Aabot sa mahigit kalahating milyong kabataan ang maituturing na child laborer sa bansa.
Ayon sa Department of Labor and Employment (DOLE), sa huling datos ng Philippine Statistic Authority (PSA), sa kabuuang 597,000 na mga kabataan, karamihan dito ay mula sa Regions 10, 5, 7, 4-A at barmm bunsod ng kahirapan.
Sinabi pa ng DOLE na ang mataas na bilang ng child laborer ay dahil narin sa COVID-19 pandemic at mataas na presyo ng bilihin sa bansa.
Inihayag ni Inter-Agency Council on Traffic (I-ACT) Chief Charlie del Rosario na kanila nang ipinauubaya sa mga eksperto ang desisyon sa pagbabawas ng kapasidad o mananakay sa mga pampublikong transportasyon.
Ayon kay del Rosario, hindi sila ang magdidikta kung hindi o dapat bawasan ang bilang ng mga pasahero sa mga public vehicle kundi ang mga eksperto.
Sinabi ni del Rosario na kanilang irerespeto ang anumang maging desisyon ng mga eksperto hinggil sa naturang isyu kung saan, kanila lamang ipatutupad ang mga panuntunan, sakaling magpasya na ang mga ito.
Sa ngayon, patuloy ang Inter-Agency Task Force (IATF) sa pagpapatupad ng public minimum health protocols sa mga pampublikong sasakyan sa mga lugar na nasa alert level 1 sa harap ng tumataas na kaso ng COVID-19.
Nagbabala ang Department of the Interior and Local Government (DILG) sa Local Government Units (LGUs) na nagbibigay ng 2nd dose ng booster shots sa mga hindi kwalipikado.
Kasunod ito ng naging pahayag ng isang indibidwal na nakatanggap na umano ito ng 2nd booster shot kahit hindi pa ito kwalipikado.
Ayon kay DILG Secretary Eduardo Año, posibleng maharap sa kaparusahan ang mga lokal na pamahalaan na magbibigay ng ikalawang booster dose sa general population.
Iginiit ni Año na tanging ang mga nakatatanda lamang, mga may karamdaman at mga health worker ang maaari munang makatanggap ng ikalawang booster dose.
Sinabi pa ng kalihim na dapat igalang ng bawat isa ang proseso at sistemang ipinatutupad ng pamahalaan dahil maingat naman itong pinag-aaralan ng mga tauhan ng Inter-Agency Task Force (IATF).
Nanawagan ang Simbahang Katolika sa mga mananampalataya na patuloy na ipagdasal ang kalagayan at kalusugan ni Pope Francis.
Ayon kay Papal Nuncio to the Philippines Archbishop Charles John Brown, na ang problema sa tuhod ng Santo Papa ang nagresulta sa kanselasyon ng kamakailan niyang pakikipag-ugnayan sa ibang bansa.
Una nang ipinagpaliban ng Vatican ang apostolic trip ni Pope Francis sa South Sudan at Congo, kasunod ng payo ng kanyang mga doctor na magpahinga na lamang ito.
Bukod pa dito, hindi din makadadalo si Pope Francis sa Corpus Christi Mass at Procession o ang Kabanal-banalang Katawan at Dugo ni Kristo dahil sa kanyang kondisyon.
Nakatakdang ipagdiwang ng simbahang Romano Katoliko ang Corpus Christi Mass at Procession sa Basilica of Saint John Lateran sa Linggo, Hunyo a-19.
Kumpiyansa ang Department of Trade and Industry (DTI) na hindi ibabalik sa mas mahigpit na alert level 2 ang National Capital Region (NCR).
Ito ay sa kabila ng muling pagtaas ng bilang ng mga tinamaan ng COVID-19 sa rehiyon.
Matatandaang sinabi ng Department of Health (DOH) na kahit pa tumaas ang lingguhang kaso ng COVID-19 sa NCR ay mababa parin ang utilization rate ng health care facilities.
Ayon kay DTI Secretary Ramon Lopez, ang pagpapalawig ng alert level 1 sa Metro Manila ay malaking tulong upang mapanatili ang pagbangon ng ekonomiya ng bansa.
Sa ngayon, pinalawig ng Inter-Agency Task Force (IATF) ang alert level 1 sa Metro Manila at iba pang lugar sa bansa hanggang sa katapusan ng Hunyo.
Nilinaw ng Philippine National Police (PNP) na hindi scripted ang ginawang pagsuko kahapon sa Camp Crame ng driver ng SUV na sumagasa sa isang security guard na si Christian Joseph Floralde sa Mandaluyong City.
