NATIONAL NEWS

Natagpuan na ang estudyanteng napaulat na nawawala sa bayan ng Trece Martires sa Cavite.

 Ayon sa mga otoridad sa Trece, nakita ang grade 8 student na si Bobby Quezon Jr., edad 13 anyos na palakad-lakad sa Bayan ng Rosario.

 Nabatid na ayon sa bata, hindi nito alam kung papaano bumalik ng kanilang bahay matapos silang pauwiin nang kanselahin ang klase dahil sa bagyong Florita.

 Nagpasalamat naman ang mga magulang ng bata sa lahat ng tumulong sa kanila tulad ng PNP, DEPED at iba pang volunteers. –  sa panulat ni Hannah Oledan

Sapat ang dami ng food boxes na ipamimigay para sa mga nasalanta ng bagyong Florita.

 Sinabi ni Department of Social Welfare and Development (DSWD) Secretary Erwin Tulfo na mahigit 100,000 food packs ang naka standby sa Ilocos region at Cagayan Valley.

 Handa na rin ang nasa 20 hanngang 25 milyong pisong Assitance to Individuals in Crisis (AIC).

 Kaugnay nito, ipinabatid ni Tulfo na binabantayan ng DSWD ang pagsasaayos ng mga apektadong lugar, partikular ang lalawigan ng Isabela. –  sa panulat ni Hannah Oledan

Nakipagpulong ang Pangulong Ferdinand Marcos Jr. sa kanyang economic team at mga opisyal ng National Food Authority (NFA).

 Ayon sa Office of the President (OP), ito ay para talakayin kung paano mapapanatili ang pagtaas ng momentum sa rice inventory ng bansa.

 Matatandaang sa unang buwan ng punong ehekutibo sa pwesto at sa pagiging agriculture secretary, nagbigay ito ng marching order para palakasin ang produksyon ng bigas pati na rin ng mais, gulay, baboy, at manok.

 Nanawagan din ang presidente sa pagkakasa ng masagana 150 at masagana 200 na mungkahi ni dating Secretary William Dar.

 Kabilang sa panukala ng pangulo ay farm-to-market road masterplan na aniya’y, titiyak sa food security sa bansa. –  sa panulat ni Hannah Oledan

Isinusulong ng Liga ng Transportasyon at Operators sa Pilipinas (LTOP) na maisabatas ang pagpapatupad ng No Contact Apprehension Program (NCAP).

 Sa panayam ng DWIZ, sinabi ni Lando Marquez, Presidente ng LTOP, na dapat i-base sa Republic Act 4136 ang usapin ng NCAP.

Sang-ayon naman si Marquez na i-refund ang penalties kung sakaling i-deklara ng korte suprema na labag sa batas ang naturang programa. –  sa panulat ni Hannah Oledan

Nag subside na o bumaba na ang bahang dulot ng Bagyong Florita sa malaking bahagi ng bansa.

Ipinabatid ni NDRRMC Spokesperson Mark Timbal na 20 sa 30 ng flooding incidents na ipinaabot sa kanila ang bumaba na at apat ang pababa na.

Ayon pa kay Timbal, pitong kalsada pa at pito ring tulay ang hindi pa uubrang madaanan.

Una nang ini-report ng NDRRMC na halos 5,000 katao o nasa 1,300 pamilya mula sa tatlong rehiyon ang naapektuhan ng Bagyong Florita.

Isinusulong ng Securities and Exchange Commission (SEC) at Bangko Sentral ng Pilipinas (BSP) ang anila’y batas hinggil sa digital assets para ma protektahan ang consumers.

Sinabi ni SEC Chairman Emilio Aquino na lumabag sa Securities Regulation Code ang karamihan sa mga ipinasara nilang kumpanya na dawit sa investment scams.

Mahalaga aniyang magkaruon ng batas na direktang tumatalakay sa digital asset upang higit silang maging mas epektibong tagapag patupad ng batas.

Ipinabatid naman ng BSP na mahalagang magkaruon ng batas para mas mapaigting pa ang pag regulate sa digital assets kabilang ang Financial Accounts Regulation Act.

Kanselado ang apat na domestic flights matapos maapektuhan ng Bagyong Florita.

Ayon sa Manila International Airport Authority, ang PAL Express flight 2P2932 at 2933 patungo sa Basco Batanes galing ng Maynila at pabalik ng Maynila ay kabilang sa mga nakansela.

Maliban dito, suspendido rin ang biyahe ng CebGo DG6031 at 6032 na patungo at galing sa San Jose , Mindoro.

Pinapayuhan naman ang mga apektadong pasahero na makipag-ugnayan sa kanilang airline o sa kanilang travel agents para mai-rebook ang kanilang nakanselang byahe. —sa ulat ni Raoul Esperas (Patrol 45)

Nananatili pa ring bukas ang tig-isang gate ng Binga Dam sa Benguet at Magat Dam sa Isabela at Ifugao.

Ito’y kahit nakalabas na ng Philippine Area of Responsibility (PAR) ang Bagyong Florita.

Ayon sa PAGASA, dakong ala-6:00 ng umaga,  nasa 572.65 meters ang lebel ng tubig sa Binga Dam na ilang metro lang ang agwat sa 575-meter spilling level nito.

Habang nasa 185.99 meters ang reservoir water level ng Magat Dam na ilang metro lang din ang layo mula sa 190-meter normal high water level nito.

Unti-unti nang humuhupa ang baha sa Cagayan na isa sa mga pinaka sinalanta ng Bagyong Florita.

Sinabi ni Cagayan Governor Manuel Mamba, sa ngayon ambon na lamang ang nararanasan sa probinsya.

Inaasahang babalik sa kanilang mga bahay ang mga residenteng inilikas dahil sa bagyo.

Tiniyak naman ni Mamba na sapat pa ang pondo nila para sa pamamahagi ng food packs.

Aniya, mas kailangan nila ngayon ng crop subsidy mula sa Department of Agriculture (DA) dahil sa iniwang pinsala ng bagyo sa kanilang mga pananim.

Kasalukuyang pang nagpapatulioy ang assessment ng probinsya hinggil sa naging pinsala ng bagyo sa sektor ng agrikultura.