NATIONAL NEWS

Magiging maaliwalas pa rin ang panahon lalo na sa umaga at tanghali ang Metro Manila at nalalabing bahagi pa ng Luzon pero posibleng makaranas ng pag-ulan, pagkulog at pagkidlat pagsapit ng hapon at gabi bunsod ng localized thunderstorm.

Ayon kay PAGASA Weather Specialist Ana Clauren, patuloy pa rin na magdala ng payong at iba pang panangga sa biglaang pagbuhos ng ulan.

Wala namang inaasahang malawakang pag-ulan sa Visayas at Mindanao pero asahan na magiging mainit at maalinsangan ang panahon lalo na sa umaga hanggang tanghali na may mataas na tiyansa ng mga pag-ulan sa hapon hanggang sa gabi.

Agwat ng temperatura sa Metro Manila ay maglalaro sa 25 hanggang 32 degrees celsius habang sisikat naman ang haring araw mamayang 5:26 ng umaga at lulubog naman ito mamayang 6:22 ng hapon.

Inihayag ni incoming  presidential Communications Operations Office  (PCOO) Secretary Trixie Cruz-Angeles na inaayos na nila na makasama ang mga bloggers sa ilan sa mga briefings sa palasyo ng Malakanyang.

Lumalabas kasi aniya na malaki ang naging gampanin ng mga pro-administration bloggers sa panahon ng kampanya ni President-Elect Ferdinand “Bongbong” Marcos, Jr.

Ang access sa Malacañang coverage o palace events ay kadalasang limitado lamang sa mga mamamahayag mula sa tv networks, online news outfits, at newspapers.

Ani Angeles, titignan pa nila ang umiiral na polisiya hinggil usapin kung papayagan ng incoming administration ang lahat ng mga journalists o mamamahayag na mag-cover ‘physically’ sa mga presidential events.

Umabot na sa mahigit 18M pasahero  ang naserbisyuhan na ng Metro Rail Transilt Line 3 (MRT 3) na libreng sakay program mula nang March 28, 2022.

Sinabi ng pamunuan ng MRT 3 na may kabuuang 8,472,637 pasahero ang naka-avail ng libreng sakay sa unang buwan ng programa, mula March 28 hanggang April 30.

Habang nasa 9 million 596 thousand 886 naman mula 1 hanggang katapusan ng Mayo  na siyang huling araw ng unang extension ng programa.

Asahan pa raw na tataas pa ang bilang na ito dahil muli pang pinalawig ang libreng sakay sa ikatlong pagkakataon hanggang sa katapusan ng hunyo.

Inihayag ni PhilHealth Executive Vice President and Chief Operating Office Eli Dino Santos ang kanilang pagtataas ng singil ng premiums sa kanilang miyembro na magsisimula ngayon buwan.

Ayon kay PhilHealth Executive Vice President and Chief Operating Office Eli Dino Santos na mahalaga ang nasabing pagtaas singil nila na nakapalibot sa Universal Health Care (UHC) Act.

Ani Santos, isa itong solusyon sa kakulangan ng pagpondo sa mga indirect contributors ng PhilHealth noong nakaraang mga taon.

Paliwanag pa nito na ang nasabing pagtaas ng singil sa premium ngayong taon ay nakapasailalim sa republic act 11223 (uhc act) na suportado ng administrasyon ni pangulong rodrigo duterte

Matatandaang ipapatupad na ngayong buwan ang 4% na taas na singil sa mga premium pay ng mga miyembro ng philhealth.

Nanawagan ang Department of Agriculture (DA) sa kamara na bumuo ng panukalang batas na pag-isahin ang lahat ng food safety regulatory system sa iisang ahensya sa ilalim ng pangangasiwa ng departamento.

Ito ang inihayag ni Agriculture Secretary William Dar  kung saan dapat aniya ikonsidera  ng mga mambabatas na gawin ito dahil sa ngayon aniya ay marami ang humahawak sa ahensya nito.

Iginiit ni DAR na hindi monopolya o walang kontrol ang da sa umano’y pananabotahe sa ekonomiya at pagtawag sa kanyang ahensya bilang mother of smuggling.

Matatandaang, isang mambabatas ang tinawag na mother of smuggling ang da dahil umano sa 80% ng problema sa issuance ng import clearances ay mula sa naturang kagawaran.

