NATIONAL NEWS

Sapat ang suplay ng pulang sibuyas hanggang sa Disyembre.

Ito ang inihayag ni General Manager Arnel Llamas ng katipunan ng mga samahang magsisibuyas sa Nueva Ecija base sa kanilang konsultasyon sa Bureau of Plant Indutry (BPI) dalawang linggo na ang nakalipas.

Pero, patuloy naman aniyang magkakaroon ng kakulangan sa suplay ng puting sibuyas.

Binigyang diin pa ni Llamas na nasa tatlong daan limampung libong sako ng sibuyas ang inani nila noong pebrero hanggang kalagitnaan ng Marso.

Sa nabanggit na bilang, 50 sako rito ay puting sibuyas.

Samantala, sinabi ni Llamas na nabenta na ang lahat ng puting sibuyas na nasa kanilang storage facilities noong nakaraang buwan.

Kapwa nagpositibo sa COVID -19 sina Senators JV Ejercito at Nancy Binay.

Si Ejercito ay nagpositibo sa RT-PCR test habang si Binay naman ay nagpositibo sa antigent test.

Sinabi ni Senador Ejercito na wala siyang nararanasang sintomas ng naturang sakit.

Samantala, ayon kay Senador Binay ay kasalukuyan siyang naka-home quarantine at mahigpit na sinusunod ang mga protocol.

Sa ngayon ay pitong senador na ang tinamaan ng COVID-19 simula nang buksan ang 19th congress, kung saan una nang nagpositibo sa sakit sina Senators Imee Marcos, Alan Peter Cayetano, Cynthia Villar, Grace Poe at Senate Majority Leader Joel Villanueva. —sa ulat ni Cely Ortega-Bueno (Patrol 19)

Hindi pa rin nakikita hanggang ngayon ang 22 anyos na si Jovelyn Galleno na huling nakita sa loob ng Robinson’s Mall sa Puerto Princesa, Palawan.

Ayon sa mga otoridad, noong Agosto 5 pa huling nakita ang dalaga bago ito maglaho na parang bula.

Bukod sa pagpapa-blotter sa barangay sa pagkawala ni Jovelyn, humingi na rin ng tulong ang pamilya nito sa pulisya para mahanap ang dalaga.

Ang kuha ng mga CCTV camera sa Robinson’s ang isa sa ginagamit na batayan ng mga otoridad, upang malaman kung ano ang nangyari sa dalaga.

Sa ngayon, isang resolusyon na ang inihain ni Gabriela Party-List Rep. Arlene Brosas sa kamara upang imbestigahan ang sunod-sunod na pagkawala ng ilang indibidwal sa bansa.

Aabot sa 50 pamilya sa Pasay City ang nawalan ng tirahan matapos ang sunog kagabi.

Ayon sa Bureau of Fire Protection (BFP), 13 bahay ang naapektuhan ng sunog na naganap sa Dimasalang Street, Barangay 113.

Tumagal ng mahigit isang oras ang sunog at umakyat sa ikalawang alarma bago naapula dakong alas-8:15 kagabi.

Tinitignang anggulo ng BFP sa dahilan ng pagkalat ng apoy ang naiwanang nakasaksak na electric fan.

Wala namang nasawi o nasugatan habang tinaya sa 125,000 pesos ang halaga ng mga natupok o napinsalang ari-arian.

Nakapagtala ang Department of Health (DOH) ng 3,758 bagong nahawa sa COVID-19 sa bansa kahapon.

Ayon sa DOH, bahagyang tumaas ang active cases na nasa 36,115 kumpara sa 35,101 noong Miyerkules.

Nadagdagan naman ng 2,703 ang mga gumaling, kaya’t umabot na sa 3,747,372 ang recoveries.

Ang COVID-19 death toll ay tumungtong na sa 61,221 matapos madagdagan ng 48 kahapon.

Sa ngayon, umakyat na sa 3,844,708 ang total case load sa bansa.

Aabot sa 2.5 milyong Pilipino ang na-aapektuhan ng water service interruption na kadalasang ipinatutupad sa Metro Manila, Bulacan at Cavite.

