NATIONAL NEWS

 Pinagtibay na ng kamara ang resolusyong magbibigay parangal sa 5 miyembro ng rescue personnel sa Bulacan na nasawi sa gitna ng pananalasa ng bagyong Karding.

Sa House Resolution Number 421, kinilala ang natatanging kagitingan nina Narciso Calayag Jr., Jerson Resurreccion, Marby Bartolome, George Agustin, at Troy Justin Agustin.

Namatay ang 5 matapos silang tangayin ng tubig baha habang nasa San Miguel, Bulacan.

Matatandaang sa mga lugar na sinalanta ng bagyong Karding, ang lalawigan ng Quezon, Aurora, Zambales, Tarlac, at Nueva Ecija ang pinaka-napinsala na nakaapekto sa kalapit na lalawigan gaya ng Bulacan at Pampanga at Metro Manila.

Nagpositibo sa red tide toxin ang  5 baybayin sa 4  na lalawigan sa Visayas at Mindanao.

Batay sa abiso ng Bureau of Fisheries and Aquatic Resources (BFAR), ang mga lugar na nakitaan ng red tide ay ang Dumanquillas Bay sa Zamboanga Del Sur at Lianga bay sa Surigao Del Sur.

Kasama rin sa nakitaan ang mga baybayin sa Dauis at Tagbilaran City Bohol at sa Matarinao Bay sa Eastern Samar.

Dahil sa pagpositibo sa toxic red tide, pinayuhan ng BFAR ang mga publiko na huwag munang kumain ng shellfish mula sa mga nasabing lugar.

Dapat ding iwasan ang pagkain ng mga lamang-dagat gaya ng isda, pusit, hipon at alimango.

Lumobo pa sa P 2.95- B ang pinsalang idinulot ng bagyong Karding sa sektor ng agrikultura sa bansa.

Batay sa pinakahuling datos ng Department of Agriculture (DA) na ibinase sa Disaster Risk Reduction and Management Operations Center(DRRM) , mas malaki ito kumpara sa P 2.02 B na naitala kahapon.

Nasira ng bagyo ang aabot sa 164,217 ektarya ng pananim sa Cordillera Administrative Region(CAR), Ilocos Region, Cagayan Valley, Central Luzon, CALABARZON, Bicol Region, at Western Visayas na nakaapekto sa 103,552 magsasaka at mangingisda na may production loss na 154,734.

Ang mga produktong naapektuhan ng bagyo ay palay, mais, high-value crops, livestock, poultry at fisheries.

Pumalo na sa 386 ang bilang ng mga paaralan na lubos na napinsala ng pananalasa ng bagyong Karding.

Ayon kay Michael Poa, Tagapagsalita ng Department of Education (DepEd), nasa 165 paaralan ang nagtamo ng pinsala sa imprastruktura sa bansa.

Dahil dito, kailangan nila ng P 1.17 – B para sa kontruksyon at pagsasaayos.

Hindi pa naman masabi ni poa na eksakto na ang pondong kailangan sa pagsasaayos dahil posible pa itong magbago kung magsasagawa ng inspeksyon ang deped sa mga paaralan.

Sa ngayon, nakikipag-ugnayan na ang deped sa mga lgus para tignan kung mayroong pansamantalang espasyo ang mga ito na maaaring pagdarausan ng klase.

Kinalma ng Metropolitan Waterworks and Sewerage System (MWSS) ang publiko kaugnay sa posibleng taas-singil sa tubig sa susunod na taon, bunsod ng patuloy na paghina ng piso kontra dolyar.

Ayon kay Patrick Ty, Chief Regulator ng MWSS regulatory office, kakaunti lamang ang ipapatong nila sa kanilang singil dahil hindi pa ganoon kalala ang epekto ng mataas na palitan.

Bagaman wala pang eksaktong datos kung magkano ang idaragdag sa singil, sinabi ng MWSS sa pulong na posibleng maglaro sa 25 kada cubic meter ang ipapatong ng Maynilad sa kanilang singil.

Dahil dito, ang mga residential consumers na kumokonsumo ng 10 hanggang 30 cubic meters kada buwan ay magbabayad ng dagdag na P 2.50 hanggang P 7.50 centavos sa kanilang bill.

Sinimulan nang I-block ng giant network na globe telecom ang mga text messages na naglalaman ng website links.

Sa gitna ito ng nakakaalarmang pagkalat ng spam at scam messages sa bansa.

Ayon kay anton bonifacio, chief information security officer ng globe, mahigpit na panuntunan ito kumpara sa nauna nilang aksyon na I-block ang pagtungo sa mga links na nakita ng globe na kakaiba.

Una rito, sinabi ng globe na umabot na sa 784 milyong spam at scam message ang kanilang iblinock kasama ang 14 thousand 58 sim cards at 610 domains o urls na nakalagay sa spam messages.

Ang smart din ang nakapag-block na ng 11 bilyong text messages attempts at 200 thousand mobile number na may kinalaman sa spam.

Posibleng bumilis sa 6.6 hanggang 7.4 % ang inflation rate sa Pilipinas ngayong Setyembre.

Sinabi ito ng Bangko Sentral ng Pilipinas (BSP) matapos bumilis ang pagtaas ng bilihin noong Agosto na nasa 6.3 % na.

Ayon sa BSP, malaki ang naging epekto sa pabago-bagong presyo ng bilihin ng pagtaas ng singil sa kuryente at presyo ng mga produkto.

Idinagdag naman ng BSP na ang pagtaas ng mga presyo ng bilihin ngayong buwan ay posibleng mabawi sa bahagyang pagbaba ng presyo ng gasolina at karne.