Inihayag ng Department of Agriculture (DA) na malapit na umanong makamit ng bansa ang sapat na suplay ng bigas.
Ayon kay DA secretary William Dar, ito ay resulta ng pagtatanim ng mga dekalidad na hybrid at inbred rice varieties gayundin ang maayos na paggamit ng mga fertilizer.
Naging matagumpay din aniya sa nakalipas na tatlong taon ang implementasyon ng Philippine Integrated Rice Program.
Hindi umano dapat katakutan ng publiko ang mga sumusulpot na variants ng COVID-19.
Ito ang inihayag ni health advocate Tony Leachon hanggat bakunado ng dalawang primary doses at may booster shot laban sa COVID-19 at patuloy na nagsusuot ng face mask ang isang indibidwal.
Sakali man aniyang makaranas ng sintomas ng nabanggit na sakit ay maaaring magpa-antigen test at mag-isolate.
Nilinaw naman ni Leachon na ang Omicron subvariant na BA.5 ay lumalabas sa mga bansang may mababang vaccinationg rate.
Hindi rin aniya nagtala ng maraming bilang ng mga nasawi sa Africa kung saan ito nagmula.
Inihayag ng Department of Health (DOH) na napakataas o “very high” ng tyansa ng local transmission ng Omicron subvariant na BA.5.
Kasunod ito nang ma-detect ang BA.5 sa 2 indibidwal mula sa Bulacan na walang travel history abroad maliban sa pagpunta sa polling precint sa Metro Manila.
Paliwanag ni health undersecretary Maria Rosario Vergeire, kapag daw kasi na-detect na ang subvariant sa ating komunidad ay malaki na ang index of suspicion na mayroong local transmission.
Pero nilinaw niya na ang BA.5 ay hindi pa itinuturing na community transmission sa bansa.
Bumagsak ng 26.89 percent ang total crime volume sa lungsod ng Bacolod nitong Mayo kumpara sa kaparehong panahon noong nakaraang taon.
Ayon kay Bacolod City Police Office spokesperson Lieutenant Colonel Sherlock Gabana, nasa 87 crime incidents lamang ang naitala noong May 2022 na mas mababa sa 119 noong 2021.
Ipinagmalaki naman ni Gabana na ang pagbaba ng mga naitatalang krimen sa lungsod ay bunga ng mas pinaigting na police operations at crime prevention measures ng iba’t ibang local police units.
TUKOY na ng Philippine National Police (PNP) ang dalawa pang websites na hinihinalang sangkot sa e-sabong games.
Dahil dito, ayon kay PNP spokesperson Col. Jean Fajardo, nasa 14 websites na ang mga namo-monitor nilang nagpapalabas ng online cockfighting.
Walo naman aniya ang Facebook pages na nagpapakita ng e-sabong operations.
Samantala, ipinabatid na rin ng PNP sa DICT o Department of Information and Communications Technology at maging sa Facebook ang resulta ng kanilang imbestigasyon.
Patuloy na mino-monitor ng Department of Health o DOH ang clustering o pagkukumpol-kumpol ng mga kaso ng dengue sa 77 barangay sa Western Visayas.
Ayon sa DOH, apat na pu’t lima o 45 sa mga barangay na ito ay matatagpuan sa Negros Occidental, habang may mga naitala ring kaso ng dengue sa ilang barangay sa Antique, Capiz, Iloilo City at Aklan.
Pinakamarami naman ang mga kaso sa Negros Occidental na pumalo sa 657 kung saan lima ang nasawi na sinundan ng Antique na may 400 cases at Bacolod na may 139 cases.
Gayunman, nilinaw ng DOH na kahit tumataas ang dengue cases sa Western Visayas ay hindi pa naman nito naaabot ang ‘alert level threshold’.
Simula ngayong araw, June 4, ay matatanggap na ng mga minimum wage earners sa Metro Manila at Western Visayas Region ang inaprubahang umento sa sahod.
Ayon sa Department of Labor and Employment (DOLE) , nangangahulugan na magiging P570 na ang suweldo kada araw ng mga manggagawa mula sa dating P537.
Inaasahang nasa P55 hanggang P110 naman ang dagdag-sahod para sa mga empleyado sa Western Visayas.
Samantala, may nakaamba ring wage hikes sa mga rehiyon ng Ilocos, Cagayan Valley at Caraga.
Pansamantalang sinuspinde ng Department of Education o DepEd-Central Visayas ang milk feeding program
Ang hakbang ay ginawa ni DepEd-7 director Dr. Salustiano Jimenez matapos umanong malason ng nainom nilang gatas ang mahigit 100 estudyante noong nakaraang buwan.
Nilinaw naman ni Jimenez na temporary suspension lamang ito dahil hinihintay pa lamang ang resulta ng laboratory test sa sample ng hinihinalang kontaminadong gatas sa bayan ng Sta. Catalina.
Magpapatuloy naman ang feeding program sa hilagang bahagi ng probinsya dahil ibang supplier ang namamahagi nito sa mga pampublikong paaralan sa nasabing lugar.
Inamin ng Land Transportation Office (LTO) na aabutin pa ng mahigit isang taon bago matugunan ang 11M backlog sa plaka ng motorsiklo.
Ayon kay Edgar Galvante, Assistant Secretary ng LTO, 7M plaka pa lamang ang kanilang nagagawa at nakatengga pa rin ang 18M hanggang 19M plaka.
Para matugunan ang problema, iminumungkahi ni Galvante na magkaroon ng licensed third-party contractor na gagawa sa mga hindi matatapos na plaka.
Matatandaang sa ilalim ng Republic Act 11235, kailangang may plaka sa harap at likod ang mga motorsiklo.
Hindi naman apektado ang mga plaka para sa four-wheel vehicles.
Mag-aalok ng libreng shuttle service ang Department of Transportation (DOTr) katuwang ang Grab Philippines, para sa mga pasaherong nagmumula sa NAIA at tutungo sa anumang lugar sa National Capital Region.
Magaganap ito sa Hunyo a-15 at magtatagal hanggang a-30.
Ayon kay Mark Steven Pastor, Undersecretary for Road Transportation and Infrastructure ng DOTr, dagdag ang inisyatibo ng nagpapatuloy na Libreng Sakay’ Program sa MRT-3.
Habang bilang pasasalamat na rin ito kay Pangulong Rodrigo Duterte at Transportation Secretary Arthur Tugade.
Nasa 100 Grab rent shuttles ang ipapakalat sa paliparan na magagamit alas-8 hanggang alas-11 ng gabi.
Para maka-avail, magtungo lang sa Grab booth sa arrival areas ng NAIA Terminals 2 at 3.