NATIONAL NEWS

 Fully vaccinated na kontra COVID-19 ang mahigit 3.1 milyong mga batang edad lima hanggang labing isa.

Batay sa pinakahuling datos mula sa The National Task Force against COVID-19, ang naturang bilang ay katumbas ng halos 22.5% target para sa nasabing age group.

Kabilang sa mga hamon sa vaccine rollout ay dahil ilan sa mga magulang ay duda pa rin sa kaligtasan ng COVID-19 vaccines.

Pinayuhan naman ni Dr. Rontgene Solante, isang Infectious Disease Specialist, ang mga magulang na pabakunahan na ang kanilang mga anak lalo’t may presensya ng mas nakakahawang Omicron subvariants sa bansa.

Isinapubliko ng Davao-based Designer na si Silverio Anglacer ang outline ng susuoting damit ni Vice-President-elect Sara Duterte sa kanyang inagurasyon sa Linggo.

Sa isang Facebook post, ibinahagi ni Anglacer ang illustration ng Filipiniana gown kung saan naka-outline ng kulay berde ang kaliwang bahagi ng gown.

Si Anglacer rin ang nag-disenyo ng asul na Filipiniana ng incoming VP noong manumpa ang kanyang ama na si outgoing President Rodrigo Duterte noong 2016.

Idaraos sa san Pedro Square sa Davao City ang inagurasyon ni Inday Sara bilang ika-15 bise presidente ng Pilipinas.

Posibleng abutin pa ng tatlo hanggang apat na buwan bago makapagpasya ang Food and Drug Administration ukol sa pagbabakuna sa mga batang edad lima pababa.

Ito ang sinabi ni Vaccine Expert Panel Chairperson Dr. Nina Gloriani, dahil mahaba ang proseso ng evaluation ng mga eksperto sa bakunang gagamitin.

Aniya, karaniwang nasa 40 araw ang evaluation process pero maaari pa itong tumagal kung kulang pa ang mga datos.

Paliwanag ni Gloriani, tinitignan kasi sa pagsusuri ang safety, immunogenicity at efficacy o protection ng bakunang gagamitin.

Isinara simula kaninang umaga sa trapiko ang Edsa Timog Avenue fly over Southbound Lane sa Quezon City.

Kasunod na rin ito ng mga nakitang butas at bitak sa nasabing fly over.

Ayon kay Engr. Christian Lirios ng Department of Public Works and Highways (DPWH) NCR 2nd Engineering District Major Rehabilitation ang gagawin sa Edsa Timog Avenue fly over kung saan una na silang nagre-retrofit ng girders.

Una nang isinara kagabi ang bahagi ng nasabing fly over matapos i-repair ng mga tauhan ng DPWH ang isang butas na nakita rito.

Nagdulot ng matinding trapiko ang pagsasara ng fly over bagama’t bukas naman sa trapiko ang busway.

Nananatiling lubog sa tubig baha ang ilang bahay sa Malabon City matapos masira ang North Muzon/Dampalit Floodgate ng Metropolitan Manila Development Authority (MMDA) na sinabayan pa ng high tide sa Dampalit River.

Kabilang sa mga baha pa rin sa nakalipas na limang araw na ayon sa Malabon Disaster Risk Reduction and Management Office ang mga barangay ng Dampalit, Muzon, Ibaba, Hulong Duhat, Flores, Bayan-Bayanan, Baritan, Concepcion, San Agustin at Tanyong.

Ipinabatid pa ng mmda na bukod sa north muzon floodgate, nasira rin ang tanza navigational gate nila.

Inaasahang lkalimang araw maayos ang Muzon/Dampalit Gate at sampung araw naman sa Tanza Floodgate.

Sumipa pa ang kita ng sektor ng turismo sa nakalipas na taon.

Ipinabatid ng Philippine Statistics Authority (PSA) na naitala sa 1 trillion pesos ang kita ng tourism sector na mas mataas ng mahigit siyam na porsyento kumpara nuong 2020 kung kailan nai record ang 917.2 billion pesos na kita.

Gayunman, sinabi ng PSA na hindi nalampasan ng nasabing kita ng tourism sector nuong 2021 ang 2019 pre-pandemic record na 2.5 trillion pesos.

Umabot na sa 23,458 na bilanggo ang nabigyan ng unang booster shot laban sa COVID-19 sa Bureau of Corrections (BuCor).

Ito ang sinabi ni Dr. Henry Fabro ng BuCor Health Service na ito ay kumakatawan sa 54% ng populasyon ng mga nakatanggap na ng dalawang dose ng bakuna.

Sa nasabing bilang, pinakamarami ang naturukan sa New Bilibid Prison na nasa 9,300.

Sinundan ng Davao Prison and Penal Farm na nasa 5,100.

Habang higit 3,000 sa Correctional Institution for Women sa lungsod ng Mandaluyong.

Tiklo ang isang babae matapos makuhanan ng mahigit sampung milyong pisong halaga ng ilegal na droga sa ikinasang buy-bust operation sa Caloocan City.

Ayon sa mga otoridad, nasabat sa suspek ang nasa 1,600 na gramo ng hinihinalang shabu na nakasilid sa iba’t-ibang sukat ng plastic bag.

Nabatid na halos isang linggo nang tinitiktikan ng pulisya ang suspek bago ikinasa ang naturang operasyon.

Kasong paglabag sa Republic Act (RA) 9165 o comprehensive dangerous drug act of 2002 ang kinakaharap ng suspek.

 Itinanggi ng Philippine National Police (PNP) na personal na kilala ni Police Lieutenant General Vicente Danao Jr. ang pamilya ng suspek sa hit-and-run incident sa Mandaluyong City.

Tinukoy ni PNP Spokesperson Police Colonel Jean Fajardo ang San Vicente family, ang anak nito na si Jose Antonio na umano’y driver ng SUV na sumagasa at umabandona sa sucurity guard na si Christian Floralde noong June 5.

Ayon kay Fajardo, ang mga magulang ng suspek ang naghanap ng kakilala na pwede nilang makausap at makarating kay Chief PNP o OIC.

Matapos aniya ang mahigit isang linggo, lumabas sa publiko at nagsagawa ng press conference sa Camp Crame si Jose Antonio kasama ang kaniyang pamilya para ilabas ang kanilang panig.

Giit ni Fajardo na noong June 15 na press conference, personal na nakilala ni Danao ang mga San Vicente sa unang pagkakataon.

Muli din niyang sinabi na walang legal na basehan para arestuhin si Jose Antonio dahil wala pang warrant of arrest laban sa suspek mula sa korte para maisailalim sa kustodiya ng PNP.

Samantala, itinanggi din niya na nagbigay ang ahensya ng VIP treatment sa suspek.

Tuloy-tuloy pa rin ang mga patakaran na ipinatutupad sa mga pampublikong sasakyan kaugnay sa COVID-19.

Ito ang ipinaalala ni Inter-Agency Council on Traffic (I-ACT) Chief Charlie del Rosario para matiyak ang kaligtasan ng mga commuters sa banta ng virus.

Aniya, bawal pa rin ang mga nakatayong pasahero, pagkain, paggamit ng cellphone at dapat din aniyang laging naka-facemask.

May mga itinalaga namang mystery riders ang I-ACT upang mahuli ang mga lumalabag.