NATIONAL NEWS

Bahagyang lumakas ang halaga ng piso kontra dolyar.

Mula sa naitalang 58.98 kada dolyar noong Miyerkules, nagsara ang palitan kahapon sa 58.91.

Ayon kay Chief Economist Michael Ricafort ng Rizal Commercial Banking Corporation (RCBC), nakakuha ng suporta ang piso mula sa overnight correction ng global stocks at bonds at ang downward correction ng greenback kasunod ng temporary long-dates bond purchases program ng Bank of England.

Samantala, tinitingnan ni Ricafort ang susunod na resistance level ng piso sa pagitan ng 59.00 hanggang 59.25, habang ang agarang suporta ay tinatayang nasa 58.50 hanggang 58.75 levels. —sa panulat ni Hannah Oledan

Gagawing prayoridad ng City Social Welfare and Development Office (CSWDO)  sa Davao City ang 2 nitong proyekto para sa mga babae na ‘children in conflict with the law’ (CICL) at sa mga kalalabas pa lamang mula sa drug rehabilitation centers.

Ayon kay CSWDO chief Marlisa Gallo, nakapaloob ang mga nasabing inisyatibo sa Executive Legislative Agenda (ELA 2023-2025).

Sa kasalukuyan, mayroon nang Bahay Pag-asa ang lungsod para sa mga lalaking offender.

Nakatanggap na ng kanilang sahod ang tinatayang 1,192 students at out-of-school youths’ para sa 20-day work na pinasukan nila sa mga lokal na pamahalaan sa Surigao del Norte.

Ayon kay Ms. Anya Sollano ng Department of Labor and Employment-Caraga Region o DOLE-13 information office, mahigit limang libong piso ang nakuha bawat isa ng mga estudyante sa ilalim ng Special Program for Employment of Students o SPES ng ahensya.

Sa kabuuang bilang mga benepisyaryo, 298 ay mula sa anim na bayan sa Siargao Island, partikular sa Del Carmen, San Isidro, San Benito, Pilar, Santa Monica, at Pilar.

Muling tiniyak ng Bureau of Fisheries and Aquatic Resources (BFAR) na sapat ang suplay ng isdang “tamban” sa bansa.

Taliwas sa napaulat na magkakaroon ng kakulangan sa sardine products, binigyang diin ni BFAR-9 Director Isidro Velayo Jr. na ang ‘annual catch’ ng sardinas ay 300,000 metric tons batay na rin sa datos ng Philippine Statistics Authority.

Matatandaang ibinabala ng Canned Sardines Association of the Philippines na posibleng magkaroon ng kakulangan sa suplay ng “tamban” kung magpapatuloy ang mababang produksiyon nito.

Natapos na ng Department of Public Works and Highways (DPWH) ang konstruksiyon ng isang flood mitigation structure sa Tarlac na ginawa upang matiyak ang kaligtasan at seguridad ng mga residente tuwing panahon ng tag-ulan.

Ayon kay Tarlac 2nd District Engr. Edward Ricardo Ramos, ang higit 500 metrong flood mitigation project sa Bangot River sa Barangay Sta. Lucia sa bayan ng Capas ay nagkakahalaga ng P 94.5 milyon.

Itinayo ang concrete structure upang maprotektahan ang mga sakahan at komunidad laban sa pagbabaha.