Nagbabala ang Department of Health (DOH) sa publiko hinggil sa online scammers na gumagamit ng pangalan ng mga opisyal ng kagawaran para makapag-solicit ng pera.
Ayon sa kagawaran, ang panloloko na ito ay nagsisimula sa pagmemensahe ng mga nagpapanggap na DOH officials gamit ang hindi kilalang account at nanghihingi ng pera.
Sakaling makaranas nito, paalala ng DOH na huwag magbigay ng personal na impormasyon sa halip ay i-block at i-report ang mga ito awtoridad.
Pansamantalang isinara ang mga pasyalan sa Sorsogon dahil sa naganap na pagputok ng bulkang Bulusan kaninang umaga.
Batay sa abiso na inilabas ni Irosin Municipal mayor Alfredo Cielo, epektibo simula kahapon ang pagsasara ng mga tourist destination sa lugar.
Ito aniya ay para matiyak ang seguridad ng publiko.
Nabatid na itinaas ng Philippine Institute of Volcanology and Seismology (PHIVOLCS) sa Alert level 1 ang status ng naturang bulkan.
Kasalukuyang naghahanda ng relief operations si vice president Leni Robredo para sa mga residenteng naapektuhan ng pagputok ng Bulkang Bulusan sa Sorsogon.
Ayon kay Robredo, kabilang sa mga pangunahing kailangan ng mga residente ang face masks at bottled water.
Agad naman aniyang pupunta sa apektadong lugar ang kaniyang team at patuloy na aalamin ang iba pang pangangailangan ng mga residente.
Nabatid na nabalot ng ashfall ang apat na barangay sa bayan ng Irosin at Juban.
Mahigpit na binabantayan ng Palasyo ang kondisyon ng Bulkang Bulusan sa Sorsogon matapos ang phreatic eruption kaninang umaga.
Ito ang inihayag ni acting spokesperson secretary Martin Andanar na naka-standby 24/7 ang lahat ng concerned agencies kasunod nang itaas sa alert level 1 ang Bulkang Bulusan.
Ipinaalala din ng Palasyo sa publiko partikular na sa mga residente na nakatira malapit sa paligid ng bulkang na bantayan ang anumang kaganapan kaugnay sa sitwasyon nito at makipag-ugnayan sa mga awtoridad.
Samantala, sinabi ng NDRRMC na nakikipag-ugnayan na sila sa Regional Disaster Risk Reduction and Management Council- Bicol hinggil sa naturang aktibidad ng bulkan.
Aabot sa 12 hinihinalang miyembro ng New People’s Army (NPA) ang nakaengkwentro umano ng mga militar sa Barcelona, Sorsogon nitong Sabado na ikinasawi ng isa umano’y rebelde.
Batay sa ulat ng 9th infantry division ng Philippine Army narekober umano sa pinangyarihan ng bakbakan ang dalawang rifle at M203 grenade launcher kung saan nagsagawa ng security operation ang mga sundalo at pulis sa barangay Olandia dahil sa umano’y presensya armadong grupo sa lugar.
Habang wala namang naiulat na nasugatan sa panig ng gobyerno at, mahigpit na seguridad na ang pinaiiral ng awtoridad para sa kaligtasan ng mga residente.
Kusa nang nagsilikas ang ilang mga residenteng malapit sa mount bulusan sa Sorsogon matapos magbuga ng abo ang bulkan pasado alas-10 ng umaga ngayong araw
Batay sa ulat bagama’t wala pang ipinatutupad na forced evacuation sa lalawigan naglibot na ang mga tauhan ng barangay Cogon para mamahagi ng face mask sa mga residente bilang proteksyon laban sa abong mula sa bulkan.
Nabatid na itinaas na ng Phivolcs sa Alert level 1 ang nasabing bulkan
Sabayang pumadyak ngayong linggo sa Metro Manila ang isang libong siklista bilang panawagan upang umaksyon laban sa epekto ng climate change.
