NATIONAL NEWS

Handang handa na ang mga paaralan para sa pagsisimula ng face to face classes sa Lunes, August 22.

Ayon kay Department of Education (DepEd) Spokesperson Michael Poa, nag-present aniya ang bawat regional director ng mapping na ginawa nila sa mga lugar sa paaralan.

Maliban dito, tiwala aniya ang mga ito na sapat ang mga pasilidad para sa mga estudyante sa pasukan.

Dagdag pa ni Poa na magpapatupad sila ng mga estratehiya tulad ng blended learning para sa mga lugar na walang sapat na silid-aralan at upuan.

Maliban dito, sinabihan na rin aniya nila ang mga regional directors na kung may kakulangan sa mga teaching materials na gagamitin lalo na sa magsasagawa ng blended learning ay agad makipag-ugnayan sa kagawaran.

Samantala, ipatutupad ang limang araw na in person classes sa 24,765 na pribado at pampublikong paaralan habang 29,721 naman ipatutupad ang blended learning modality.

Siniguro ng Department of Trade and Industry (DTI) na pag-aaralan nilang mabuti ang mga hiling na taasan ang presyo ng tinapay.

Sinabi ni DTI Assistant Secretary Ann Claire Cabochan, sa ngayon ay wala pa silang natatanggap na panibagong request para sa taas presyo mula sa mga baker.

Pero aniya, Mayo pa lamang ay bumababa na ang presyo ng trigo na ginagawang harina na pangunahing sangkap sa paggawa ng tinapay.

Isa ito aniya sa pagbabasehan ng ahensya sa pagdedesisyon sa hirit na taas presyo sa tinapay.

Magugunitang, ilang grupo ang humiling ng apat na pisong taas presyo sa Pinoy Pandesal at Pinoy Tasty kasunod ng inilabas na bagong SRP ng DTI at patuloy na pagtaas ng presyo ng asukal.

Halos dalawang buwang himas rehas ang Pilipinong nagbitbit ng walis tambo nang sugurin ng protesters ang US Capitol noong January 6, 2021.

45 araw ang sentensyang ibinaba ng US District Court kay Kene Brian Lazo na inaresto noong May 2021 sa kanyang bahay sa Norfolk, Virginia at pumasok sa plea agreement kaugnay sa misdemeanor cases.

Si Lazo ay kabilang sa libu-libong supporters ni dating US President Donald Trump na tinukoy ng FBI na kasama sa grupong iligal na pumasok sa US Capitol.

Nagpahayag na umano nang pagsisisi si Lazo sa kanyang partisipasyon sa paglusob sa US Capitol na ikinasawi ng lima katao.

Bukod sa misdemeanour, si Lazo ay nahaharap din sa kasong sexual battery sa isang bata sa Virginia, ilang buwan matapos ang insidente sa US Capitol.

Mahigit 22.5 milyong estudyante na ang nag-enroll para sa school year 2022-2023.

Sa nabanggit na bilang, 22.4 million ang mga nagpatala para sa formal education habang nasa 112,938 ang bilang para sa Alternative Learning System (ALS).

Sa datos mula sa Learner Information System ng Department of Education (DepEd) hanggang nitong August 18, mahigit 19.7 milyong mga estudyante ang nagpatala mula sa pampublikong paaralan, habang mahigit 2.6 milyon ang nasa pribadong eskwelahan.

Pinakamaraming naitalang enrollees mula sa Region 4-A, na may mahigit 3.2 milyong mag-aaral habang mahigit 2.4 milyon naman ay mula sa Region 3 at 2.3 milyon sa National Capital Region.

Magpapatuloy ang enrollment hanggang sa Lunes, Agosto 22, 2022, kung saan, maaaring magpatala sa pamamagitan ng in-person, remote, at dropbox.

Nasa ”full capacity” na ang mga wards at clinical areas ng Novaliches District Hospital sa Quezon City.

Maliban sa COVID-19, patuloy rin ang pagsirit ng mga kaso ng sakit gaya ng dengue, kaya’t nasagad na ang kapasidad ng naturang pagamutan.

Dahil dito, sinabi ng pamunuan ng ospital na maaantala ang pagtanggap nila ng mga pasyente at ang kanilang out-patient department ay tatanggap lamang ng pasyente batay sa limitadong schedule ng face-to-face at telemedicine na konsultasyon.

Pinayuhan rin nito ang publiko na sa ibang ospital na muna magtungo kung nangangailangan ng agarang lunas.

Mahigit 5,000 trabaho ang bubuksan sa mga International Cruise Ship at kailangang mapunan sa susunod na tatlong buwan.

Ipinabatid ito ng Department of Migrant Workers (DMW) kasunod na rin nang pagbubukas ng mga pantalan sa iba’t ibang bahagi ng mundo.

Ayon sa DMW, maraming Pinoy housekeepers, entertainers, cooks, plumbers at welders ang kailangan sa mga barko dahil halos wala nang Ukrainian seafarers dulot ng bakbakan pa rin ng Ukraine at Russia.

Ipatutupad ang total lockdown sa gusali ng senado sa Lunes, Agosto 22, kasunod ng pagpopositibo sa COVID-19 ng ilang mga senador.

Ayon kay Senate President Juan Miguel Zubiri, ipinag-utos na niya sa secretariat na magsagawa ng disinfection at masusing paglilinis sa lahat ng tanggapan sa senado.

Kaugnay nito, hindi muna papasukin ang mga empleyado ng senado, sa halip ay work from home muna sila sa lunes, at wala din munang sesyon.

Magbabalik naman ang sesyon ng senado sa Martes, Agosto23.

Mababatid na pitong senador na ang tinamaan ng COVID-19 simula nang magbukas ang 19th congress, kung saan marami sa mga ito ang na-expose sa kanilang mga staff at mga miyembro ng secretariat.—sa ulat ni Cely Ortega- Bueno

Sapat ang suplay ng pulang sibuyas hanggang sa Disyembre.

Ito ang inihayag ni General Manager Arnel Llamas ng katipunan ng mga samahang magsisibuyas sa Nueva Ecija base sa kanilang konsultasyon sa Bureau of Plant Indutry (BPI) dalawang linggo na ang nakalipas.

Pero, patuloy naman aniyang magkakaroon ng kakulangan sa suplay ng puting sibuyas.

Binigyang diin pa ni Llamas na nasa tatlong daan limampung libong sako ng sibuyas ang inani nila noong pebrero hanggang kalagitnaan ng Marso.

Sa nabanggit na bilang, 50 sako rito ay puting sibuyas.

Samantala, sinabi ni Llamas na nabenta na ang lahat ng puting sibuyas na nasa kanilang storage facilities noong nakaraang buwan.

Kapwa nagpositibo sa COVID -19 sina Senators JV Ejercito at Nancy Binay.

Si Ejercito ay nagpositibo sa RT-PCR test habang si Binay naman ay nagpositibo sa antigent test.

Sinabi ni Senador Ejercito na wala siyang nararanasang sintomas ng naturang sakit.

Samantala, ayon kay Senador Binay ay kasalukuyan siyang naka-home quarantine at mahigpit na sinusunod ang mga protocol.

Sa ngayon ay pitong senador na ang tinamaan ng COVID-19 simula nang buksan ang 19th congress, kung saan una nang nagpositibo sa sakit sina Senators Imee Marcos, Alan Peter Cayetano, Cynthia Villar, Grace Poe at Senate Majority Leader Joel Villanueva. —sa ulat ni Cely Ortega-Bueno (Patrol 19)