Mariing inatasan ng National Telecommunications Commission (NTC) ang lahat ng public telecommunications entities o telcos na tiyakin ang kahandaan sa pinsalang maaaring idulot ng bagyong Florita.
Batay sa inisyung memorandum ni NTC Commissioner Gamaliel Cordoba, ipinag-utos ng opisyal sa mga telco na siguruhing mayroong sapat na bilang ng technical at support personnel, standby generators na may extra fuel, at iba pang gamit sa mga lugar na apektado ng kalamidad.
Kasabay nito, pinamamadali rin ni Cordoba ang repair at restoration ng telecommunication services, partikular sa mga tinamaan ng bagyo.
Maliban dito, inatasan din ang mga network company na magtalaga ng libreng tawag at libreng charging stations sa mga apektadong lugar.