NATIONAL NEWS

Patuloy na minomonitor ng National Disaster Risk Reduction and Management Council (NDRRMC) katuwang ang kanilang regional offices at mga Lokal na Pamahalaan para sa posibleng epekto ng Bagyong Florita sa Luzon area.

Bukod sa close coordination sa mga Regional counterparts, pinag iingat din ng NDRRMC ang mga residenteng posibleng maapektuhan ng naturang bagyo.

Nagpaalala naman sa publiko ang naturang ahensya na makinig sa direktiba ng kani-kanilang Local Government Unit (LGUs) at kung sakaling lumala pa ang hagupit ng bagyo, mas mainam na lumikas nalang lalo na sa mga lugar na nakararanas ng pagbaha at pagguho ng lupa.

Mariing inatasan ng National Telecommunications Commission (NTC) ang lahat ng public telecommunications entities o telcos na tiyakin ang kahandaan sa pinsalang maaaring idulot ng bagyong Florita.

Batay sa inisyung memorandum ni NTC Commissioner Gamaliel Cordoba, ipinag-utos ng opisyal sa mga telco na siguruhing mayroong sapat na bilang ng technical at support personnel, standby generators na may extra fuel, at iba pang gamit sa mga lugar na apektado ng kalamidad.

Kasabay nito, pinamamadali rin ni Cordoba ang repair at restoration ng telecommunication services, partikular sa mga tinamaan ng bagyo.

Maliban dito, inatasan din ang mga network company na magtalaga ng libreng tawag at libreng charging stations sa mga apektadong lugar.

Nilinaw ni Infectious disease expert Dr. Edsel Salvana na walang indikasyon ng endemic ang monkeypox virus sa bansa.

Ayon kay Salvana, kung ikukumpara sa COVID-19, mas mabagal ang paglalabas ng sintomas ng monkeypox virus kung saan, karaniwan sa mga tinatamaan ay umaabot pa ng tatlong linggo bago lumabas ang sintomas.

Sa ibang bansa naitala ang endemic ng naturang sakit pero napatunayan na mayroong gamot para labanan ito.

Sinabi ni Salvana na mabagal man ang pagdetect ng naturang sakit, hindi ito masyadong nakakahawa kumpara sa COVID-19.

Iginiit naman ni Salvana na para maiwasan ang indikasyon na may asymptomatic spread ito, kailangang paigtingin ang health protocols at maging vigilante sa pag-detect nito.

Matatandaang una nang idineklara ng World Health Organization (WHO) ang public health international concern dahil sa pagtaas ng bilang ng tinatamaan ng monkeypox virus sa buong mundo.

Kinansela kahapon ang unang araw ng face-to-face classes ng walongdaang paaralan sa Northern Luzon.

Ayon sa Department of Education (DepEd) Central Office, hindi natuloy ang unang araw ng pagbabalik eskwela ng nasabing bilang ng mga eskwelahan dahil sa pananalasa ng Bagyong Florita.

Nabatid na ang pagkansela sa 800 paaralan ay kinabibilangan ng 705 pampublikong eskwelahan at 73 pribadong eskwelahan sa lalawigan ng Cagayan.

Mula sa naturang bilang, 29 public schools sa Tuguegarao City ang nakansela ang klase.

Nabatid na inilagay ng PAGASA sa Tropical Cyclone Wind Signal No. 2 ang Lalawigan ng Cagayan habang Tropical Cyclone Wind Signal No.  1 naman ang Ilocos Norte dahilan para kanselahin ang unang araw ng pagbabalik klase ng mga estudyante.

Aminado ang Department of Trade and Industry (DTI) na maging ang presyo ng iba pang consumer product ay apektado na rin ng pagtaas ng presyo ng asukal.

Kasunod ito ng ulat hinggil sa tumataas na presyo ng sago’t gulaman at ensaymada sa ilang pamilihan na gumagamit ng asukal sa kanilang paninda.

Sa naganap na Organizational meeting ng Senate Committee on Trade, Commerce, and Entrepreneurship, sinabi ni DTI Usec. Ceferino Rodolfo, na kabilang pa sa mga pruduktong gumagamit ng maraming asukal ay ang softdrinks, 3-in-1 coffee, pastry products, at mga fruit juice.

