NATIONAL NEWS

Nagpaalala si Pangulong Ferdinand “Bongbong” Marcos Jr. sa mga guro at estudyante na patuloy na sundin ang minimum health standards sa gitna ng muling pagbubukas ng klase para sa school year 2022-2023 ngayong araw.

 Ayon sa pangulo, ito ay dahil may banta pa rin ng COVID-19 sa bansa at importante aniya na masiguro ang kaligtasan ng bawat isa.

 Kaugnay nito, winelcome din ni Marcos Jr. ang pagbabalik-eskwela ng mga mag-aaral para sa face-to-face classes matapos ang dalawang taong online learning.

 Samantala, binigyang-diin ni Marcos Jr. na wala siyang pagdududa sa pamumuno ni Vice President at Education Secretary Sara Duterte sa  Department of Education (DEPED) na kung saan tiniyak nito ang makakatanggap ng de-kalidad na edukasyon ang mahigit 28.21 million na mag-aaral na nag-enroll sa K-12 program.

Posibleng bumaba sa 60 pesos kada kilo ang presyo ng asukal sa mga palengke ngayong linggo.

 Ito ang inihayag ni Department of Agriculture (DA) Senior Undersecretary Domingo Panganiban dahil maaaring maimpluwensyahan ng murang asukal sa mga supermarket ang bentahan nito sa mga pamilihan.

 Matatandaang ibinaba ng ilang supermarket ang presyo ng kada kilo ng asukal sa 70 pesos mula sa 100 pesos hanggang 115 pesos.

Kulang na silid-aralan at upuan ang sumalubong sa mga mag-aaral ngayong pasukan.

 Ito’y ayon kay Benjo Basas, Chairperson ng Teacher’s Dignity Coalition (TDC).

 Sa panayam ng DWIZ, sinabi ni Basas na maituturing na extreme case ang paghahati ng klase sa tatlong shift upang matugunan ang problema sa pag-sisiksikan ng mga estudyante sa mga silid-aralan.

 Matatandaang nasa 28 milyong estudyante ang nag-enroll ngayong pasukan matapos ang dalawang taon ng distanced o online learning.

 Tinitingnan din ni Basas ang option ng paglilipat ng mga estudyante sa ibang silid at pagdadagdag ng dalawa pang palapag sa mga eskwelahan bagama’t mas praktikal na magtayo ng panibagong gusali para sa mga estudyante.

 Kasabay nito, nananawagan si Basas ng dagdag na allowance para sa mga guro. –  sa panulat ni Hannah Oledan

Pinapawalang saysay ng Public Attorney’s Office (POA) sa pangunguna Atty. Persida Acosta at Atty. Larry Gadon ang direktiba ng Commission on Higher Education (CHED).

Kaugnay ito sa pag-oobliga ng CHED na magpabakuna ang mga estudyante sa kolehiyo para maisagawa ang face-to-face classes.

Iginiit naman Gadon na labag sa batas ang paghihigpit ng CHED laban sa mga hindi ba kumpleto ang bakuna laban sa COVID-19. –  sa ulat ni Tina Nolasco (Patrol 11) at sa panulat ni Hannah Oledan

Nanawagan ang isang grupo para sa total system upgrade at privatization ng Edsa busway at bus service, at privatization ng mga commuter railway system.

 Ito ay para mapabuti ang karanasan ng mga commuter sa Metro Manila.

 Ipinanukala ng Management Association of the Philippines (MAP) ang pagtataas ng kapasidad ng busway station platforms para ma-accommodate ang mas maraming commuters at magbigay daan sa sabay-sabay na pagdaong ng mga bus.

 Umapela rin ang MAP para sa pagtatayo ng mas maraming istasyon para ma-isara ang mga agwat sa pagitan ng mga istasyon at footbridge para masubaybayan ang pagtatayo ng mga nai-donate na footbridge.

 Itinulak din ng grupo ang pag-o-augment ng mga sasakyan sa Edsa carousel, MRT-3, LRT-1 at LRT-2, at ang Philippine National Railway (PNR).

 Nanawagan din ang MAP kay Pangulong Ferdinand Marcos Jr. na mag-isyu ng executive order na magmamandato sa mga relevant agency na sundin ang national transport plan ng 2017.

 Sa ilalim ng panukala, sinabi ng grupo na ipa-prioritize ng gobyerno ang mobilidad ng publiko sa pamamagitan ng Public Transportation at Active Mobility tulad ng paglalakad, pagbibisikleta sa pamamagitan ng paglalaan ng mga espasyo sa kalsada para sa naturang mga layunin.  – sa panulat ni Hannah Oledan

Napaghandaan ngunit hindi na-anticipate ng Department of Social Welfare and Development (DSWD) ang pagdagsa ng mga nais makakuha ng educational assistance sa kanilang tanggapan noong Sabado.

