NATIONAL NEWS

Aabot sa 195 billion pesos na pondo ang inihirit ng Department of Health (DOH) sa kongreso para sa susunod na taon.

Ayon sa National Expenditure Program, mataas ito ng 8 billion pesos kumpara sa 187.84 billion pesos budget ngayong 2022.

Sakop nito ang mga pondo para sa Office of the Secretary, National Nutrition Council at Philippine National Aids Council.

Samantala, nakapaloob din sa panukalang budget ang pagpapagawa at pagpapaunlad ng mga ospital, tulong-medikal sa mahihirap na Pilipino, mga gamot at bakuna para sa mga government health care facilities.

Nakapagtala ang Department of Health (DOH) ng 3,580 bagong nahawa sa COVID-19 kahapon.

Ayon sa DOH, ito na ang pinakamataas na daily tally sa nakalipas na tatlong araw at ika-10 araw na mababa sa 4,000.

Bahagya namang bumaba ang active cases sa 30,240 kahapon kumpara sa 31,542 noong Martes.

Samantala, nakapagtala rin ang DOH ng 4,794 na bagong gumaling sa COVID-19 dahilan para umabot sa 3,772,318 ang recoveries.

Tumungtong naman sa 61,476 ang death toll matapos madagdagan ng 50 kahapon.

Dahil sa mga bagong bilang, sumampa na sa 3,864,034 ang nationwide COVID-19 tally sa Pilipinas.

Isinapubliko na ng Supreme Court (SC) ang petsa para sa 2022 Bar Examinations na gaganapin sa Nobyembre.

Ayon kay SC Associate Justice at 2022 Bar Exams Chairman Alfredo Benjamin Caguioa, itinakda ang pagsusulit sa November 9, 13, 16 at 20.

Patuloy na gagamitin ng korte suprema sa Digitized 2022 Bar Exam ang programang ‘Examplify’, na mabubuksan ng examinees gamit ang kanilang sariling gadgets habang nasa examination venue at binabantayan ng mga proctor.

Ang mga naaprubahang bar applicants lamang ang magkakaroon ng access sa software, habang ang paraan upang magamit ito ay malalaman sa hiwalay na bulletin na ilalabas ng SC.

Susunod namang isasapubliko ang venue, kaya’t inabisuhan ang mga qualified examinee na hintayin ang mga susunod na anunsyo.

Makikipagtulungan na ang Department of Justice (DOJ) sa iba’t ibang social media sites para malabanan ang talamak na “Online Sexual Abuse and Exploitation of Children” sa bansa.

Ayon kay Justice Secretary Jesus Crispin Remulla, sila mismo ang makikipag-ugnayan sa Facebook, Twitter at Tiktok hinggil sa nasabing hakbang.

Maliban sa nabanggit na social media sites, aapela rin si Remulla sa mga telcos at internet providers para ma-filter ang kanilang contents upang mapigilan ang pagkalat ng malalaswang video at litrato ng mga kabataan.

Bagaman walang tinukoy ang kalihim na ‘hotspot’ ng mga video, sinabi nito na mayorya sa mga bumibili ay nagmula sa European countries.

Sa ngayon, ibinabala ng DOJ ang paghahain ng kaso laban sa mga tumangging makipagtulungan kontra online sexual abuse.

Ilan pang planta ng Coca-Cola Beverages Philippines Incorporated ang pansamantalang nagtigil-operasyon dahil sa shortage sa supply ng asukal.

Kinumpirma ng Coca-Cola na nagsara muna ang kanilang planta sa Imus, Cavite at Zamboanga City.

Tiniyak naman ng kumpanya na gumagawa na sila ng hakbang upang hindi maapektuhan ng shortage ang lahat ng kanilang planta sa bansa.

Bukod sa Imus at Zamboanga City, suspendido rin ang operasyon ng planta ng Coca-Cola sa Naga City, Camarines habang balik-operasyon naman sa Davao City matapos ang isang araw na temporary closure.

Nasa proseso na ang paghahati sa dalawa o paghihiwalay sa Archdiocese of Cebu.

Ayon kay Cebu Archbishop Jose Palma, layunin ng hakbang na mapaglingkuran pa ang mas maraming Katoliko sa lalawigan na umabot na sa mahigit apat na milyon ang bilang.

Matagal na rin anyang plano ang paghahati matapos ang ordinasyon ni Bishop Ruben Labajo bilang Auxiliary Bishop ng Archdiocese.

Una nang sinuportahan ng namayapang si Cardinal Ricardo Vidal, dating arsobispo ng Cebu ang paghahati sa Archdiocese of Cebu at iminungkahing hatiin ito sa tatlo na kinabibilangan ng North Cebu, Metro Cebu at South Cebu.

Sa kasalukuyan, saklaw ng Ecclesiastical Province ng Cebu ang Dumaguete, Maasin, Talibon at Tagbilaran.

Patay na nang matagpuan ang isang Pinay domestic helper sa Hong Kong matapos umano itong magbigti.

Ayon sa Hong Kong Police, tumawag sa kanila ang amo ng biktima mag-a-alas-3:00 ng hapon noong Sabado, upang i-ulat na natagpuan ang kasambahay na nakabitin sa loob ng banyo.

Naganap ito sa mismong kanilang bahay sa Yuen Long Village.

Nag-iwan pa umano ng suicide note ang Pinay at nakasaad ang problema nito sa pera.

Itinanggi naman ng ina at kapatid ng OFW na batid naman nila ang problema ng kanilang kamag-anak.

Ang Pinay ay nagmula sa Bataan, may-asawa, isang anak at anim na taon nang naninilbihan sa kanyang amo sa Hong Kong.