Kaisa nang walong probinsya sa bansa 11 pang bansa sa Asya, na nagdaos ng kaparehong event na “pedal for people and planet kabilang ang japan, south korea, malaysia at vietnam.
Nagsimula ang pag-arangkada ng mga siklista mula university of the Philippines Campus sa Quezon City papuntang Marikina.
Bukod sa advocacy talks, nagkaroon din sa naturang event ng libreng-bike lessons, kaya dinala ng ilang mga magulang ang kanilang mga anak para matuto.
Ang pedal for people and planet, at safe street event ay kaugnay ng world bike day na ipinadiriwang tuwing ikatlo ng Hunyo.
Matatandaang batay sa pinakabagong tala ng intergovernmental panel on Climate Change (IPCC), ang average annual global greenhouse gas emission o mga usok na galing sa mga sasakyan at pabrika ay nasa pinkamataas nang lebel sa nakalipas na dekada.
Apat na barangay sa bayan ng Irosin, Sorsogon ang nabalot ng ashfall matapos ang phreatic eruption ng Bulkang Bulusan kaninang umaga.
Kabilang dito ang barangay Cogon, Bolos, Gulang-Gulang at Tinampo.
Ayon kay officer Fritzie Michelena ng Municipal Disaster Risk Reduction and Management Office (MDRRMO), 800 pamilya ang bahagyang naapektuhan ng nabanggit na pag-alburuto ng bulkan.
Dagdag pa niya na mas naapektuhan ng ashfall ang bayan ng Juban.
Sa ngayon, naghahanda na ang mga lokal na pamahalaan sa naturang lalawigan para sa posibleng paglikas ng mga residente.
Naglabas ng public health warning ang Department of Health kaugnay ng nangyayaring ashfall bunsod ng pag-alburoto ng Bulkang Bulusan ngayong araw, Hunyo a-5 sa Sorsogon.
Ayon sa DOH, ang volcanic ash kasi na inilabas ng Bulkang Bulusan ay mayroong carbon dioxide at fluorine na posibleng may masamang epekto sa kalusugan ng tao.
Dahil dito, nag-abiso ang DOH sa kung ano ang dapat gawin ng mga apektadong residente.
1. Iwasan ang pagkalantad sa abong ibinuga ng bulkan.
2. Manatili sa loob ng kabahayan at isara ang mga pintuan at bintana.
3. Panatilihing basa ang kapaligiran upang maiwasan ang pangangalikabok ng paligid. Lagyan ng mamasa-masang kurtina ang bintana at pintuan.
4. Iwasang lumanghap ng hangin na may abo, gumamit ng salamin o “goggles”.
5. Panatilihin ang mga alagang hayop sa “closed shelters”.
6. Alisin ang mga abo sa bubong ng bahay.
7. Alamin ang sitwasyon ng kalsada bago bumiyahe. Sumunod sa mga batas trapiko.
Nabatid na kaninang umaga, itinaas na rin sa Alert Level 1 ang Bulkang Bulusan.
Nakahanda na ang ilang opisyal ng Department of Health (DOH) na magtrabaho sa ilalim ng administrasyon ni President-elect Ferdinand ‘Bongbong’ Marcos Jr.
Sa inilabas na pahayag ng DOH, kasado na sila sa pagpapalit ng administrasyon sa katapusan ng buwan.
Aniya, pursido silang magtrabaho sa susunod na kalihim para ipagpatuloy ang implementasyon ng Universal Health Care Act.
Inihayag naman ni DOH Undersecretary and Spokesperson Maria Rosario Vergeire na nais ni Health Secretary Francisco Duque III na ituloy ang mga polisiyang may kinalaman sa COVID-19 gaya ng pagpapabuti sa vaccination rate at pagpapanatili sa minimum public health standards.
Nirerekomenda rin ni Duque ang pagpapalakas pa sa health systems capacity ng bansa gaya ng mga ospital at rural health units gayundin ang pag-ibayo sa patient navigation at referrals para sa paglaban sa COVID-19.