NATIONAL NEWS

Tututukan lamang ng Senate Blue Ribbon Committee ang mga mahahalagang isyu sa imbestigasyon sa mga maanomalyang flood control project.

Ayon kay Senate Pro-Tempore at Blue Ribbon Committee chairman Panfilo “Ping” Lacson, importante lamang ang laman ng naging salaysay ng surprise witness na si Orly Guteza, at side issue na lamang kung napa-notaryo niya ang kanyang affidavit.

Dahil dito, hindi na anya kailangang imbitahan ng Blue Ribbon Committee sa ngayon ang abogadong nakapirma sa notarized affidavit dahil malilihis lamang ang imbestigasyon kung kikilos pa ito sa isyu.

Anya, dahil under oath sa komite ang salaysay ni Guteza, kung mapapatunayang nagsisinungaling ito, madudungisan ang kabuuan ng kanyang testimonya at posible siyang makasuhan ng perjury.

Kinumpirma ni Independent Commission for Infrastructure executive director Brian Keith Hosaka na walang magaganap na livestreaming sa kanilang imbestigasyon sa maanomalyang flood control projects.

Ayon kay executive director Hosaka, ang imbestigasyon ng I.C.I. ay isang proseso kung saan hindi maaaring ilabas ang mga maliliit na rebelasyon kaugnay sa naturang kontrobersya.

Delikado aniya kung ila-livestream ang kanilang imbestigasyon dahil ang bawat pahayag na kanilang natatanggap ay dapat pang beripikahin.

Dagdag pa ni executive director Hosaka, posible ring magkamali ng intindi ang publiko sa mga ibinubunyag sa pagdinig, sakaling i-livestream ito. Nais pigilan ng I.C.I. official ang pagkalat ng maling interpretasyon dahil gusto aniya ng komisyon na paniwalaan ng publiko ang sistema at ang I.C.I.

Tiniyak naman ni executive director Hosaka na sinusuri nilang mabuti ang kredibilidad ng bawat testimonyang ibinabato sa kanila.

Nagbigay-linaw si Rep. Ralph Tulfo kaugnay ng kumalat na video ng kanyang pagdiriwang noong 2023 matapos umani ng iba’t ibang reaksyon mula sa publiko.

Ayon kay Tulfo, pribadong okasyon ang naturang selebrasyon at tiniyak niyang walang ginamit na pondo ng gobyerno o pera ng taumbayan. Bagamat ginamit umano ang kanyang credit card, sinabi niyang pinag-ambagan ng kanyang mga kasama ang kabuuang gastos.

Gayunpaman, nananatiling hati ang opinyon ng publiko. May ilan na tinanggap ang paliwanag ng mambabatas, habang ang iba naman ay nananawagan ng mas malinaw na paliwanag at masusing pagsisiyasat upang matiyak ang transparency.

Sa harap ng usapin, muling iginiit ni Tulfo na personal trip lamang ang pagdiriwang at walang kinalaman sa kanyang tungkulin bilang opisyal ng pamahalaan.

Talo ang taumbayan sa oras na ikunsidera ang mga taong sangkot sa maanomalyang flood control projects bilang state witness.

Sa panayam ng DWIZ, ipinunto ni FEU Dean College of Law Atty. Mel Sta. Maria hindi na maaaring kasuhan ng kriminal ang mga sangkot sa nasabing anomalya sa oras na ituring ang mga ito bilang state witness.

Samantala, pag-aaralan pa rin ng Department of Justice kung ipapasok bilang state witness ang mag-asawang Curlee at Sara Discaya pati na rin ang tatlong dating Public Works and Highways engineers na sina Brice Hernandez, Henry Alcantara, at Jaypee Mendoza.

Naniniwala si Dr. Froilan Calilung isang political analyst na sa kadikit ng pangalan ni dating House Speaker Martin Romualdez si Pangulong Ferdinand Marcos Jr.

Sa panayam ng DWIZ, sinabi ni Dr. Calilung na maaaring madawit si Pangulong Marcos Jr., sa pagkakasangkot ni Ako Bicol Party-List Rep. Romualdez sa kaso ng maanomalyang flood control projects.

Matatandaang isinasangkot si Rep. Romualdez sa isyu ng flood control projects kung saan sinasabing hinahatiran ito ng male-maletang perang kickback mula sa proyekto ng pamahalaan.

Ipagpapaliban muna ng Senate Blue Ribbon Committee ang pagdinig nito ngayong linggo kaugnay sa maanomalyang flood control projects.

Ayon kay Senate President Pro-Tempore Panfilo “Ping” Lacson, na siyang chairman din sa naturang komite, kailangang pagtuunan muna ng oras ang pagkokonsolida ng mga dokumento at testimonya na magiging batayan ng kanilang initial report.

Dapat anyang suriin muna ang mga datos na kanilang nakalap, bago mag-hearing muli.

Dagdag pa ni Senador Lacson na maaaring ipagpatuloy ang mga pagdinig kung may lumabas na bagong impormasyon.

Anya, sa ngayon ay kailangang din muna nilang gampanan ang kanilang tungkulin sa nalalapit na deliberasyon sa 2026 national budget.

Nasa lima hanggang siyam na bagyo pa ang nagbabanta at inaasahang papasok sa Philippine Area of Responsibility ngayong ‘ber’ months.

Kaugnay ito ng La Niña alert na inianunsyo ng PAGASA kung saan inaasahan ang 70 percent o mas higit pang posibilidad ng pamumuo ng La Niña ngayong buwan ng Oktubre hanggang Disyembre at pwedeng magtuloy-tuloy hanggang Pebrero sa susunod na taon.

Ayon kay PAGASA Deputy Administrator Marcelino Villafuerte, tatawaging “Paolo” ang posibleng ika-labing anim na mamuong bagyo sa loob ng bansa.

Bagaman hindi inaasahang mas malakas pa ang mga ito sa mga naunang bagyo, pinaghahandaan pa rin ng state weather bureau ang pagpasok nito upang maiwasan ang mas malalaking epektong maidudulot nito.

Pinaalalahanan din ni PAGASA Deputy Administrator Villafuerte ang publiko na palaging maging handa partikular sa Visayas at Mindanao na kadalasang tatamaan ng mga inaasahang bagyo.—sa panulat ni Mark Terrence Molave

Pinasinungalingan ng ICC-accredited lawyer na si Atty. Joel Butuyan ang kumakalat na impormasyon hinggil sa sinasabing pag-apruba ng International Criminal Court sa interim release ni dating Pangulong Rodrigo Duterte.

Ayon kay Atty. Butuyan, sinadya lamang ng kampo ng mga taga-suporta ni Duterte na lituhin ang publiko sa pamamagitan ng maling impormasyon.

Aniya, tinapat pa mismo ang pagkalat ng balita sa inilabas na pahayag ng legal counsel ni Duterte na si Atty. Nicholas Kaufman hinggil sa umano’y hindi magandang kalusugan ng dating pangulo.

Para anya sa kampo ng mga biktima, mahalagang dumaan sa tamang beripikasyon ang anumang pahayag mula sa kampo ni Duterte para sa katotohanan at hustisya sa gitna ng mga isyung may kinalaman sa karapatang pantao.—sa panulat ni Mark Terrence Molave