NATIONAL NEWS

Pinatawan ng anim na buwang suspensiyon ng Office of the Ombudsman ang mga direktor ng Anti-Red Tape Authority (ARTA) na sina Jeremiah Belgica, Eduardo Bringas, Sheryl Sumagui, Jedrek Ng at Melamy Salvadora-Asperin.

Ito’y bunga ng mga kinakaharap nilang kasong administratibo na nag-ugat sa umano’y inisyu nilang resolusyon at order of automatic approval na nagbibigay ng contingent frequencies pabor sa NOW Telecom Company, Inc. noong March 1, 2021 na sinasabing batayan ng kanilang matinding paglabag.

“The evidence on record shows that the guilt of respondents…is strong and the charges against them involve Grave Misconduct, Gross Neglect of Duty and Conduct Prejudicial to the Best Interest of the Service which may warrant removal from the service,” wika sa kautusan ng Ombudsman.

Iginawad sa kanila ang preventive suspension upang maiwasan ang umano’y harrasment sa mga posibleng witness sa usapin.

Giit ng Ombudsman, maaaring umabot sa pagkakatanggal sa serbisyo ang maling pagpabor ng mga direktor ng ARTA sa NOW Telecom.

Naging kontrobersiyal noon ang kompanya sa kasagsagan ng pagpili ng third telco dahil bigo itong maging bidder bunga ng kulang-kulang na requirements.

Nabatid na pilit na ibinibigay ng ARTA sa NOW ang mga frequency na siyang parehong mga frequency na nakalaan na sa napiling third telco na DITO Telecommunity Inc.

Bunga nito, nanganganib ding pagmultahin ng Ombudsman ang mga ARTA officials ng halagang katumbas ng kanilang sweldo sa loob anim na buwan ngayong patapos na rin ang kanilang mga termino.

Kasalukuyang bumibili ang Department of Information and Communications Technology (DICT) ng satellite broadband connectivity para sa free wifi project ng gobyerno.

Ito ang inihayag ni chairman at CEO Kalvin Parpan ng Stellarsats Solutions Inc., isang registered internet service provider sa bansa.

Aniya, ito ay para ibigay sa geographically isolated disadvantageous areas o walang internet sa Pilipinas.

Dagdag pa ni Parpan na isa sa pinaka-importanteng bagay na ginagawa ng kanilang departamento sa proseso ng procurement ay ang availability

Ng lahat ng teknolohiya na makukuha ng pamahalaan bilang opsyon.

Pero, nilinaw niya na limitado ang terms of preference na inilabas ng departamento para sa pagbili ng naturang teknolohiya na sa kanilang paniniwala ay hindi makakatulong sa gobyerno dahil sa end-users o sa mga tao.

Irerekomenda ng Department of Health (DOH) sa administrasyong Marcos ang pananatili ng alert level system sa bansa sa gitna ng patuloy na COVID-19 pandemic.

Ayon kay health undersecretary Maria Rosario Vergeire, ito ay nagsisilbing gabay para malaman kung ano ang aksyon na dapat gawin ng kagawaran base sa risk level ng mga lugar sa bansa.

Paliwanag niya na ang pamahalaan ay nakararanas ng hamon sa pagsasailalim ng lahat ng lugar sa Alert level 1 bago matapos ang termino ni Pangulong Rodrigo Duterte dahil sa mababang vaccination turnout sa ilang rehiyon.

Sinabi naman ni Vergeire na imumungkahi ni health secretary Francisco Duque III sa susunod na administrasyon ang pagpapatuloy ng ilang programa para sa health status ng bansa kabilang na rito ang pagpapaigting ng kampanya sa COVID-19 vaccination drive

Nais ni incoming president Ferdinand ‘Bongbong’ Marcos, Jr. na masuri muna ang competitiveness ng bansa bago ituloy ang ratipikasyon ng Regional Comprehensive Economic Partnership (RCEP) trade agreement.

Ipinunto niya na ang estado ng pagiging competitive ng bansa ay maaaring maging hadlang sa bisa ng RCEP.

Ipinaliwanag ni Bongbong na ang sektor ng agrikultura ay dapat na matatag para harapin ang kompetisyon sa pagbubukas ng mga market.

Muli rin niyang iginiit na dapat munang tiyakin ng Pilipinas na handa itong makipagkumpitensya sa mga kapwa miyembrong bansa bago pumasok sa kasunduan.

Ang RCEP agreement, na nilagdaan ng Pilipinas kasama ang ASEAN members noong November 15, 2020 sa panahon ng 4th RCEP leaders’ summit ay ang world’s largest free trade area sa global trade.