Kasunod ito ng natatanggap na komento ng ahensya kung saan, binigyan umano ng special treatment ng PNP ang suspek na si Jose Antonio San Vicente.
Matatandaang iniharap ni PNP Officer-in-Charge Plt. Gen. Vicente Danao Jr. si San Vicente kasama ang kanyang abugado at magulang sa isang press conference sa Camp Crame para magpaliwanag sa media.
Ayon kay PNP Spokesperson Police Colonel Jean Fajardo, nagkataon lamang na katatapos lang ng press conference ni PNP OIC Gen. Danao kaya naging mala-TV set up ang pagpresinta sa suspek.
Iginiit pa ni Fajardo na tanging si Danao lamang ang nakakaalam ng pagsuko ni San Vicente.
Una nang sinabi ng ina ng suspek, na nagdesisyon silang sumuko kay Gen. Danao matapos nilang mapanood sa balita ang ultimatum na inilabas ng PNP kung saan, sakaling hindi pa sumuko ang suspek ay mapipilitan na ang ahensya na magpalabas ng tracker teams para arestuhin ang San Vicente.
Inihayag ni Private Hospital Association of the Philippines (PHAPI) President Dr. Rene de Grano na patuloy ang kanilang koordinasyon sa Department of Health (DOH) hinggil sa COVID-19 allowance ng mga healthcare worker.
Ayon kay de Grano, marami pa sa mga health worker sa pribadong ospital ang hindi pa nakatatanggap ng kanilang special risk allowance o sra ngayong taon sa gitna ng COVID-19 pandemic.
Sinabi ni de Grano na ang iba kasi sa mga ospital ay hindi pa rin tapos o patuloy pa ring hinihingian ng mga dokumento bago umano ibaba ang pondo para sa kanilang allowance.
Matatandaang nitong buwan ng Pebrero nang ilabas ng Department of Budget and Management (DBM) ang nasa 7.9 billion pesos na halaga ng pondo para sa allowance ng mga medical frontliner.
Pinangunahan ni Pangulong Rodrigo Duterte ang isinagawang National Artist Award na ginanap sa Malacañang kahapon.
Ginawaran ni Duterte ng Order of National Artist ang walong personalidad ng Philippine Culture and Arts kabilang na dito sina:
Kasama din sa ginawaran ang mga yumaong sina:
Ang naturang award o pagkilala sa walong personalidad ay alinsunod sa Proclamation No. 1390 na nilagdaan ni Pangulong Duterte noong Hunyo a-10, 2022.
Pinalawig pa ng Maynilad ang water service interruption sa 20 barangay sa Las Piñas City.
Ayon kay Las Piñas City Mayor Imelda Aguilar, nakakaranas ngayon ng mahinang tubig ang maraming residente sa kanilang lungsod dahil sa mataas na pangangailangan ng tubig sa Bagbag Reservior.
Kabilang sa mga apektadong barangay ay ang Almanza Uno, Caa, Manuyo Dos, Pamplona Dos at Tres, Pulanglupa Uno at Dos, Talon Uno Hanggang Talon Singko, Zapote at iba pang barangay dahil sa maintenance activity sa kanto ng Alabang-Zapote at Impex Compound.
Samantala, pinayuhan naman ni Aguilar ang lahat ng residente sa lungsod na magtipid sa paggamit ng tubig upang mabawasan ang epekto ng limitadong suplay ng tubig.
Maghahain ng karagdagang 20 pesos provisional fare increase sa pamasahe ang Philippine National Taxi Operators Association para masolusyonan ang patuloy na pagsirit sa presyo ng produktong petrolyo.
Sa panayam ng DWIZ sinabi ni Philippine National Taxi Operators Association President Atty. Bong Suntay, na sa ngayon, ang flag down rate sa pamahasahe ng mga taxi ay 40 pesos kasama na dito ang suceeding meter pero kung maaaprubahan ang kanilang hiling ay malaki ang maitutulong nito para sa mga driver at operators.
Ayon kay Suntay, hindi magiging mabigat at mas mainam ito para sa mga taxi drivers dahil sa liit na ng kanilang kinikita sa pamamasada.
Nabatid na nasa 400 hanggang 500 piso na lang ang kanilang naiuuwi o kinikita bunsod ng COVID-19 pandemic, walang puknat na pagtaas ng presyo ng langis at patuloy na bakbakan sa pagitan ng Russia at Ukraine.
Sinabi ni Suntay na sa susunod na linggo ay kanila nang ihahain ang kanilang hiling hinggil sa taas pasahe sa mga taxi.