canada at Estados Unidos.
Iminungkahi naman ni Evangelista na gumamit na lamang muna ng white potatoes, camote at taro chips bilang alternatibo sa chipping potatoes.
Aminado naman si Eric Teng, pangulo ng Resto PH na inakala nila noong una na logistical problem lang ang problema sa pag-export ang dahilan ng delay sa kanilang suplay.
Gayunman, dahil sa krisis sa Ukraine, apektado na rin ang fertilizer access ng mga magsasaka sa ibang bahagi ng mundo kaya kinakapos ng suplay.
Ilang bansa na rin ang tumigil sa pag-export ng kanilang mga produkto, gaya ng palm oil ng Indonesia at karne mula Argentina, upang maprotektahan ang kanilang suppy.
Isang babae ang patay makaraang sakalin gamit ang cord ng cellphone charger sa Vigan City, Ilocos Sur.
Kinilala ang biktimang si Jessa Arola, 25 anyos, residente ng Bayan ng Banayoyo habang suspek sa krimen ang dati nitong nobyong si Dennis Raquel Junior, 27 anyos.
Ayon kay Vigan City Police OIC, Lt. Col. Franklin Ortiz, nakita ang bangkay ni Arola sa inuupahan nitong bahay sa Barangay Tamag kung saan inabutan din si Raquel.
Isinumbong ang suspek ng nakababata nitong kapatid na kanyang tinawagan at pinagsabihan ng nagawang krimen.
Nagkaroon anya ng pagtatalo ang dating magkasintahan hanggang sa mauwi sa pananakal umano ni Raquel kay Arola gamit ang cord ng cellphone charger.
Bago ang krimen ay nabanggit umano ng biktima sa kaibigang si Leila Bilgera, na naghahanap ng extrang padlock si Arola para sa kaniyang kuwarto at inamin din nito ang problema sa nobyo.
Iniimbestigahan na ng mga otoridad ang krimen habang nakapiit na ang suspek sa Vigan City Police.
Pinangalanan na ng Bangko Sentral ng Pilipinas (BSP) ang kanilang ika-5 deputy governor sa katauhan ni Outgoing Tourism Secretary Bernadette Romulo-Puyat.
Itinalaga si Puyat sa BSP, ilang linggo matapos simulan ng Central Bank ang paghahanap ng kanilang bagong deputy governor.
Mayo 12 nang i-anunsyo ng BSP na mababakante ang nasabing posisyon.
Inihayag naman ni outgoing BSP governor at Incoming Finance Secretary Benjamin Diokno na aprubado na ng kanilang Monetary Board ang appointment ni Puyat.
Hindi tulad ng BSP Governor at Monetary Board Members na itinatalaga ng pangulo, ang policy-making body ng Central Bank ang nag-a-appoint ng mga Deputy Governor at Assistant Governor.
Samantala, papalit naman si Puyat bilang Tourism Secretary ni Liloan Mayor Christina Garcia Frasco, Spokesperson ni Vice President-Elect Sara Duterte-Carpio.