NATIONAL NEWS

Kumpiyansa si Navotas City Representative Toby Tiangco na walang sama ng loob ang mga kasamahan niya sa Kamara matapos ang mga isiniwalat nitong impormasyon hinggil sa isyu ng flood control projects sa bansa.

Ayon kay Congressman Tiangco, mabuting sabihin ng mga kongresistang nadawit sa nasabing anomalya na makiisa sa imbestigasyon ng Independent Commission for Infrastructure (ICI) at ilahad ang buong katotohanan.

Iginiit din ni Cong. Tiangco na karamihan sa miyembro ng Kamara ay walang alam sa maanomalyang proyekto ng gobyerno at nadadamay lamang ang imahe ng Kamara sa ilang gumawa ng kalokohan.

Samantala, patuloy na magiging bukas si Cong. Tiangco sa imbestigasyon ng I-C-I, at umaasang maisasapubliko ang pagdinig ng komisyon kaugnay sa isyu ng flood control projects.

Nagpalabas ng bagong budget guidelines si Public Works Secretary Vince Dizon para sa paghahanda at pag-review ng approved budget for the contract o A-B-C ng mga consulting services sa mga proyekto ng DPWH.

Ayon sa Department Order No. 184, magiging ceiling sa bid prices ng locally funded projects ang A-B-C at automatic na madidisqualify ang lalagpas dito.

Para naman sa foreign-assisted projects, hindi maaaring lumagpas sa approved loan o grant nang walang clearance mula sa mga oversight agencies gaya ng Department of Budget and Management o Department of Economy, Planning and Development.

Kumpara sa mga naunang guidelines, mas mahigpit ang bagong panuntunan dahil sa market scoping, automatic disqualification ng overbids, at mas mataas na approvals para sa cost adjustments.

Ipinag-utos din sa DPWH Bureau of Design na mag-validate ng mga A-B-C packages at maglabas ng updated costing guidelines taon-taon.

Agad na ipinatupad ang bagong alituntunin at pinalitan nito ang Department Order No. 99 na nilagdaan noong 2018.

Tiniyak ng National Food Authority (NFA) na hindi nito pahihintulutan ang pagbebenta ng bigas sa single-digit na halaga upang maprotektahan ang mga magsasaka.

Ayon kay NFA Administrator Larry Lacson, batid nila ang tunay na production cost ng bigas kaya’t sisiguraduhin nilang hindi malulugi ang mga magsasaka.

Hindi bibili ang NFA aniya ng palay nang mas mababa pa sa sampung piso kada kilo.

Bagama’t may ilang trader na nag-aalok ng presyo mula syete pesos hanggang sampung piso, tiniyak ng ahensya na hindi ito bababa sa itinakdang halaga at patuloy na susuporta sa mga magsasaka upang makamit ang tamang kita.

Dagdag pa ni Administrator Lacson, mahaba man ang pila ng mga magsasaka na nais magbenta sa NFA, nagbibigay naman ito ng pag-asa na mabibili ang kanilang ani sa makatarungang presyo.

Humihirit si Vice President Sara Duterte sa International Criminal Court na bigyan ng bente kwatro oras na caregiver si dating Pangulong Rodrigo Duterte habang nakapiit sa detention facility sa The Hague Netherlands.

Kasunod ito ng ibinunyag ni VP Sara na nawalan ng malay ang kanyang ama habang nasa kustodiya ng ICC.

Tinawag ng Bise Presidente na very alarming ang sitwasyon ni dating Pangulong Duterte sa piitan dahil hindi naman tinitiyak ng ICC ang kaligtasan ng kanyang ama.

Sinabi pa ni VP Duterte na hindi ito ang unang pagkakataon natumba ang dating Pangulo kaya’t nababahala siya sa kaligtasan nito.

Matatandaang kwenestyon ng Pangalawang Pangulo ang welfare check ng Philippine Embassy sa Netherlands sa nakatatandang Duterte sapagkat hindi naman ito ipinalaam sa kanilang pamilya maging sa defense team nito.

Ipinaubaya na ni House Speaker Faustino “Bojie” Dy III sa Department of Justice o DOJ at Independent Commission for Infrastructure o ICI ang kasong kinakaharap ni Ako Bicol Partylist Rep. Elizaldy Co.

Ito ang sinabi ng lider ng Kamara matapos magbitiw si Co bilang miyembro ng Mababang Kapulungan.

Ayon kay Speaker Dy, wala nang hurisdiksiyon ang House of Representatives kay Co dahil sa paghahain nito ng resignation letter sa Office of the Speaker at House Committee on Ethics and Privileges.