Samantala, naniniwala naman si DAR na itutuloy ng susunod ng administrasyong Marcos ang laban ng bansa kontra agricultural smuggling na siyang nagpapahirap sa mga pinoy farmers.

Mayorya ng nakapasa sa isinagawang Civil Service Exam ay mula sa (BARMM) Bangsamoro Autonomous Region in Muslim Mindanao.

Ayon kay CSC Commissioner Atty. Aileen Lizada na sa kanilang pag- aaral, tatlong rason ang kanilang nakita kung bakit nakuha ng nasabing rehiyon ang most number of civil service exam passers nitong nakaraang marso.

Una, karamihan sa mga kumuha ng pagsusulit ay professionals at ikalawa, mayroon ng 2nd degree ang mga examinees.

Ikatlo ay marami rin sa mga kumuha ng pagsusulit ay kaka-graduate pa lamang.

Kaugnay nito, pinayuhan ni Lizada ang katatapos lang ng kolehiyo na kumuha agad ng Civil Service Exam lalo’t sariwa pa sa kanilang mga isipan ang kanilang natutuhan sa kanilang pinag-aralan.

Inihayag ni Dr. Ted Herbosa, Medical Adviser ng National Task Force Against COVID -19, na kung siya ang tatanungin ay kontrolado na ang COVID-19 situation sa bansa.

Sa panayam ng DWIZ, sinabi ni Herbosa na marami na ang may proteksyon laban sa virus gayong halos 71 milyon na ang fully vaccinated sa bansa.

Patuloy rin aniya ang pagpapataas ng antas ng bakunahan partikular sa Bangsamoro Autonomous Region in Muslim Mindanao (BARMM) at iba pang lugar na may mababang vaccination rate.

Sinabi pa ni Herbosa na epektibo rin ang ipinatutupad na PDITR strategy o ang Prevent, Detect, Isolation, Treat, Reintegration.

Iniulat ng Lung Center of the Philippines (LCP) na nasa 321 katao ang namamatay sa Pilipinas kada araw dahil sa tobacco-related diseases.

Ayon kay  Dr. Glynna Ong-Cabrera, LCP Smoking Cessation Program Manager at Department of Health Quitline Project Director, dahil sa tobacco products ay nahihirapan ang mga naninigarilyo na huminto sa paggamit nito.

Kahapon, Mayo 31, bilang paggunita sa World No Tobacco Day, isang art installation ng 321 na pares ng sapatos at tsinelas ang idinisplay sa LCP lobby, na tatagal hanggang sa Hunyo 3.

Nakipag-ugnayan rin ang LCP sa Philippine College of Chest Physicians para sa isang virtual forum kaugnay sa mapanganib na epekto ng e-cigarettes o electronic nicotine devices, na mas kilala sa tawag na ‘vape.’

Upang matulungan rin ang mga naninigarilyo na tumigil na sa kanilang bisyo, maaaring tumawag ang mga ito sa DOH quitline 1558.

Ayon sa World Health Organization, mahigit walong milyong indibidwal kada taon ang namamatay dahil sa sakit na dulot ng paninigarilyo, kung saan mahigit pitong milyon ang nasasawi dahil sa direktang paggamit nito habang nasa 1.2 milyon naman ang non-smokers na na e expose sa second hand smoke.

Good news sa mga gustong magpunta ng Korea!

Pwede nang bumisita ang mga Pilipino kahit walang visa sa Jeju Island at Yangyang sa South Korea, simula ngayong araw.

Sa anunsyo ng embahada ng South Korea sa Pilipinas, ang mga magtutungo sa Jeju Island ay papayagang makapasok sa pamamagitan ng direct flights at manatili sa loob ng isang buwan ngunit hindi papayagan ang mga turista na bumyahe sa labas nito.

Para naman sa mga magpupunta sa Yangyang District, dapat na makapag-book ng group tour program sa pamamagitan ng travel agency.

Maaaring manatili sa naturang lugar sa loob ng 15 araw at bumiyahe sa Gangwon Province at Seoul Metropolitan Area, at bumalik pabalik ng Pilipinas sa pamamagitan ng Yangyang International Airport.

Pinaalalahanan naman ng embahada ang mga turista na required pa rin na sumunod sa ipinatutupad na health protocols.

Umaasa ang Korean Embassy na mapapalakas ang “people-to-people exchange’ sa pagitan ng Korea at Pilipinas. —sa ulat ni Raoul Esperas (Patrol 45)