NATIONAL NEWS

Kinampihan ni Cavite governor Jonvic Remulla ang kilalang pro-Duterte blogger at LGBT member na si Sass Rogando Sasot.

Kaugnay ito sa kontrobersyal na pagpatay ng ilaw at mikropono sa gitna ng talumpati ni Sasot sa graduation ng mga senior high school student ng Southern Philippines Institute of Science and Technology sa Cavite noong Biyernes.

Ginanap ang graduation sa Dasmariñas City kung saan sumasamba ang church of God (COG).

Bagaman nagpaliwanag na ang COG hinggil sa insidente,  iginiit ni Remulla na dapat ay nagpakita ng habag at nagparaya na lamang ang naturang simbahan.

Hindi anya dapat gamitin ang pananampalataya bilang kalasag upang magpalaganap ng poot at pagkiling laban sa isang tao batay sa pagiging kasapi ng isang partikular na grupo.

Ipinaalala rin ng gobernador sa COG na paglabag sa Section 4 ng provincial ordinance ang diskriminasyon laban sa sinuman o anumang grupo batay sa kanilang sexual orientation at gender identity o ang mga nasa LGBT community.

Asahan na magiging maaliwalas ang panahon sa malaking bahagi ng bansa pero posibleng makaranas ng isolated rain showers at thunderstorm sa Bicol region partikular na sa Sorsogon kung saan pumutok ang Bulkang Bulusan.

Ayon kay PAGASA weather specialist Obet Badrina, posibleng maaliwalas na panahon ang mararanasan sa bahagi ng Visayas at Mindanao dahil malaki ang tiyansa na malusaw na ang Low Pressure Area (LPA) na nasa labas ng bansa.

Magiging maganda naman ang panahon sa malaking bahagi ng kabisayaan kabilang na diyan ang Samar, Leyte, Bohol, Cebu, Negros Island, Siquijor, Panay Island at Guimaras.

Manatili namang nakaalerto dahil posibleng magkaroon ng isolated rain showers at thunderstorms sa bahagi ng Mindanao lalo na sa hapon hanggang sa gabi.

Agwat ng temperatura sa Metro Manila ay maglalaro sa 25°C hanggang 34°C habang sumikat naman ang haring araw ala-5:26 ng umaga at lulubog naman ito mamayang 6:23 ng hapon.

Epektibo na rin ngayong Hunyo ang dagdag-sahod sa 14 pang rehiyon sa Pilipinas.

Ito ay matapos maglabas na ng wage orders ang Regional Wage Board na nag-aapruba sa hirit na umento.

Ayon kay Labor Secretary Silvestre Bello III, maglalaro sa P30 hanggang P110 ang umento sa 14 na rehiyon.

Kabilang dito ang Metro Manila, Cordillera Administrative region, Caraga at Ilocos region.

Pinasalamatan naman ni Bello ang Regional Wage Board dahil sa agarang pag-apruba sa hirit na dagdag kita.

Suportado ng grupo ng mga manggagawa na Federation of Free Workers (FFW) ang mga panukala ni Albay 2^nd District Rep. Joey Salceda sa bagong administrasyon at kongreso na ayusin ang sistema ng PhilHealth at mga programa nito.

Ilan sa mga programa ng PhilHealth na tinututulan ni Salceda, Chairman ng House Ways and Means Committee, ang sapilitan nitong pagtatalaga ng napakataas na kontribusyon sa mga Overseas Filipino Worker (OFW).

Umaabot ito sa 38,400 pesos kada taon pero hindi naman pakikinabangan ng mga OFW habang nasa ibang bansa.

Ayon kay Salceda, muli niyang ihahain sa Kamara ang House Bill 7570 o PhilHealth Reform Act, na naglalayong rebisahin ang mga programa at sistema ng PhilHealth.

Kabilang na rito ang hindi sapilitang pagsali ng mga OFW at hanggang 100 pesos lamang ang babayaran sa PhilHealth ng mga mabababa ang sahod.

Nakikiisa naman ang FFW sa mga panukala ng kongresista na repormahin ang health program ng gobyerno at gawing ‘voluntary’ lamang ang pagsapi ng mga OFW sa PhilHealth.

Matatapos na sa Miyerkules, Hunyo a-8 ang umiiral na gun ban sa Pilipinas na ipinatupad noong Enero a-9 sa gitna ng 2022 election.

Ayon sa Philippine National Police, sumampa na sa 3, 578 ang bilang nang lumabag sa gun ban sa bansa.

Kabilang sa lumabag ang 27 pulis, 22 sundalo at 61 security guard.

Ang Metro Manila pa rin ang rehiyong nakapagtala ng maraming violator na sinundan ng CALABARZON, Central Visayas, Central Luzon at Western Visayas.

Mula Enero, 3, 364 gun ban operations na ang naisagawa sa Pilipinas.

Inilabas na ng Land Transportation Franchising and Regulatory Board (LTFRB) ang listahan ng mga drivers at operators na nakatanggap ng fuel subsidy.

Ginawa ito ng LTFRB matapos ang reklamo ng ilang PUV operators na hindi pa sila nabibigyan ng ayuda.

Ayon sa LTFRB, kailangan lamang buksan ang inilabas nilang link upang makita kung nakapasok na sa account ng benepisyaryo ang ibinigay na tulong.

Bagaman aminado ang ahensya na hindi lahat ay nabigyan ng tulong, kanilang tiniyak na hindi sila titigil na ipatupad ang programa upang matulungan ang lahat ng apektado ng oil price hike.

Bahagyang tumaas ang bilang ng aktibong kaso ng COVID-19 sa Pilipinas.

Batay sa datos ng DOH, pumalo sa 2, 479 ang active cases nitong linggo mula sa 2, 436 noong Sabado.

Nakapagtala naman ang kagawaran ng 219 na bagong nahawa sa COVID-19.

Sa nakalipas na tatlong araw, wala pa ring nadagdag sa bilang ng mga nasawi sa COVID-19 na nananatili sa 60, 456 habang 3, 628, 611 ang gumaling.

Sa kabuuan, pumalo na sa 3, 691, 546 ang COVID-19 cases sa bansa.