Posibleng magtaas ng presyo ng tinapay sa mga susunod na linggo.
Ayon ito kay Luisito Chavez, acting President ng Asosasyon ng Panaderong Pilipino, matapos gumalaw ang presyo ng mga sangkap sa paggawa ng tinapay partikular ang asukal.
Sinabi ni Chavez na hindi sapat kahit pa nabawasan ang presyo ng asukal dahil tumaas talaga ang iba pang sangkap tulad ng harina.
Inihirit ni Senador Nancy Binay sa Senado na pag-aralan ang dagdag na pondo sa Department of Education para sa libreng COVID-19 testing ng mga guro.
Binigyang-diin ng Senadora na dapat paglaanan ng pondo ang lahat ng mga kinakailangan ng mga paaralan upang matiyak na walang guro at mag-aaral na malalagay sa panganib ang kalusugan sa gitna ng COVID- 19 pandemic.
Una rito, inihayag ni DepEd Undersecretary Reysee Escobedo na nakikipag-ugnayan na ang mga Regional at Division offices nila sa mga lokal na pamahalaan at health units para sa sapat na suplay ng Antigen kit na maaaring magamit ng mga guro.
Sa gitna ito ng pag-amin ng opisyal, na maliit lamang ang pondong maaaring gamitin ng mga paaralan para sa COVID testing na manggagaling sa kanilang maintenance at iba pang operating expenses. —ulat mula kay Cely Ortega Bueno (Patrol 19)
Tiniyak ng National Capital Region Police Office (NCRPO) na tutugunan ng kanilang mga personnel ang mga idudulog na concern sa muling pagbubukas ng klase.
Sa panayam ng DWIZ, sinabi ni NCRPO spokesperson Lt. Col. Dexter Versola, mahigit 9k NCRPO personnel ang idineploy para sa pagbubukas ng klase ngayong araw, kung saan nasa 1, 653 na pulis ang itinalaga sa mahigit 500 assistance desks.
Maliban sa pagtiyak ng seguridad, sinabi ni Versola na magbibigay rin ang Police Community Group ng school supplies sa mga mahihirap estudyante.
Balik-trabaho na si Press Secretary Trixie Cruz-Angeles makaraang makarekober sa COVID-19 at makumpleto ang required days ng kanyang isolation.
Ayon kay Cruz-Angeles, negatibo na siya sa nakahahawang sakit batay sa resulta ng kanyang RT-PCR test.
Noong Agosto a-15 nang ianunsyo ng Press Secretary na nagpositibo siya sa COVID-19.
Samantala, pinaalalahanan naman ng Malakañang sa mga kukuha ng Educational aid mula sa Department of Social Welfare and Development na patuloy na sumunod sa health protocols kontra COVID-19.
Hiniling rin ni Cruz-Angeles na hangga’t maaari ay online appointment na lamang ang gawin sa pagkuha ng assistance tulad ng una nang ipinanawagan ng DSWD. —ulat mula kay Jopel Pelenio (Patrol 17)
Ibayong pag-iingat ang paalala ng National Disaster Risk Reduction and Management Council (NDRRMC) sa mga residente sa mga lugar na maaapektuhan ng Bagyong Florita.
Ito’y dahil sa posibleng maranasan na mga pagbaha, pagguho ng lupa, at malakas na hangin dulot ng naturang tropical depression.
Pinayuhan rin nito ang publiko na mag-antabay sa ulat panahon at sumunod sa mga abiso ng awtoridad.
Tiniyak naman ng NDRRMC na nakahanda sila, maging ang mga Regional DRRM Councils, mga ahensya ng pamahalaan at mga lokal na pamahalaan sa mga maaaring idulot ng nasabing bagyo.
Kaninang umaga ay itinaas ng pagasa ang Tropical Cyclone Wind Signal no. 1 sa Cagayan, Isabela, Quirino, Nueva Vizcaya, Apayao, Abra, Kalinga, Mountain Province, Ifugao, Ilocos Norte, Ilocos Sur, at Northern Portion ng Aurora.
Abiso sa mga motorista!
Matapos ang sunod-sunod na oil price rollback, asahan naman bukas, August 23, ang taas-presyo sa produktong petrolyo.