Sinabi ni Speaker Dy na nabigla ang mga mambabatas sa Kamara sa ginawang hakbang ni Co kung saan, ngayon rin ang huling araw ng palugit sa 10-day period na ibinigay ng Kamara kay Co para umuwi ng Pilipinas.

Ipinunto ni Speaker Dy na plano na sana ng Ethics Committee na ia-address at isalang ang inihain na kaso kay Co at kanyang inihiling na sana’y suspindehin ang kongresista hanggang sa ma-expel kung hindi pa rin aniya ito makikipag-ugnayan sa Kamara.

Binigyang-diin ni Speaker Dy ang pangangailangan na makauwi ng bansa si Co at panagutin sa mga paratang na ibinabato laban sa kanya.

Mariing itinanggi ni Leyte Rep. Martin Romualdez ang mga paratang sa kanya ni Vice President Sara Duterte na siya ay tumatanggap ng pera mula sa ilegal na sugal.

Iginiit ni Romualdez na “pure fiction” o guni-guni at gawa-gawang kwento lang ang umano’y “suitcases of cash” o kickbacks mula sa illegal gambling.

Ipinunto ni Romualdez na wala pa ring naipapakitang ebidensya hanggang sa ngayon at madali lang ang magturo o mag-imbento ng isyu.

Dagdag pa ni Romualdez na siya ang inaakusahan at wala siyang kinalaman sa kaso at away ng dalawang negosyo at ginamit lamang ito para siya ay siraan.

Ikinalungkot ng mambabatas na ang Pangalawang Pangulo na inakusahan at na-impeach ng House dahil sa maling paggamit ng pondo ay siya pa aniya ang nagkakalat ng kasinungalingan.

Nanawagan si Romualdez na huwag paniwalaan ang mga alegasyong walang batayan mula sa mga taong nawalan na umano ng kredibilidad.

Pinasinungalingan ni Leyte Rep. Martin Romualdez ang naging pahayag ni Senator Francis Chiz Escudero matapos ang privilege speech nito sa Senado.

Ayon kay Romualdez, ang mga pahayag ni Escudero laban sa kanya ay hindi exposé kundi isang DDS script.

Anya, walang katotohanan ang mga luma at paulit-ulit na akusasyon laban sa kanya na matagal na nating nakikita sa mga troll pages at mga post sa social media.

Naniniwala si Romualdez na umiiwas lang sa seryosong katanungan si Escudero at hindi rin niya ipinaliwanag ang sarili niyang papel na may kaugnayan ang kanyang pangalan sa mga kickback sa flood control projects.

Malinaw para kay dating House Speaker Romualdez na ang talumpati ni Sen. Escudero ay hindi tungkol sa pananagutan kundi para isulong ang kanyang pansariling ambisyon.

Iginiit ni Romualdez na ang mga pahayag ni Escudero ay pagpapakita ng kanyang katapatan at serbisyo kay VP Sara at para aniya iposisyon ang kanyang sarili bilang kaalyado ng Bise Presidente para sa taong 2028.

Dagdag pa ni Romualdez na ang tunay na pinagsisilbihan ni Escudero ay hindi ang katotohanan, kundi ang sariling interes at mga plano sa politika.

Nangako naman si Romualdez na patuloy na makikipagtulungan sa bawat patas na imbestigasyon dahil wala aniya siyang itinatago at kung tunay na pananagutan ang hinahanap ng senador, dapat na sa presinto aniya ito magpaliwanag.

Naniniwala si ICC assistant to counsel, Atty. Kristina Conti na oras na lamang ang hinihintay para maglabas ng arrest warrant ang International Criminal Court laban kina Senador Ronald Dela Rosa at dating Justice Secretary Vitaliano Aguirre.

Kaugnay ito sa kinakaharap na kasong crimes against humanity laban kay dating Pangulong Rodrigo Duterte.

Ayon kay Atty. Conti, maka-ilang beses nang binanggit sina Dela Rosa at Aguirre sa mga court documents partikular sa public redacted version na ipinost sa website ng pre-confirmation brief ng prosekusyon ng I.C.C.

Batid naman na anya marahil ng senador na maaari siyang ipa-aresto ng korte lalo’t siya ang naging hepe ng Philippine National Police nang ilunsad ang giyera kontra droga.

Gayunman, aminado si Conti na ang tanging tanong na lamang ay kailan ilalabas ang mandamyento de aresto.

Una nang inihayag ng mambabatas na nakahanda siya sakaling maglabas ng warrant of arrest ang ICC laban sa kanya kaugnay sa mga kinakaharap na kaso ni dating Pangulong Duterte.