NATIONAL NEWS

Arestado sa ikinasang entrapment operation ang dalawang indibidwal matapos magpanggap bilang dalawang matataas na opisyal ng gobyerno para mangikil ng P50,000 kay Senate President Juan Miguel Zubiri para sa isang political convention kapalit ng patuloy nilang pagsuporta kay Zubiri.

Sa pahayag ni Senator Zubiri, agad siyang nagreport sa Philippine National Police (PNP) matapos niyang makumpirma ang isang 43-anyos na lalaki at isang 23-anyos na lalaki na nagpapanggap bilang isang gobernador at isang board member ng lalawigan ng Siquijor.

Kinilala ang mga suspek na sina Brayan Reyes Ledesma at Danilo Guillermo Ledesma.

Napag-alaman na ang kasalukuyan umanong gobernador ng nasabing lalawigan ay si Gov. Jake Vincent Villa na miyembro ng Nationalist People’s Coalition na dati ring Congressman noong taong 2019–2022.

Nakuha mula sa mga suspek ang boodle money na tinatakpan ng isang genuine P1,000 bill, isang caliber .45 pistol na walang serial number, at isang live ammunition.

Bukod sa kasong estafa, nahaharap din sa kasong robbery extortion, usurpation of authority at illegal possession of firearms ang mga suspek.

Samantala, iginiit ni Zubiri na hindi niya palalampasin ang gantiong uri ng panloloko kung saan, nadamay pa umano ang ibang mga opisyal.

Pansamantalang isinara ng Department of Public Works and Highways (DPWH) sa mga motorista ang ilang kalsada sa Northern Luzon dahil sa pananalasa ng bagyong Florita.

Ayon sa DPWH, nagkaroon ng pagguho ng lupa, pagtumba ng mga puno at pagbaha sa mga kalsada sa Cordillera Administrative Region (CAR) at Cagayan Valley.

Hindi din madaanan ang mga kalsada sa ilang lugar sa Region 2 kabilang na ang bahagi ng Claveria-Calanasan-Kabugao road sa Apayao; Mt. Province-Ilocos Sur via tue sa Tadian, Mt. Province; bahagi ng Abra Kalinga road patungong Duldulao sa Malibcong, Abra; Itogon-Dalupirip Road, sa Benguet; at ang bahagi ng Gov. Bado Dangwa national road sa Bakun, Benguet.

Bukod pa diyan, binaha naman ang Cabagan-Sta. Maria road overflow bridge at ang CAR kabilang na ang Mt. Province-Ilocos Sur via tue sa Calanasan, Apayao; Benguet-Nueva Vizcaya road, Asin – Nangalisan – San Pascual – La Union – Boundary road sa Tuba, Benguet.

Maging ang Apayao-Ilocos Norte Road, Itogon-Dalupirip Road; Cong. Andres Acop Cosalan road sa Benguet; Nueva Vizcaya – Ifugao – Mt. Province boundary road; Kiangan boundary – Calanan- Pinukpuk – Abbut Road sa Kalinga.

Samantala, ilang kalsada din sa Ilocos Region ang hindi muna papayagang makadaan habang nagpapatuloy pa ang clearing operations ng quick response teams ng DPWH sa mga nabanggit na kalsada.

Naglaan ng P12 milyong halaga ng solar powered irrigation system (SPIS) ang Department of Agrarian Reform (DAR) bilang bahagi ng kanilang proyekto sa Cavite.

Aabot sa tatlumput dalawang ektarya ng lupang sakahan ang paglalagyan ng mga solar power upang mapataas ang produksiyon ng mga high value crops at maiangat ang pamumuhay at kita ng mga magsasaka.

Ayon kay Provincial Agrarian Reform Program Officer II James Arthur Dubongco, ang mga itinayong irrigation system ay mapapakinabangan ng maraming mga magsasakang miyembro ng Tres Cruses Arb Farmers Association sa Sitio Gugo, Barangay Tres Cruzes, Tanza; at sa barangay Baliwag Farmers Association Inc.

