Tinanggap na ng Security Guard na si Christian Floralde ang paghingi ng kapatawaran ng suv driver na sumagasa sa kanya.
Gayunman, hindi anya ito nangangahulugan na i-a-atras na niya ang kaso laban sa suspek na si Jose Antonio San Vicente, driver ng Toyota RAV4.
Nilinaw naman ni Floralde na wala pa silang “out of court settlement” ni San Vicente dahil isang beses pa lang niya nakausap ang abogado nito.
Aabot sa apat na milyong pisong halaga ng smuggled carrots ang nasabat ng mga tauhan ng Bureau of Customs (BOC) sa Manila International Container Port (MICP).
Ayon sa BOC, sa isinagawang inspection, napag-alaman na nakapangalan sa Silverpop Dry Goods Trading ang mga nasabing kargamento na sinasabing naglalaman ng “steamed buns.”
Nabatid na inisyuhan ng alert order ng District Collector ang 2×40 containers na ngayon ay isinasailalim na examination.
Nag-isyu na rin ang ahensya ng Violation of Section 117 o ang Regulated Importation and Exportation at Section 1400 o ang Misdeclaration, Misclassification, Undervaluation in goods Declaration in Relation to Section 1113 o ang Property Subject to Seizure and Forfeiture ng Customs Modernization and Tariff Act.
Aminado si dating Agriculture Secretary na wala na siyang planong bumalik sa gobyerno.
Sa panayam ng DWIZ kay Manny Piñol, inihayag nitong ginawa na niya ang kanyang makakaya bilang isang lingkod-bayan.
Sa kabila nito, bukas naman siyang tumulong kung kina-kailangan.
Dapat pag-aralan ng gobyerno kung paano magiging mas produktibo ang sektor ng agrikultura.
Ito lamang ang nakikitang paraan ni Undersecretary Bernie Cruz, outgoing acting Secretary ng Department Agrarian Reform (DAR) upang makaiwas ang bansa sa nagbabadyang food crisis.
Kung tututukan anyang maigi ang food production, sa halip na importasyon at i-mo-modernize ang farming technology ay tiyak na makatutulong ito upang matiyak ang supply ng pagkain.
Kinatigan din ni dating Agriculture Secretary ang pahayag ni Cruz at bagaman kakayaning ibaba ang presyo ng bigas at kada kilo ng palay, malaking halaga ng subsidiya ang igugugol ng gobyerno na malabo ring mangyari dahil sa epekto ng pandemya sa government funds.
Sina DAR Undersecretary Bernie Cruz at dating DA Secretary Manny Piñol, sa panayam ng DWIZ.
Halos dalawang buwan simula nang gumuho ang Clarin Bridge na ikinasawi ng apat katao sa bayan ng Loay, isa na namang steel bridge sa lalawigan ng Bohol ang nag-collapse, kahapon.
Isang 12-wheeler truck na kargado ng buhangin ang dumaan sa Borja Bridge sa bayan ng Catigbian dahilan upang gumuho ang tulay.
Ayon sa Catigbian Municipal Police, hindi naman nasugatan ang driver ng truck na si Nemercio Paredes, 46 anyos, residente ng bayan ng Calape, nang dumaan sa tulay sa Barangay Alegria.
Kagagaling lamang ni Paredes sa Barangay De La Paz, Cortes at patungong bayan ng Alicia nang gumuho ang tulay, pasado ala syete kahapon.
Inihayag naman ni Provincial Engineer Camilo Gasatan na overloading ang dahilan nang pag-collapse ng Borja Bridge.
Aabot lamang anya sa 20 tons ang limit nito pero umabot sa 46.4 tons ang bigat ng truck na dumaan.
Samantala, hindi pa inaalis ang truck sa naturang lugar at nakatakda itong hilahin gamit ang heavy equipment ngayong araw.
Binigyan na ni Interior Secretary Eduardo Año ang Cebu provincial government ng hanggang weekend upang ituwid ang kontrobersiyal na Executive Order (EO) nito sa optional na pagsusuot ng face mask sa open spaces.
Ayon kay Año, pinag-aaralan nilang sampahan ng kaso si Cebu Governor Gwendolyn Garcia hinggil sa inisyu nitong EO 16 kung mabibigong itama ang naturang kautusan.
Gagawin muna anya nila ang lahat ng remedyo pero kung hanggang sa weekend ay walang mangyayari ay mapipilitan na silang gumawa ng ligal na aksyon.
