NATIONAL NEWS

Posibleng palawigin pa ni Pangulong Ferdinand Marcos Jr. ang dalawang-buwang suspensyon ng rice importation at magpatupad ng mas mataas na taripa sa inaangkat na bigas upang mapatatag ang presyo ng palay at maprotektahan ang mga lokal na magsasaka ngayong anihan.

Ayon kay Agriculture Secretary Francisco Tiu Laurel Jr., ipinag-utos na ni Pangulong Marcos na ihanda ang mga kinakailangang kautusan para sa posibleng pagpapalawig ng import freeze.

Nabatid na ipinatupad ang rice import suspension noong Setyembre a-uno at nakatakdang magtapos sa Nobyembre 2.

Layon nitong matulungan ang mga magsasaka na makabawi mula sa pagbagsak ng presyo ng palay bunsod ng pagdagsa ng mas murang imported na bigas.

— sa panulat ni John Riz Calata

Ipinag-utos ni Pangulong Ferdinand Marcos Jr. sa mga otoridad na tiyaking may sapat na ebidensya laban sa mga iniimbestigahang personalidad at opisyal na sangkot sa maanomalyang flood control project.

Ayon kay Palace Press Officer Claire Castro, layon nitong matiyak na hindi makakalusot sa pananagutan ang mga ito.

Dagdag pa ni Usec. Castro, nais matiyak ng Pangulo na hindi makakatakas ang mga tunay na taksil sa interes ng taumbayan.

Nais din aniya ng Pangulo na maibalik sa taumbayan ang mga nanakaw na pondo, at iginiit na hindi sapat na makasuhan at makulong lamang ang mga sangkot.

Una nang ipinag-utos ng Anti-Money Laundering Council ang pag-freeze sa ari-arian nina Ako Bicol Partylist Representative Zaldy Co at iba pa.

— sa panulat ni John Riz Calata

Iginiit ng law professor at 1Sambayan convenor na si Atty. Howard Calleja na dapat agad makita ng publiko ang resulta ng itinatag na Independent Commission on Infrastructure ni Pangulong Ferdinand Marcos Jr.

Sa panayam ng DWIZ, sinabi ni Calleja na hindi Department of Justice kundi korte ang dapat magdesisyon kung sino ang puwedeng ma-discharge bilang akusado at gawing state witness kaugnay ng maanomalyang flood control projects.

Kaugnay naman ng restitution, binigyang-diin ni Calleja na maaaring maging bahagi ng pag-uusap sa DOJ at akusado ang pagbabalik ng pera—ngunit dapat buo itong maibalik at hindi bahagi lamang.

Tinukoy rin ng abogado na ang pondong ginamit ay mula sa unprogrammed funds o inutang ng Pilipinas, kaya dagdag-pasanin sa mamamayan kung hindi mababawi nang buo ang pondo.

Ipinag-utos ni Pangulong Ferdinand Marcos Jr. sa mga otoridad na tiyaking may sapat na ebidensya laban sa mga iniimbestigahang personalidad at opisyal na sangkot sa maanomalyang flood control project.

Ayon kay Palace Press Officer Claire Castro, layon nitong matiyak na hindi na makakalusot sa pananagutan ang mga ito.

Dagdag pa ni Usec. Castro, nais matiyak ng Presidente na hindi makakatakas ang mga tunay na taksil sa interes ng taumbayan.

Nais din ng Pangulo na maibalik sa taumbayan ang mga nanakaw na pondo, at iginiit na hindi sapat na makasuhan at makulong lamang ang mga sangkot sa anomalya.

Una nang ipinag-utos ng Anti-Money Laundering Council ang pag-freeze sa ari-arian nina Ako Bicol Partylist Representative Zaldy Co at iba pa.

Tiniyak ng Malacañang na walang makaliligtas sa sinumang mapatutunayang sangkot sa maanomalyang flood control projects sa bansa.

Ayon kay Presidential Communications Office Undersecretary Claire Castro, malinaw ang direktiba ni Pangulong Ferdinand Marcos Jr. na panagutin ang lahat ng tiwaling opisyal at indibidwal na umabuso sa pondo ng bayan.

Naniniwala ang Palasyo na nakikita na ang unti-unting resulta ng pinaigting na imbestigasyon na iniutos mismo ng Pangulo.

Kabilang sa mga unang tumugon ang Department of Justice, National Bureau of Investigation, Department of Public Works and Highways, at iba pang ahensya ng pamahalaan.

Matapos suriin at pag-aralan ang nakalap na ebidensya, agad na kumilos ang mga nabanggit na ahensya upang masampahan ng kasong kriminal ang mga itinuturing na dawit sa anomalya.

Pinatitiyak din ng Pangulo na sapat at matibay ang mga ebidensya bago isampa ang mga kaso.