Ikinatuwa ni Dubongco ang naturang proyekto dahil sakto ito sa gitna ng tumataas na presyo ng diesel at gasolina at maiiwasan na rin ang power interruption sa kanilang lugar.

Bukod pa dito, madali din itong patakbuhin, ligtas sa kapaligiran at nangangailangan lamang ng kaunting maintenance.

Ang naturang proyekto ay ipinatupad sa ilalim ng Climate Resilient Farm Productivity Support Project (CRFPSP) ng DAR na may layuning matulungan ang mga magsasaka na naninirahan sa mga liblib o tagong lugar.

Makararanas ngayong araw ng pagkaantala sa suplay ng tubig ang ilang barangay sa Quezon City dahil sa isinasagawang facility maintenance sa North C. Pumping station.

Ayon sa pamunuan ng Manila Water, magsisimula ang water interruption mamayang alas-12 ng tanghali na tatagal hanggang alas-8 ng gabi.

Kabilang sa mga maa-apektuhan ang barangay bagbag, Batasan Hills, Greater Fairview, Gulod, Holy Spirit, Nagkaisang Nayon, North Fairview, San Bartolome, Sauyo, Sta. Lucia, Sta. Monica, at talipapa.

Nagpaalala naman ang Quezon City Government sa mga residente na panatilihin ang pagtipid at pag-iimbak ng tubig bilang handa sa pagkaantala sa suplay ng tubig.

Inihayag ng OCTA Research Group na tapos na ang COVID-19 peak sa Metro Manila.

Bagama’t ayon kay OCTA Research Fellow Dr. Guido David, ang pagsirit ng mga kaso ng naturang sakit sa bansa ay hindi pa matatapos.

Sinabi pa ni David na naitala sa bansa ang negative growth rate sa nakalipas na dalawang linggo, habang ang kasalukuyang current growth rate ng bansa ay nasa -17%.

Iginiit naman ng eksperto na kahit na manatili ang Metro Manila na una sa listahan ng mga rehiyon na may bagong COVID-19 cases ay maaaring ilang araw pa bago mag-peak ang mga kaso sa mga lugar na malayo sa National Capital Region (NCR)

Inihayag ng Department of Social Welfare and Development (DSWD) na walang naiulat na nasawi sa kabila ng pag-hagupit sa bansa ng severe tropical storm Florita.

 Ayon kay DSWD Secretary Erwin Tulfo, walang casualty reports mula sa Office of the Civil Defense, National Disaster Risk Reduction and Management Council, Regional Offices ng DSWD, maging Local Government Units (LGUs).

 Sinabi naman ni DSWD Undersecretary for Disaster Management and Response Marco Bautista na mahigit 1.13 billion pesos ang naipamahaging tulong ng kanilang ahensiya sa mga naapektuhang pamilya ng bagyo.

 Samantala, idinagdag pa ni Bautista na ang food packs at hygiene kits ay ipinamigay na rin sa evacuation centers.

Tiwala ang Department of Health (DOH) na maaabot nito ang target na bilang ng mga mabibigyan ng COVID-19 booster shot sa National Capital Region (NCR).

 Ayon kay Director Ma. Soledad Antonio ng Bureau of International Health Corporation ng DOH, maganda ang bilang ng bakunahan sa rehiyon.

 Gayunman, malaking hamon pa rin aniya ang mga lugar na mahirap mapuntahan.

 Tiniyak naman ni Antonio na ginagawa ng pamahalaan ang lahat upang mapataas ang bilang ng mga mababakunahan sa bansa.

Natagpuan na ang estudyanteng napaulat na nawawala sa bayan ng Trece Martires sa Cavite.

 Ayon sa mga otoridad sa Trece, nakita ang grade 8 student na si Bobby Quezon Jr., edad 13 anyos na palakad-lakad sa Bayan ng Rosario.

 Nabatid na ayon sa bata, hindi nito alam kung papaano bumalik ng kanilang bahay matapos silang pauwiin nang kanselahin ang klase dahil sa bagyong Florita.

 Nagpasalamat naman ang mga magulang ng bata sa lahat ng tumulong sa kanila tulad ng PNP, DEPED at iba pang volunteers. –  sa panulat ni Hannah Oledan