NATIONAL NEWS

Umaabot sa 8,000 kabahayan ang nasira sa Polillo Islands matapos ang naging pananalasa kamakailan ni Typhoon Karding.

Ayon kay Quezon Governor Helen Tan, nangangailangan sila ng mga construction materials upang maisaayos ang mga na-damage na bahay ng mga residente.

Nasa P30 million ang inilaang pondo ng provincial government mula sa kanilang quick response fund upang asistehan ang mga apektadong residente.

Mahigit 300 bangka naman sa Barangay San Juan ang hindi na magamit ng nasa 1,000 mangingisda makaraang masira sa hagupit ng bagyo.

Pahayag ng Quezon Provincial Agriculture Office, nag-iwan din si Karding ng P100-M halaga ng agricultural damage sa kanilang lalawigan.

Aabot naman sa humigit-kumulang P430M ng mga agrikulutura at imprastraktura ang napinsala sa Dingalan, Aurora.

Bunsod nito, umaapela ang mga residente doon ng mga tulong o ayuda gaya ng pagkain, malinis na tubig, damit at mga construction materials.

Samantala, patuloy ang isinasagawang pagsasaayos ng mga kinauukulang ahensya para maibalik ang suplay ng kuryente sa ilang lugar sa Nueva Ecija.

Pumapalo naman sa 5,000 residente ang naapektuhan ng mga pagbaha sa lalawigan ng Pampanga.

Pinangunahan ng Department of Health (DOH) ang paglulunsad ng “Bakunahang Bayan: Pinaslakas Vaccination Days” sa Trece Martires City, kasama ang iba pang ahensya ng pamahalaan at mga Non-Government Organization (NGO’s).

Binigyang diin ni officer-in-charge secretary Rosario Vergeire ang kahalagahan ng pagbabakuna kontra COVID-19 at pagpapa-booster shot.

Noong Setyembre 29, may kabuuang 3,081,830 indibidwal ang naturukan ng booster shot habang 1,049,085 indibidwal mula sa a2 ang nabakunahan sa rehiyon.

Samantala, hinihikayat ng kagawaran ang bawat Caviteño na magpabakuna na ng primary series at booster doses upang mas mapatibay ang wall of immunity. —sa panulat ni Jenn Patrolla

Isinulong ni Pinuno Partylist Rep. Howard Guintu ang panukalang House Bill 3194 o pabahay para sa government nurses sa Pilipinas.

Ayon kay Guinto, makatutulong ang panukala para mapanatili ang mga nurses sa bansa.

Katuwang din ang mga nurse sa pagsusulong ng health and wellness para sa mamamayan.

Gayunman, magkakaroon ng mandato para sa implementasyon at pagtustos sa proyektong pabahay ang ibat-ibang ahensya ng gobyerno tulad ng National Housing Authority (NHA), National Home Mortgage Finance Corporation, Home Guaranty Corporation at Government Service Insurance System (GSIS).

Pinatitiyak naman ng panukalang inihain ng mambabatas ang tamang koleksyon ng amortization payments sa housing loan sa pamamagitan ng salary deduction scheme. —sa panulat ni Jenn Patrolla

Bumisita si Vice President Sara Duterte sa mga residente ng Barangay Tangos North, Navotas City para mamahagi ng regalo.

Ipinamahagi ni Inday Sara ang Pasasamalat gifts para sa mga mangingisda at residente.

Ginawa ito ng bise presidente bilang bahagi ng kanyang pasasalamat sa mga taga-Navotas dahil sa kanilang ibinigay na suporta noong eleksyon.

Samantala, sariling desisyon at inisyatibo ni Vice President Sara Duterte ang pagtungo sa lungsod para bisitahin at maghatid ng tulong-donasyon sa mga naninirahan doon. —sa panulat ni Jenn Patrolla

Magandang pagkakataon ang pagkikita nina Pangulong Ferdinand Marcos at Foreign Minister Prince Faisal bin Farhan Al Saud para pag-usapan ang kapakanan ng mga Overseas Filipino Worker (OFW) sa Saudi Arabia.

Ayon kay Press secretary Atty. Trixie Cruz Angeles, nagbigay ito ng pagkakataon, lalo na kay Pangulong Marcos, para matalakay ang isyu hinggil sa kapakanan ng mga OFW.

Kabilang din sa napag-usapan nina Pang. Marcos at Prince Al-Saud ang higit na pagpapaigting ng relasyon at kooperasyon sa ibat-ibang usapin ng Pilipinas at Saudi Arabia. —sa panulat ni Jenn Patrolla

Isasara na ang Meralco Avenue sa kahabaan ng Ortigas sa Pasig City simula Lunes, October 3, para masimulan na ang pagpapatayo ng Metro Manila Subway Project (MMSP).

Ganap na alas-9 ng gabi hindi na madadaanan ng mga motorista ang Northbound at Southbound lane mula sa front section ng Capitol Commons hanggang sa kanto ng Shaw Boulevard.

Ayon sa Department of Transportation (DOTr) mananatili ang pagsasara hanggang 2028.

Magsisilbing alternative routes ng mga E-Jeep ang Doña Julia Vargas Avenue hanggang San Miguel Avenue at pwede ring dumaan dito ang mga UV Express hangang Camino Verde.

Samantala, ang mga pribadong sasakyan ay maaring dumaan sa alinman sa mga nabanggit na alternatibong ruta. —sa panulat ni Jenn Patrolla