Tiniyak ni Education Secretary Sonny Angara na nananatiling matatag ang Department of Education sa pagpapanatili ng pinakamataas na pamantayan ng integridad sa kanilang trabaho.

Ito’y matapos pangalanan ni dating DPWH Undersecretary Roberto Bernando si Education Undersecretary Trygve L. Olaivar na sangkot sa sinasabing katiwalian sa flood control projects.

Kasabay nito, kinumpirma ni Secretary Angara na si Undersecretary Olaivar ay boluntaryong nag-leave upang bigyang-daan ang due process at maiwasan ang anumang distraksyon sa operasyon ng kagawaran.

Giit ng DepEd na hindi maaapektuhan ng isyu ang kanilang pangunahing mandato na maghatid ng dekalidad na edukasyon para sa bawat Pilipino.

Umakyat na sa ₱964.45 milyon ang halaga ng pinsala at pagkalugi sa sektor ng agrikultura dahil sa pinagsamang epekto ng habagat at mga bagyong Mirasol at Nando.

Batay ito sa ulat ng Department of Agriculture kung saan Pinakamatinding tinamaan ang ng palay na may 71.33%, sinundan ng mais 19.73% at high-value crops na may 8.47%.

Bahagya ring napinsala ang imprastrukturang agrikultural, livestock at poultry, irrigation facilities, at makinarya.

Sa tala ng DA, apektado ang 32,738 magsasaka at mangingisda habang umaabot sa 32,384 ektarya ang lawak ng taniman na napinsala.

Sa kabuuang lawak, 27,992 ektarya ang may posibilidad pang makarekober, habang 4,392 ektarya ang tuluyang hindi na maisasalba pa.

Tinatayang 82,557 metric tons ang kabuuang volume loss sa produksyon ng pagkain.

Posible namang tumaas pa ang datos ng pinsala sa sektor ng agrikultura dahil sa nagpapatuloy na assessment sa mga apektadong rehiyon.

Tiniyak ng Metropolitan Manila Development Authority na handa ang buong Kalakhang Maynila sa posibleng epekto ng Severe Tropical Storm Opong.

Sa pagpupulong ng Metro Manila Disaster Risk Reduction and Management Council sinabi ni MMDA Chairman at MMDRRMC head Atty. Don Artes na activated na ang Emergency Operations Center ng ahensya mula pa kaninang alas-sais ng umaga upang bantayan ang sitwasyon.

Aabot sa 380 personnel mula sa iba’t ibang unit ng MMDA ang nakahandang i-deploy, kasama ang mga rubber at motorized boats, chainsaws, extrication tools, ambulansya, tow trucks, at military trucks.

Tiniyak din ni Chairman Artes na operational ang lahat ng 71 pumping stations ng MMDA, habang patuloy na imo-monitor ang mga bahaing lugar gaya ng Quezon City at CAMANAVA area.

Nagbabala rin ang opisyal sa publiko na iwasan ang hindi kailangang biyahe sa Biyernes at weekend bunsod ng inaasahang malalang lagay ng panahon.

Kabilang sa mga dumalo sa emergency council meeting ang mga kinatawan mula sa DOST-PAGASA, DENR-MGB, DILG, DICT, DPWH, DOLE, DHSUD, DOT, PIA-NCR, AFP-NCR, Coast Guard, BFP, at Philippine Red Cross.

Flood control project sa Davao Occidental, ideklarang ghost projects.

Flood control projects sa Jose Abad Santos, Davao Occidental nakalista bilang fully paid at completed noon pang 2022.

Pero ayon sa mga residente at barangay officials, sinimulan lamang ang konstruksyon nito noong dalawa hanggang tatlong linggo ang nakalilipas.

Dahil dito, idineklarang ghost project ang naturang proyekto na nagkakahalaga ng mahigit 96 million pesos at ang kontraktor nito ay ang St. Timothy Construction Corporation na pag-aari ng mag-asawang Discaya.

Kasunod ito ng isinagawang inspeksyon nina DPWH Secretary Vince Dizon at Baguio City Mayor at Independent Commission for Infrastructure Special Adviser Benjamin Magalong.

Pansamantalang magle-leave sa tungkulin si Education Undersecretary Trygve Olaivar matapos madawit ang kanyang pangalan sa pagdinig ng Senate Blue Ribbon Committee hinggil sa maanomalyang flood control projects.

Mariing itinanggi ni Usec. Olaivar ang mga alegasyong ibinato laban sa kanya at iginiit na bukas siya sa anumang imbestigasyon hinggil sa naturang usapin.

Handa naman ang DepEd official na makipagtulungan sa lahat ng mga proseso upang maging patas ang imbestigasyon.