NATIONAL NEWS

Kung si Senate President Tito Sotto ang tatanungin, dapat ay sundin ng Philippine National Police (PNP) at ng abogado ng suspek na naka-hit and run ng isang security guard ang nakasaad sa RA 10586 o anti-drunk and drugged driving law.

 Ito ang inihayag ni Sotto makaraang madismaya sa hindi nasunod na proseso at ginawa ng mga otoridad sa pagsuko ng suspek na si Jose Antonio San Vicente.

 Iginiit ng outgoing Senate President na dapat ay isinailalim si San Vicente sa comprehensive 5 way test ng Philippine Drug Enforcement Agency (POEA) at hindi tamang regular drug test lang ang gawin.

 Nakapagtataka anyang ang mahirap na lolong nagnakaw lang ng mangga ay ipinakulong agad gayong iba ang pagtrato ng mga otoridad sa may kaya na naka-hit and run ng security guard na muntik nang mamatay.  - sa ulat ni Cely Ortega-Bueno

Inirekomenda ni Senator Sonny Angara na magsagawa na lang ng dayalogo ang Inter-Agency Task Force (IATF) at Cebu provincial government.

 Ito’y upang maiwasang umabot pa sa korte ang usapin sakaling magmatigas ang IATF at Cebu LGU sa kani-kanilang paninindigan hinggil sa mandatory at optional na pagsusuot ng face mask.

 Ayon kay Angara, nauunawaan niya si Cebu Governor Gwendolyn Garcia sa pag-i-isyu ng patakaran ukol sa opsyonal na pagsusuot ng facemask sa kanilang lalawigan.

 Ito’y dahil nakasalalay ang kanilang income sa turismo kaya’t bumuo ito ng pro-active policy sa pagsusuot ng facemask.

 May basehan din naman anya ang hakbang ng gobernador dahil kapag tiningnan ang ibang mga bansa tulad sa Europa, Amerika at Asya, gaya sa indonesia, ginawa na lang optional ang pagsusuot ng face mask.

 Mayroon naman din anyang siyensya na sumusuporta sa optional na pagsusuot ng facemask sa outdoor area pero ibang usapin na sa matataong lugar kung saan mahirap ipatupad ang social distancing, gaya sa bus stop, sakayan ng jeep, tren at palengke. –  sa ulat ni Cely Ortega-Bueno (Patrol 19)

Sa gitna ng kaliwa’t kanang krisis sa mundo, nakita ang pinakamaraming “stressed” na manggagawa’t empleyado sa Pilipinas kumpara sa iba pang bansa sa Southeast Asia.

 Ito ang lumalabas sa “State of the Global Workplace: 2022 Report” ng Gallup, isang global analytics at advice firm, kung saan 50% ng 1,000 respondents na Pilipinong nagtratrabaho ang nakaramdam ng stress isang araw bago ang interview.

 Pumangalawa naman ang Thailand, 41%; Cambodia, 38%; Myanmar, 37%; Vietnam, 35%;  Singapore, 34%, Laos, 32%; Malaysia, 27% at Indonesia, 20%.

 Alinsunod sa labor code, karaniwang 40 oras kada linggo ang trabaho ng isang normal na empleyado habang nakatali sa hanggang 570 pesos per day ang minimum wage sa Metro Manila, na pinakamataas sa buong Pilipinas.

 Ilan sa mga batayan ng mataas na stress level ang hindi patas na trato sa trabaho, na pinakamalaking source ng burnout, na sinusundan ng dumaraming workload, malabong komunikasyon sa manager, kawalan ng manager support at hindi makatarungang time preasure.

Dahil din sa baba ng sahod at taas ng inflation rate, na pinakamataas ngayon simula noong November 2018, nadagdagan umano ang stress ng mga Pinoy, kaya’t mayroong mga naghahanap pa ng dagdag-trabaho.

 Pinayuhan naman ng gallup ang mga manggagawa na bukod sa trabaho, maghanap ng maayos na boss lalo’t ang limang sanhi ng work stress ay madalas nagmumula sa mahinang leader sa trabaho.

