NATIONAL NEWS

Ilulunsad na ng Department of Migrant Workers (DMW) sa darating na October 27 ang OFW DIGITAL App.

Ayon kay DMW Secretary Susan Ople, nakatakda sanang ilunsad ang digital portal sa Oktubre 15, ngunit napagdesisyunan ng ahensya na sa naturang petsa na lamang upang ma-test ito at maiwasan ang maraming glitches.

Sa pamamagitan nito ay magiging simple at mapapabilis na ang pagproseso ng mga dokumento ng mga OFW.

Maaari nang ma-idownload ng mga OFW sa kanilang mobile device ang overseas employment certificate at iba pang mga dokumento.

Sinabi pa ni Ople na maaari ring maglagay ang mga OFW ng iba pang personal files sa naturang application.

Mayroon din itong help desk na maaaring tumugon sa inquiries ng mga OFW.

Umabot na sa mahigit  P34,740,541.03 million pesos ang naibigay na tulong ng Department of Social Welfare and Development (DSWD) at mga lokal na pamahalaan sa mga biktima ng bagyong Karding.

Sa datos mula sa dswd disaster response operations monitoring and information center, napuruhan ng bagyo ang regions I, II, III, CALABARZON, V at CAR.

Nasa 215,798 na pamilya o 796,674 indibidwal ang naapektuhan ng bagyo mula sa 1,794 barangays.

Aabot naman sa 1,198 families ang nananatili sa 36 na evacuation centers habang 9,265 naman ang nanunuluyan sa ibang lugar.

Batay pa sa DSWD Dromic Report, 4,765 na kabahayan ang totally damaged habang 14,548 ang partially damaged.

Nagpapatuloy naman ang validation at assessment ng DSWD sa mga naapektuhan ng bagyong Karding.

NASAGIP ng pinagsanib na pwersa ng Malaysian Royal Police (Police Attaché’), SPD District Special Operations Unit (DSOU), District Intelligence Division (DID), District Mobile Force Battalion (DMFB), at Muntinlupa City Police Station ang isang Malaysian National at 33 iba pang foreign nationals mula sa isang Philippine Offshore Gaming Operators (POGO) firm sa Muntinlupa City.

Kinilala ang suspek na si Qian Jing, 35 taong gulang, Chinese national, at sinasabing may-ari ng POGO company na matatagpuan sa Dexin 999 Building, Montillano St., Brgy. Alabang.

Nabatid na inipit ng kompanya ang sahod ng Malaysian na si Soh Teck Koung, 25 taong gulang, at hindi pinapayang lumabas ng gusali.

Binantaan din umano si Koung na sasaktan kapag nagsumbong ito sa mga alagad ng batas.

Nakausap sa telepono ng biktima ang kanyang ina sa Malaysia ukol sa kanyang sitwasyon kaya’t nagsumbong ito sa mga awtoridad doon na siya namang nakipag-ugnayan sa kanilang counterparts sa Pilipinas.

Matapos ang isinagawang verification, wala ring nakipakitang business permit ang POGO company ni Jing mula sa Business Permit and Licensing Office (BPLO) ng Muntinlupa City.

Nakatakdang sampahan ng kaukulang reklamo ang nasabing suspek.

Nagbabala ang Philippine Institute of Volcanology and Seismology (PHILVOLCS) kaugnay sa muling pagbuga ng sulfure dioxide ng bulkang Taal kagabi.

Batay sa abiso ng PHIVOLCS, hindi bababa sa 10,718 tons ng volcanic sulfur dioxide ang ibinubuga nito kada araw na nagresulta ng volcanic smog o vog sa Taal Caldera.

Ang vog ay maliliit na droplet na binubuo ng volcanic gas gaya ng sulfure dioxide na acidic at maaaring magdulot ng iritasyon sa mata, lalamunan at respiratory tract sa oras na malanghap.

Nagpaalala naman ang ahensya sa mga residente malapit sa lugar, partikular na ang mga dumaranas ng hika, sakit sa baga, sakit sa puso, matatanda, buntis at iba pa na iwasan ang mga aktibidad sa labas at gumamit ng face mask.

Itataas ng gobyerno sa 2.5% mula sa 1% ang paggamit ng renewable energy sa bansa.

Ito ay sa bisa ng department circular no. 2022-09-0030 ng Department of Energy (DOE).

Ayon kay Press Secretary Attorney Trixie Cruz-Angeles, kaugnay ito sa proyekto ng Marcos Jr. administration na makapagbigay ng sapat at malinis na enerhiya.

Nabatid na ang naturang hakbang ay kabilang sa Renewable Portfolio Standards (RPS) na magpapataas sa paggamit ng renewable energy tulad ng solar, wind at hydro energy na pwedeng gamitin bilang suplay ng kuryente.

Inihayag ng isang grupo na matagal na silang nababahala at nananawagan sa gobyerno na aksyunan ang pag-alis ng mga nurse sa bansa.

Sa panayam ng DWIZ, sinabi ni Filipino Nurses United Secretary General Jocelyn Andamo na sa sitwasyon ngayon ay mababa talaga ang natatangap na sahod ng mga nurse.

Bukod aniya sa sahod, kabilang din sa kanilang problema ang nurse work condition o bigat ng workload at ang matagal ng pagiging contractual.

13  istasyon ng Edsa Carousel stations ang nilagyan ng bus timer para sa mas maayos na biyahe ng mga bus.

Ang timer ay binubuo ng tatlong ilaw kung saan ang itaas ay stop-sign, timer naman ang pang-gitna at go-sign ang baba.

Kabilang sa naturang mga istasyon na kinabitan ng timer ang

• Monumento MCU
• Bagong Barrio
• Balintawak
• Muñoz
• North Avenue, MRT Station
• Quezon Avenue, MRT Station
• Q-Mart
• Main Avenue
• Ortigas MRT
• Guadalupe MRT
• Buendia
• Taft Avenue At,
• Roxas Boulevard

 Layon din ng Department of Transportation (DOT) na magdagdag pa ng istasyon ng Edsa carousel sa Kamuning, Tramo at Magallanes.

Bahagyang tumaas ang naitalang 7-day positivity rate sa National Capital Region (NCR).

 Batay sa inilabas na datos ni OCTA Research Fellow Dr. Guido David, mula sa 17.5% noong nakalipas na linggo, umabot sa 18.9% ang positivity rate sa rehiyon nitong September 28.

Bumulusok naman sa 1.10 ang reproduction number sa Metro Manila, mula sa naitalang 1.28 noong September 19.

Ayon kay David, bagmat bumagal aniya ang pagdami ng bagong infections, ay tumataas pa rin ang mga kaso.

Nakapagtala naman ang NCR ng Average Daily Attack Rate (ADAR) na 7.42 sa kada 100,000 populasyon, na itinuturing na moderate.

Sa kabila nito, mababa pa rin ang healthcare utilization rate sa Metro Manila na nasa 35% habang nasa 29% ang ICU occupancy.