Nilabag umano ng provincial government ang EO 51, Series of 2021 hinggil sa nationwide implementation ng alert level system for COVID-19 response at guidelines na ipinatutupad sa ilalim nito.
Una nang inaprubahan ng Cebu Provincial Board ang isang ordinansa na nag-adopt sa EO 16 ni Garcia, sa ikatlo at ika-apat na pagbasa, sa isang special session noong Martes.
Inihayag din ng gobernador na hindi niya kinikilala ang resolusyon Ng Inter-Agency Task Force (IATF) sa mandatory na pagsusuot ng face masks bilang batas habang hindi rin kinikilala ng national government ang kanyang EO.
Hinimok ng Inter-Agency Council on Traffic (I-ACT) ang mga jeepney driver at operator na ikunsidera ang kanilang planong mag-tigil-pasada sa gitna ng tumataas na presyo ng mga produktong petrolyo.
Ayon kay I-ACT Chief Charlie del Rosario, sa halip na tumigil sa pamamasada, dapat magkaloob ng “serbisyo publiko” ang mga operator at driver sa mga commuter at kumilos alinsunod sa kanilang prangkisa.
Ibina-balanse naman anya ng Land Transportation Franchising and Regulatory Board (LTFRB) ang ekonomiya at pangangailangan ng mga tsuper at mananakay sa pamamagitan ng pag-apruba sa pisong provisional increase sa minimum fare.
Iginiit ng mga transport group na dagdagan pa ang pasahe lalo’t palaki nang palaki ang gastos nila sa krudo habang lumiliit ang kanilang kita kada araw.
Hinikayat naman ni del Rosario ang mga transport group na bigyan pa ng kaunting panahon ang pamahalaan na magdesisyon sa hirit na panibagong fare hike dahil taumbayan ang mahihirapan kung agaran ang pagpapasya.
Una nang inihayag ng LTFRB na kanilang dedesisyunan ang hiling na panibagong dagdag-pasahe bago magtapos ang termino ni Pangulong Rodrigo Duterte sa Hunyo a – 30.
Tatlo sa bawat 10 Filipino o 34% ang naniniwalang humirap ang kanilang pamumuhay sa nakalipas na isang taon.
Batay ito sa Social Weather Stations (SWS) survey sa 1,440 respondents noong April 19 hanggang 27.
Lumabas din sa survey na 32% ng mga respondent ang nagsabing bumuti ang kanilang pamumuhay habang 34% pa ang nagsabing walang nagbago.
Ang nasabing bilang ay mataas ng 14 points sa negative 16 noong December 2021.
Gayunman, kapos ito ng 20 points o below pre-pandemic level na “very high” +18 na naitala noong December 2019.
Umabot sa 425 ang karagdagang COVID-19 cases ang naitala ng Department of Health (DOH) kahapon.
Ito na sa ngayon ang pinaka-mataas na daily tally sa nakalipas na dalawang buwan simula nang makapagtala ng 690 new infections, noong April 3.
Dahil dito, bahagya pang umakyat sa 3,462 ang aktibong kaso kahapon mula sa 3,211 noong Miyerkules habang sumampa na sa 3,694,529 ang total cases.
Nangunguna pa rin ang National Capital Region (NCR) sa may pinaka-mataas na bagong kaso na 1,761 sa nakalipas na dalawang linggo na sinundan ng Calabarzon, 518; Central Luzon, 277; Western Visayas, 266 at Central Visayas, 136.
Nanindigan ang Philippine National Police (PNP) na walang ligal na batayan para isailalim sa kanilang kustodiya ang SUV driver na suspek sa pag-hit-and-run ng isang guwardya sa Mandaluyong City dahil sa kawalan ng warrant of arrest.
Ipinaliwanag ni PNP Spokesperson, Col. Jean Fajardo na wala na sa kanilang control kung magkakaroon ng out-of-court settlement ng biktimang si Christian Floralde at suspek na si Jose Antonio San Vicente.
Hindi na anya ito subject for warrantless arrest dahil mahabang panahon na ang lumipas simula nang mangyari ang insidente.
Sa kabila ng kawalan ng warrant of arrest, iginiit ni Fajardo na nangako si Atty. Danilo Macalino na ang suspek na si Jose Antonio San Vicente ay haharap sa mga kaso at sasagutin ang mga akusasyon laban sa kanya ngayong araw.