Aminado ang Philippine Overseas Employment Administration (POEA) na malayo pa ring maabot ang 7,500 cap na itinakda ng gobyerno sa deployment ng mga healthcare worker.

 Ayon kay POEA Administrator Bernard Olalia, ang nasabing bilang ay para lamang ngayong taong 2022.

 May sapat pa naman anyang supply ng nurse sa bansa pero hindi nagbigay ng eksaktong bilang si Olalia.

 Una nang inihayag ni Olalia na mahigit 2,000 nurse na ang na-deploy simula Enero hanggang Mayo.

 Kanya ring nilinaw na hindi otomatikong aalisin ang deployment cap kapag inalis na ang state of national emergency sa bansa dahil sa COVID-19 pandemic.

 Sa kabila nito, inihayag ni Olalia na hindi pa nila inirerekomenda ang pag-alis sa deployment cap na layuning matiyak na may sapat na health care worker ang bansa sa gitna ng pandemya.

 Nilinaw ni Agriculture Assistant Secretary Noel Reyes na hindi lamang solusyon ang pag-aangkat ng isda upang mapataas ang supply.

 Sa gitna ito ng batikos ng grupong Pambansang Lakas ng Mamamalakaya ng Pilipinas (PAMALAKAYA) na ang pag-fish importation ay maaaring magdagdag ng pasanin sa mga lokal na mangingisda.

 Iginigiit ng pamalakaya na dahil sa pag-aangkat ay maaari nitong bawasan ang halaga ng local fish production, na magpapalala sa kanilang pakikibaka sa gitna ng walang prenong oil price increase.

 Gayunman, ipinaliwanag ni Reyes na kailangang isulong ang pagtatayo ng mga imprastraktura na kailangan ng mga lokal na mangingisda upang matulungan silang madagdagan ang huling isda.

 Samantala hinimok naman ng DA ang susunod na administrasyon na maglagay din ng premium sa Bureau of Fisheries and Aquatic Resources (BFAR) para madagdagan ang suplay ng isda.

Matapos ang walong taong delay, makukumpleto na ngayong Hunyo ang Common Station, na magkokonekta sa apat na railway lines at pampublikong kalsada sa Metro Manila.

Ayon sa Department of Transportation (DOTR), ang Unified Grand Central Station ay isang patunay sa kalidad ng serbisyo sa taumbayan ni Pangulong Rodrigo Duterte, na nakatakdang bumaba sa pwesto sa June 30.

Ang Common Station, na matatagpuan sa North Edsa, Quezon City, ang magdurugtong sa LRT-1, MRT-3, MRT-7 at Metro Manila Subway.

Magkakaroon din ng Intermodal Integrated System sa ilalim nito, na magpapahintulot sa mga pasahero na sumakay ng bus, jeep o taxi.

Sa oras na makumpleto, makapag-se-serbisyo ang Common Station ng hanggang kalahating milyong pasahero kada araw.

Sa gitna ng hindi maawat na oil price increase, isang fuel tanker na may kargang 20,000 litro ng gasolina na nagkakahalaga ng 1.5 million pesos ang na-hijack sa bayan ng Sariaya, Quezon.

 Apat umanong suspek ang nangharang sa truck na pag-aari ng 4M Transport Intel Corporation habang patungong Lucena City mula sa Alora Depot sa Barangay Castañas, Sariaya.

 Kinilala ni Quezon Provincial Police Office Director, Col. Joel Villanueva ang tatlo sa mga suspek na sina Vincent Reyes, na kalauna’y naaresto, Philip Magtanggol at isang alyas Joli.

 Nasakote si Reyes sa tulong ng kanyang cellphone na naiwan sa loob ng truck habang sina Magtanggol, alyas Joli at isang hindi pa nakikilalang salarin ay pinaghahanap pa rin.

 Tinutukan umano ng baril nina Reyes ang driver ng truck bago ito itinali at piniringan at iniwan sa gilid ng kalsada.

 Narekober naman ang fuel tanker sa Barangay Manggalang-Bantilan matapos ang follow-up operation.

