NATIONAL NEWS

Pinaigting pa ng Civil Aviation Authority of the Philippines (CAAP) ang paghahanda nito kaugnay sa bagyong Florita bago ang landfall nito.

Kasunod na rin ito ng direktiba ni CAAP Director General Captain Manuel Antonio Tamayo sa area managers sa mga paliparan sa Regions 1 at 2 na buhayin ang mga panuntunan nito kapag may bagyo para na rin sa kaligtasan ng lahat.

Tiniyak ni Tamayo ang mahigpit na pagtutok ng airport managers sa pag monitor at pag-i-inspeksyon sa kani kanilang nasasakupan. —sa ulat ni Raoul Esperas (Patrol 45)

Matapos ang pitong linggong sunod-sunod na oil price rollback, asahan na bukas ang dagdag-singil sa presyo ng produktong petrolyo.

Ayon sa ilang kumpaniya ng langis, posibleng umabot sa P2 hanggang P2. 20 sentimo ang magiging dagdag-singil sa presyo ng kada litro ng diesel at kerosene.

Papalo naman sa .10 hanggang .30 sentimo ang maaaring madagdag sa presyo ng kada litro ng gasolina.

Sa pahayag ni Department of Energy (DOE) Oil Industry Management Bureau Assistant director Rodela Romero, ang diesel at kerosene ay maaaring tumaas ng mahigit P2 kada litro, habang ang gasolina naman ay maaaring bahagyang tumaas ng higit o mas mababa sa .25 sentimo kada litro.

Ayon kay Romero, ang inaasahang paggalaw sa presyo ng produktong petrolyo ay maaari pa umanong magbago depende sa kalalabasan ng kalakalan sa world market.

Umarangkada na ngayong araw ang pagsisimula ng face-to-face classes matapos ang dalawang taong implementasyon ng distance learning bunsod ng COVID-19 pandemic.

Ayon kay Department of Education (DepEd) spokesman Michael Poa, may kabuuang 24, 175 na paaralan ang magpapatupad ng limang araw na pasok para sa face-to-face classes; 29, 721 na paaralan ang magdaraos ng klase sa pamamagitan ng blended learning na mayroong three day in-person classes kada linggo; habang mahigit 1K paaralan naman ang hindi kasama sa pagbabalik-eskwela ng mga mag-aaral.

Nilinaw ni Poa na ang distance learning ay para lamang sa mga naapektuhan ng mga kalamidad, tulad ng magnitude 7 na lindol na tumama sa Northern Luzon.

Matatandaang una nang iniutos ni DepEd chief at Vice President Sara Duterte-Carpio sa lahat ng paaralan na bumalik na sa normal na klase ang mga estudyante sa Nobyembre a-2 pero maaari umanong magbigay ng mga exemption sa mga “specific areas.”

Binuksan na para sa mga motorista ang ilan pang pangunahing kalsada sa Metro Manila partikular na sa Northbound at Southbound Lane ng Ninoy Aquino Avenue malapit sa Imelda Bridge sa Parañaque City.

Matatandaang isinara ang naturang kalsada dahil sa pagpapatuloy ng konstruksyon ng Ninoy Aquino Station ng LRT 1 Cavite Extension Project.

Ayon kay Parañaque City Traffic and Parking Management Office (TPMO) head Rey Murillo, madaraanan na ng mga motorista ang ilang bahagi sa nabanggit na lugar makaraang matapos ang nasabing proyekto.

Nabatid na nagtulong-tulong ang Parañaque TPMO at ang Parañaque Public Information Office o Parañaque-PIO kasama ang iba pang departamento ng lokal na pamahalaan para talakayin ang solusyon upang hindi mahirapan ang mga motorista sa kanilang pagbiyahe dahil sa pagsasara ng nabanggit na kalsada.

Inaasahang magsisimula ang operasyon ng LRT 1 Cavite Extension Project sa taong 2024 kung saan mayroon itong walong station mula Baclaran, Parañaque City hanggang Bacoor, Cavite.

Kumpiyansa ang Philippine National Police (PNP) na magiging mapayapa ang pagbabalik eskwela ng mga estudyante ngayong araw.

Ayon sa PNP Public Information Office chief Police Brig. General Roderick Augustus Alba, titiyakin ng kanilang ahensya na handa ang mga kapulisan para sa seguridad at kaligtasan ng mga mag-aaral maging ng mga guro na lalahok sa face-to-face classes.

Sinabi ni Alba na nagdeploy na sila ng mga pulis para magbantay sa mga paaralan at sa lahat ng academic institutions sa buong bansa para sa “Ligtas Balik Eskwela 2022.”

Bukod pa dito, inilatag narin ng ahensya ang mga Police Assistance Desks at Police Visibility sa mga terminal at iba pang points of convergence.

Samantala, muli namang nanawagan ang PNP sa mga magulang at guardians na paalalahanan ang kanilang mga anak hinggil sa Do’s and Don’ts o ang mga dapat at hindi dapat gawin kapag sila ay nasa loob ng paaralan.

Dinagsa ng mga mamimili ang ilang nagtitinda ng school supplies sa Divisoria, Maynila.

Ito ay para bumili ng mga gamit sa kasabay ng pagsisimula ng face-to-face classes ngayong araw.

Sa pag-iikot ng DWIZ kaninang madaling araw sa Divisoria, pinaka maraming binibili ng mga mamimili sa last minute ang mga note book, bags, blouse, at sapatos  na kakailanganin ng kanilang mga anak sa unang araw ng klase.

Nagbagsak presyo narin ang mga nagtitinda ng school supplies para maubos ang kanilang paninda at makabawi sa kanilang puhunan.

Ayon sa mga mamimili, ngayon lang sila nagkaroon ng budget kaya naging siksikan sa mga pamilihan.

Pinapurihan ng Sugar Planters Groups ang pagtatalaga ni Pangulong Bongbong Marcos ng bagong Sugar Regulatory Administration acting Administrator at dalawa pang miyembro ng Board nito.

Kabilang sa mga nagpahayag ng suporta sina Enrique Rojas, Pangulo ng National Federation of Sugarcane Planters; Raymond Montinola, Pangulo ng Confederation of Sugar Producers at Danilo Abelita, Pangulo ng Panay Federation of Sugarcane Farmers.

Umaasa anila ang mga naturang grupo na pananatilihin ng mga bagong-talagang opisyal ang pagiging “consultative” ng SRA sa paggawa ng mga desisyon.

Kampante rin ang mga Sugar planter na mahigpit na i-mo-monitor ng mga bagong SRA official ang sugar supply at demand situation, at gagawa ng mga hakbang, tulad ng posibilidad ng pag-a-angkat ng karagdagang asukal.

Ito’y upang matiyak ang stable sugar supply at patas na presyo para sa mga consumer at producer.

Una nang itinalaga ni PBBM si David John Thaddeus Alba bilang SRA acting Administrator, Pablo Luis Azcona bilang Board Member na kumakatawan sa Sugar Planters at Maria Mitzi Mangwag bilang Board Member na kumakatawan sa sugar millers.

Nakatakda namang manumpa kay Pangulong Marcos ang mga bagong opisyal ng ahensya sa Malakanyang mamaya.