Sa panayam ng DWIZ, sinabi ni DSWD Secretary Erwin Tulfo na na-overwhelm sila sa pagdagsa ng mga tao sa unang araw ng pagbibigay ng cash assistance.

 Samantala, inihayag ni Tulfo na aayusin nila ni Department of Interior and Local Government (DILG) Secretary Benjamin Abalos Jr. ang sistema ng pamimigay ng cash assistance para sa mas maayos na pamimigay ng ayuda. - sa panulat ni Hannah Oledan

Nananatiling nasa moderate risk sa COVID-19 ang National Capital Region (NCR) bagama’t bumaba na ng 15% ang mga bagong kaso kumpara noong nakaraang linggo.

 Ayon sa OCTA Research, ang Metro Manila ay kasalukuyang may 7-day average na 1,055 na kaso o Average Daily Attack Rate (ADAR) na 7.32 sa bawat 100,000 na indibidwal.

 Sinabi ni OCTA Research Fellow Guido David na ang one week growth rate ng mga bagong kaso sa rehiyon ay nasa -15% noong August 21 kumpara sa -1% noong August 14.

 Kaugnay nito, bumaba rin ang reproduction number sa rehiyon sa 1.03 noong August 18 mula sa 1.11 noong August 11

 Ganoon din ang positivity rate sa NCR na bumaba sa 14.6% noong August 20 mula 16.3% noong August 13.

 Sinabi rin ni David na nasa 37% ang healthcare utilization habang ang occupancy rate naman ay nasa 30%.

 Samantala, nakapagtala ang Pilipinas ng 3,855,804 na kumpirmadong kaso ng COVID-19 kung saan 35,271 ang aktibong kaso at 3,759,176 ang nakarekober. –  sa panulat ni Hannah Oledan

Nananatiling positibo sa red tide o paralytic shellfish poison ang tatlong coastal areas sa Visayas at Mindanao.

Batay ito sa isinagawang test na ng Bureau of Fisheries and Aquatic Resources (BFAR).

Mababatid na noong Agosto 18 ay nagbabala ang BFAR sa publiko na hindi ligtas kainin ang lahat ng uri ng shellfish at acetes o alamang mula sa coastal waters ng Dauis at Tagbilaran City sa Bohol; Dumanquillas Bay sa Zamboanga Del Sur; at Lianga Bay sa Surigao Del Sur.

Sinabi naman ng BFAR na ligtas  kainin ang mga isda, pusit, hipon at alimango basta huhugasan at lulutuing mabuti ang mga ito.

Tiwala si Pangulong Ferdinand Marcos Jr., na mas malaki ang makukuhang karunungan ng mga estudyante sa loob ng silid-aralan dahil personal na matuturuan ito ng mga guro.

Ginawa ng punong ehekutibo ang pahayag kasabay ng pagbabalik ng face-to-face classes ngayong araw ng mga mag-aaral matapos ang dalawang taong online learning dahil sa COVID-19 pandemic.

Batid ng pangulo na naririyan pa rin ang banta ng virus, kaya’t importante aniya na sundin ng mga guro at mag-aaral ang minimum health protocols para mapanatili ang maayos na kalusugan habang nag-aaral.

Kumpyansa rin ang  pangulo na sa ilalim ng pamumuno ni Vice President Sara Duterte sa Department of Education (DepEd), na makakamit ng enrolled students ng k-12 system, ang kalidad na edukasyon.

Nagbukas ng tig-isang gate ang dalawang dam sa Luzon dahil sa inaasahang mas maraming pag-ulan na dulot ng Bagyong Florita.

Ayon sa PAGASA, nasa 0.30 meter ang binuksan sa isang gate sa Binga Dam sa Benguet kaninang ala-6 ng umaga.

Ito’y matapos umabot sa 574.43 meters ang o RWL ng Dam, na malapit na sa 575-meter spilling level o normal high water level.

Samantala, binuksan din ang isang gate ng Magat Dam sa 0.50 meter kaninang umaga.

Umabot sa 187.10 meters ang RWL ng Magat Dam, na ilang metro na lamang mula sa normal level na 190 meters.

Mababatid na itinaas ng PAGASA sa tropical cyclone wind signal no. 1 ang Cagayan, Isabela, at 10 pang mga lugar dahil sa naturang bagyo.