Samantala, ayon naman kay DTI Planning and Management Service director Robert Arceo, ang pagkain at non-alcoholic beverages ang pangunahing dahilan ng pagtaas ng inflation rate sa bansa o ang pagbilis ng pagtaas ng halaga sa mga pangunahing bilihin sa merkado.

Naniniwala naman ang DTI na malaking tulong sa pagpigil ng inflation rate ang mahigpit na pagpapatupad ng Suggested Retail Price (SRP) sa mga pangunahing bilihin.

Nananatili sa Severe tropical storm ang Bagyong Florita habang binabaybay ang hilaga-hilagang-kanluran patungong Isabela, Cagayan.

Namataan ang sentro ng Bagyong Florita sa layong 120 kilometers hilagang-silangan ng Casiguran Aurora na may lakas ng hanging aabot sa 95 kilometers per hour at pagbugsong aabot sa 115 kilometers per hour.

Ayon sa PAGASA, kumikilos ang bagyo pahilaga-hilagang-kanluran sa bilis na aabot sa 10 kilometers per hour.

Asahan naman na patuloy paring lalakas ang Bagyong Florita habang hinahatak ang hanging habagat na nakakaapekto sa Southern Luzon at Visayas.

Sakaling hindi magbago ang kilos ng Bagyong Florita, posible itong maglandfall sa East coast ng Isabela o Cagayan ngayong umaga o mamayang tanghali.

Sa ngayon, nakataas ang Tropical Cyclone Wind Signals No. 3 sa hilaga at silangang bahagi ng Mainland Cagayan kabilang na ang Santa Praxedes, Claveria, Sanchez-Mira, Pamplona, Abulug, Ballesteros, Lal-Lo, Baggao, Peñablanca, Gattaran, Aparri, Camalaniugan, Buguey, Santa Ana, Gonzaga, Santa Teresita at ang silangang bahagi ng Isabela kabilang na ang Maconacon, Divilacan, at Palanan.

Signal no. 2 naman sa nalalabing bahagi ng Cagayan kasama na ang Babuyan Islands, nalalabing bahagi ng Isabela, Quirino, Silangan at gitnang bahagi ng Nueva Vizcaya kabilang na ang Kayapa, Ambaguio, Solano, Villaverde, Bagabag, Diadi, Quezon, Bayombong, Bambang, Aritao, Dupax del Sur, Dupax del Norte, Kasibu, at Alfonso Castaneda.

Signal no. 2 din ang Apayao, Abra, Kalinga, Mountain Province, Ifugao, hilagang bahagi ng Benguet kabilang na ang Bakun, Kibungan, Buguias, Kabayan, Mankayan, Bokod, at Atok.

Sakop din ng Signal no. 2 ang Ilocos Norte, Ilocos Sur, hilaga at gitnang bahagi ng Aurora kabilang na ang Dilasag, Casiguran, Dinalungan, Dipaculao, Baler, at Maria Aurora.

Samantala, Signal no. 1 naman sa Batanes, nalalabing bahagi ng Nueva Vizcaya, nalalabing bahagi ng Benguet, La Union, Pangasinan, silangang bahagi ng Tarlac kasama na ang San Clemente, Camiling, Moncada, San Manuel, Anao, Santa Ignacia, Gerona, Paniqui, Ramos, Pura, Victoria, La Paz, City of Tarlac, at Concepcion.

Signal no. 1 din ang Nueva Ecija, nalalabing bahagi ng Aurora, silangang bahagi ng Pampanga, silangang bahagi ng Bulacan, silangang bahagi ng Rizal hilagang bahagi ng Quezon Province kabilang na ang Polillo Islands, hilagang bahagi ng Laguna at Camarines Norte.

Pangkalatahang naging maayos at walang aberya ang pagsisimula ng klase para sa School Year 2022-2023.

Inihayag ni Department of Education spokesman Michael Poa na wala pang natatanggap na ulat ang kagawaran ng anumang insidente kaugnay ng pagbubukas ng klase hanggang alas- 9:20 kahapon ng umaga.

Tiniyak naman ni Poa na patuloy ang kanilang monitoring sa mga paaralan.

Umabot sa 28 milyong mag-aaral ang nagbalik-eskwela sa unang araw ng School Year 2022-2023 kahapon.