NATIONAL NEWS

Libu-libong sako ng asukal na nagkakahalaga ng P285 million ang nadiskubre ng Bureau of Customs sa isang warehouse sa Quezon City.

Ayon sa BOC, nakatanggap sila ng intelligence report na nag-i-imbak ng smuggled na asukal ang warehouse sa Araneta Avenue.

Agad ikinandado ng Aduwana ang bodega at binigyan ang may-ari nito ng kalahating buwan upang patunayang ligal ang mga naka-imbak na asukal.

Gayunman, iginiit ng administrative officer ng warehouse na mayroong importation permit at clearances mula sa Customs at Sugar Regulatory Administration ang mga naka-imbak na sugar supply.

Para umano sa industrial consumers ang mga ito at naka-tengga pa sa bodega dahil hindi pa kailangan ng mga planta.

Tila naulit ang pananagasa sa isang security guard na nag-viral sa social media matapos isa pang guwardya na nagmamando rin ng daloy ng trapiko ang binangga at inararo ng suv sa  Dasmariñas City, Cavite.

Tumilapon sa kalsada na agad na namatay ang biktimang si Rodolfo Tina Mejos, singkwenta’y dos anyos, security officer ng Orchard Golf and Country Club, barangay Salawag.

Ayon sa Dasmariñas City Police, mag-a-ala sais ng gabi noong Lunes habang nag-mamaniobra ng mga sasakyan si Mejos papasok at palabas ng subdivision ay bigla siyang sinuyod ng Mitsubishi Montero sport na may plakang DAM-4991 sa Abad Santos Avenue.

Nakilala naman ang suspek at driver na si Primo Mallari Salarda, singkwenta’y uno anyos, negosyante at kasalukuyang hawak na ng pulisya.

Nag-viral sa social media ang insidente makaraang makuhanan ang buong pangyayari ng isang dashcam na nakakabit sa sasakyan ng netizen na si Allen Verzosa Gutierrez na dumaraan sa lugar.

Naitakbo pa sa pagamutan si Mejos pero sa tindi ng pagtilapon nito ay nalasog ang kanyang katawan at napuruhan sa ulo.

Patung-patong naman na kaso ang kakaharapin ng negosyanteng suspek.

Sibak sa pwesto ang warden ng Bureau of Jail Management and Penology-6 District Jail sa Pototan, Iloilo makaraang magprotesta ang mga bilanggo kahapon.

Umakyat ang mga preso sa bubong ng kulungan upang mag-noise barrage dahil sa umano’y inaabot nilang gutom at nanawagang paalisin sa puwesto si Jail Chief Inspector Norberto Miciano, Jr.

Umapela rin ang mga preso na papasukin ang kanilang mga dalaw at makausap si Iloilo Governor Arthur Defensor, Jr. maging si Regional Director, Jail Chief Supt. Clint Russel Tangeres ng BJMP 6.

Bilang tugon ay tinanggal ng pamunuan ng BJMP 6 si Miciano at pansamantalang pinalitan ni Jail Inspector Woody Palmejar.

Matapos ang halos walong oras sa bubong, bumaba rin ang mga inmate at pinulong ni Tangeres BJMP 6 si Regional Director Jail Chief Superintendent Clint Russel Tangeres.

Mahigit P1-milyong halaga ng shabu ang nadiskubre sa toilet tank g isang fastfood chain sa Naga City, Camarines Sur.

Ayon kay Senior Master Sergeant Toby Bongon, spokesman ng Naga City Police Office, natuklasan ng maintenance staff ang 150 grams ng shabu na nakasilid sa plastic ice bag.

Inireklamo anya ang isang comfort room na hindi gumagana ang flush kaya’t agad nila itong sinuri para alamin ang problema.

Nakabara ang plastic sa toilet tank na pinagmumulan ng tubig at kahina-hinala ang nilalaman nito kaya’t agad nilang ipinagbigay-alam sa pulisya.

Inaalam na ng mga otoridad kung sino ang may-ari ng nasabing nadiskubreng iligal na droga.

Labis ang trauma na pinagdaraanan ng estudyanteng nakaranas ng verbal abuse mula sa guro nito sa Daet, Camarines Norte.

Kinumpirma ng nanay ng grade 5 student na huminto sa pag-aaral ang kanyang anak matapos ang sinapit sa class adviser.

Dahil dito, nakipag-ugnayan na sa estudyante at mga magulang nito ang Department of Education-Camarines Norte.

Ayon naman kay Jeannie Vargas, nagpasya ang DepEd na mabigyan ng psychological first aid ang kanyang pamangkin.

Imo-monitor anya ng mga doktor ang bata kahit pa lumipat na ito ng ibang paaralan.

Samantala, binuweltahan naman ni Vargas ang mga netizen na inaakusahan siyang nagpapapansin lang at iginiit na hindi kapareho ng mga bata noong dekada nobenta ang kabataan ngayon na nakaranas ng stress lalo sa pag-aaral dahil sa covid-19 pandemic.

Balik-operasyon na ang bottling plant ng softdrinks manufacturer na Coca-Cola Beverages Philippines, Incorporated (CCBPI) sa barangay Ulas, Davao City, isang araw matapos ang temporary closure dahil sa kakulangan ng supply ng asukal.

Ayon kay Atty. Juan Lorenzo Tañada, Director for Corporate and Regulatory Affairs ng CCBPI, naapektuhan ang kakayahan ng ilan nilang bottling plant na magproduce ng ilang produkto dahil sa kakulangan sa supply ng “bottler’s grade sugar”.

Ginagawa na anya nila ang lahat ng paraan upang mabawasan ang epekto ng supply disruption at supply shortage sa kanilang operasyon.

Nakikipag-ugnayan din ang kumpanya sa gobyerno at sugar industry sector upang makapaglatag ng mga solusyon para sa kapakanan din ng small retailers na naka-asa sa mga Coca-Cola product para sa kanilang kabuhayan.

Una nang sinabi ng nabanggit na beverage manufacturer na kailangan ng 450,000 metric tons ng premium refined sugar ng soda bottling industry upang maipagpatuloy ang operasyon ng kanilang mga planta hanggang katapusan ng taon.

Isang lalaki ang dinukot sa Sta. Rosa City, Laguna.

Kinilala ang biktimang si Rojin Perez na tinangay ng 3 armadong lalaki mula sa kanilang bahay sa Barangay Balibago.

Ayon sa Sta. Rosa City Police, tumawag ang biktima sa kinakasama nito upang sabihing papauwi na siya sa kanilang bahay, noong Martes ng gabi.

Gayunman, nang lumabas ang live-in partner para buksan ang gate, nakita nitong bitbit na ang biktima ng tatlong lalaking armado ng baril.

Nagtago ang babae hanggang sa umalis ang mga suspek dala si Perez.

Aminado naman ang babae na ang dati niyang asawa na isang engineer ang nagbabanta sa kanila at nito lamang Hulyo ay nagpakuha ito ng larawan ni rojin sa pamamagitan ng kanilang anak.

Person of interest na ngayon ang engineer habang patuloy ang imbestigasyon at inaalam ang kinaroroonan ng biktima.