Ayon sa Pilipinas Shell Petroleum Corp., nasa P0.70 per liter ang madadagdag sa presyo ng gasolina, P2.60 sa kada litro ng diesel, at P2.80 naman sa kada litro ng kerosene.
Ipatutupad din ng Cleanfuel ang kaparehong halaga sa kanilang produkto, maliban sa kerosene.
Epektibo ang pagbabago sa presyo ng produktong petrolyo bukas ala-6 ng umaga, maliban sa Cleanfuel na magpapatupad ng price adjustment dakong alas-4:01 ng hapon.
Nabatid na ang umento sa presyo ng langis ay dahil sa paglaki ng pagbaba sa imbentaryo ng krudo ng Estados Unidos.
Pinaigting pa ng Civil Aviation Authority of the Philippines (CAAP) ang paghahanda nito kaugnay sa bagyong Florita bago ang landfall nito.
Kasunod na rin ito ng direktiba ni CAAP Director General Captain Manuel Antonio Tamayo sa area managers sa mga paliparan sa Regions 1 at 2 na buhayin ang mga panuntunan nito kapag may bagyo para na rin sa kaligtasan ng lahat.
Tiniyak ni Tamayo ang mahigpit na pagtutok ng airport managers sa pag monitor at pag-i-inspeksyon sa kani kanilang nasasakupan. —sa ulat ni Raoul Esperas (Patrol 45)
Naunsyami ang unang araw sana ng pagbabalik-klase ng mga estudyante sa pre-school hanggang Elementary sa lalawigan ng Cagayan.
Ito ang kinumpirma ni Governor Manuel Mamba dahil sa epekto ng Bagyong Florita sa Northern Luzon.
Ayon kay Mamba, prayoridad ang kaligtasan ng mga mamamayan, lalo ng mga bata laban sa epekto ng bagyo, gaya ng flashfloods at landslides.
Tinututukan din anya nila ang mga preparasyon para sa posibleng evacuation dahil sa posibleng pagland-fall ng bagyo.
Matapos ang pitong linggong sunod-sunod na oil price rollback, asahan na bukas ang dagdag-singil sa presyo ng produktong petrolyo.
Ayon sa ilang kumpaniya ng langis, posibleng umabot sa P2 hanggang P2. 20 sentimo ang magiging dagdag-singil sa presyo ng kada litro ng diesel at kerosene.
Papalo naman sa .10 hanggang .30 sentimo ang maaaring madagdag sa presyo ng kada litro ng gasolina.
Sa pahayag ni Department of Energy (DOE) Oil Industry Management Bureau Assistant director Rodela Romero, ang diesel at kerosene ay maaaring tumaas ng mahigit P2 kada litro, habang ang gasolina naman ay maaaring bahagyang tumaas ng higit o mas mababa sa .25 sentimo kada litro.
Ayon kay Romero, ang inaasahang paggalaw sa presyo ng produktong petrolyo ay maaari pa umanong magbago depende sa kalalabasan ng kalakalan sa world market.
Umarangkada na ngayong araw ang pagsisimula ng face-to-face classes matapos ang dalawang taong implementasyon ng distance learning bunsod ng COVID-19 pandemic.
Ayon kay Department of Education (DepEd) spokesman Michael Poa, may kabuuang 24, 175 na paaralan ang magpapatupad ng limang araw na pasok para sa face-to-face classes; 29, 721 na paaralan ang magdaraos ng klase sa pamamagitan ng blended learning na mayroong three day in-person classes kada linggo; habang mahigit 1K paaralan naman ang hindi kasama sa pagbabalik-eskwela ng mga mag-aaral.
Nilinaw ni Poa na ang distance learning ay para lamang sa mga naapektuhan ng mga kalamidad, tulad ng magnitude 7 na lindol na tumama sa Northern Luzon.
Matatandaang una nang iniutos ni DepEd chief at Vice President Sara Duterte-Carpio sa lahat ng paaralan na bumalik na sa normal na klase ang mga estudyante sa Nobyembre a-2 pero maaari umanong magbigay ng mga exemption sa mga “specific areas.”