Kadalasang alas-11:00 ng umaga hanggang hapon nawawalan ng tubig sa Quezon City habang umaga hanggang hapon sa ilang lugar sa Maynila, Malabon, Makati, Las Piñas at Caloocan.

Sa Cavite, may ilang lugar na umaabot sa 16 na oras ang water interruption, habang 14 na oras itong umaabot sa ilang parte ng Pasay, Parañaque at Makati.

Ipinaliwanag naman ng Maynilad na kailangang punuin ang mga reservoir dahil lumakas ang konsumo sa tubig ng mga costumer tuwing peak hours.

Handa namang magpaliwanag ang pamunuan ng naturang water concessionaire sa problema na posibleng sa susunod na taon pa masosolusyunan.

Nakapagtala ang PHIVOLCS ng 19 pang pagyanig sa Bulkang Taal sa Batangas, sa nakalipas na 24 oras.

Ayon sa PHIVOLCS, tumagal ng dalawa hanggang limang minuto ang pagyanig.

Nagbuga rin ng 5,119 tons ng sulfur dioxide ang bulkan na umabot sa 1,500 ang taas.

Sa kabila nito, nananatiling sa ilalim ng alert level 1 ang Taal Volcano at ipinagbabawal pa rin ang pagpasok sa 4-kilometer danger zone nito.

Nagpaalala ang Department of Trade and Industry (DTI) sa mga magulang at consumers na bumibili ng school supplies para sa pagbubukas ng klase sa Lunes.

Ayon kay Trade Consumer Protection Group Assistant Secretary Ann Cabochan, dapat gawing gabay ng mga mamimili ang suggested retail price (SRP) kapag bumibili ng pagkain at kagamitan.

Dito anya makikita kung anong klaseng gamit ang kanilang bibilhin depende sa brand.

Sa panibagong SRP list na inilabas ng DTI, nasa 17 hanggang 34 pesos na ang presyo ng kada isang notebook, 8 hanggang 27 pesos ang lapis at 4 hanggang 19 pesos sa ballpen.

Ang isang kahon naman ng krayola ay nasa 18 hanggang 27 pesos habang ang pantasa ay 14 hanggang 54 pesos.

Tiniyak ng Department of Human Settlements and Urban Development (DHSUD) ang pagtugon sa backlog sa pabahay sa bansa na aabot sa anim na milyong unit.

Ayon kay DHSUD Secretary Jose Rizalino Acuzar, ang pagbibigay ng disente at ligtas na human settlements o township sa mga Pilipino ang pangunahing prayoridad ng administrasyong Marcos.

Kasama rin ang pagkakaroon ng maayos na waterways sa mga high-risk coastal communities na kasalukuyang tinitirhan ng mga informal settler families.

Umapela naman sa kongreso si Acuzar na isama sa panukalang 2023 National Budget ang 36 billion pesos na housing interest subsidy bawat taon, na magsisilbing mekanismo sa produksyon ng pabahay.

Kabilang sa master plan o blueprint ng overall development plan ng bansa ang human settlements at urban development, imprastraktura at mga basic services.

Itinanggi ng Philippine National Police (PNP) na tumataas na ang insidente ng kidnapping sa bansa.

Ito ang binigyang-diin ni PNP Spokesperson, Col. Jean Fajardo sa gitna ng magkakasunod na ulat na lumalabas sa social media hinggil sa pagkawala ng ilang tao sa Bulacan, Palawan, Cebu, Parañaque at Batangas.

Ayon kay Fajardo, batay sa imbestigasyon ay kusang umalis ng bahay ang dalawang bata sa Bulacan, matapos mapagalitan at nag-overnight sa kaibigan ang pangalawa.

Sa insidente naman ng dalagitang natagpuang patay sa Bustos at pagpatay sa babaeng engineer sa Bulacan na nahuli naman na anya ang mga suspek kaya hindi ito itinuturing na kidnapping.

Tiniyak naman ni Fajardo na mabilis nang inaaksyunan ng PNP ang lahat ng kaso ng napaulat na nawawala, at walang dapat na ika-alarma rito ang publiko.