Isinara na ni incoming Agrarian Reform Secretary Conrado Estrella III ang pangako ni President-elect Ferdinand Marcos Jr. na ibaba sa 20 pesos ang presyo ng kada kilo ng bigas.

 Inamin ni Estrella na nakausap na niya ang ilang kapwa magsasaka at inihayag ng mga ito na hindi kakayaning maibaba sa 10 piso ang kada kilo ng farm gate price.

 Hanggang 14 pesos anya ang kayang presyo sa farm gate at pagdating sa miller hanggang sa retailers ay maaaring umabot sa 28 pesos ang kada kilo ng bigas.

 Nilinaw ng incoming Secretary ng Department of Agrarian Reform (DAR) na kakayanin naman sa mga susunod na panahon na ibaba ang presyo kung magiging mas moderno ang farming technology sa bansa.

 Una nang sinabi ni outgoing DAR acting Secretary Bernie Cruz na sa 2^nd quarter ng 2023 maibababa ang presyo sa pamamagitan ng mega-farms.

 Samantala, inihayag ni Estrella na isa sa kanyang ipa-prayoridad ang imbestigasyon sa pag-aresto sa Tinang 91 o grupo ng mga magsasaka, land reform advocates, media at estudyante sa Hacienda Tinang sa Concepcion, Tarlac.

 Kung patatagalin anya ito ay maaaring magresulta sa karahasan na posibleng hindi ma-control.

Plano umano ng Communist Terrorist Group na manggulo sa oath-taking ceremony ni President-elect Ferdinand “Bongbong” Marcos Jr. sa Hunyo a-30.

 Ito ang ibinunyag ng dating mga miyembro ng Communist Party of the Philippines-New People’s Army-National Democratic Front (CPP-NPA-NDF) sa idinaos na tagged media briefing ng National Task Force to End Local Communist Armed Conflict.

 Ayon kina Orlando “Ka Warly” Baluyot, Chairman ng Tinang Samahang Nayon Multi-Purpose Cooperative at Ka Pong Sibayan, magsasaka mula sa Hacienda Tinang sa Concepcion, Tarlac, na kapwa dating rebelde, nagsisimula na ang mga komunista na i-organisa ang mga magsasaka sa kanilang lalawigan.

 Maliban sa Hacienda Tinang, ang mga opisyales at miyembro ng CPP-NPA-NDF Legal Front Organizations ay nagsasagawa na anila ng pulong kasama ang mga magsasaka malapit sa Hacienda Murcia at Barangay Central sa loob ng Hacienda Luisita.

 Ang mga magsasaka umano sa mga nasabing lugar ay organisado na ng naturang front groups.

 Inihayag din ni Baluyot na ang mga magsasakang ito ay may problema sa kanilang lupain at nakatanggap na umano ng eviction threats.

 Isiniwalat din ng dalawang dating rebelde na may ilang miyembro ng mga grupong makakaliwa ang madalas na nakikitang pumupunta sa mga nabanggit na lugar.

Magpapatupad ng bawas singil sa tubig sa kanilang mga kustomer ang Maynilad Water Services.

 Ito ay matapos ipag-utos ng Metropolitan Waterworks and Sewerage System (MWSS) Regulatory Office ang rebate sa kanilang mga customer matapos ang sunod-sunod na water interruption sa National Capital Region (NCR).

 Kabilang sa magkakaroon ng bawas singil sa tubig ay ang mga residente ng Muntinlupa, Las Piñas, Malabon, Valenzuela at Quezon City na hanggang ngayon ay nakakaranas pa rin ng mahinang suplay ng tubig.

 Samantala, ibinunyag din ng MWSS na ang ipinatutupad na tax rate ng maynilad ay hindi aprubado ng kanilang board of trustees dahilan ng bahagyang paggalaw sa mga bill ng tubig.

 Ang bawas singil sa tubig ay bilang balik-bayad ng Maynilad kung saan aabot sa 2.1 million pesos ang maisasauli ng Maynilad sa kanilang mga customer.