NATIONAL NEWS

Pumalo na sa mahigit isang milyong pamilya ang naapektuhan ng bagyong Karding sa Luzon.

Ayon sa National Disaster Risk Reduction and Management Council (NDRRMC), umabot na sa 299,127 pamilya o katumbas ng 1,072,282 indibidwal ang naapektuhan ng naturang bagyo.

Sa nasabing bilang, nasa 821 pamilya o mahigit 3,000 indibidwal ang nananatili sa 26 na evacuation centers.

Habang nasa mahigit 8,000 naman ang nakikitira sa kanilang mga kamag-anak.

Wala namang bagong naipaulat na nasawi at nananatili sa 12 ang bilang ng mga namatay, 52 ang sugatan at lima ang nawawala dahil sa bagyong Karding.—sa panulat ni Hannah Oledan

Permanente nang ipatutupad ng Land Transportation Franchising and Regulatory Board (LTFRB) ang bagong minimum na pasahe sa mga Public Utility Vehicle (PUV) simula bukas.

Ngunit ayon kay transport secretary Jaime Bautista, bagama’t aprubado na ang taas-singil ay dapat munang ipaskil ng mga transport operator at driver ang bagong fare matrix sa loob ng kanilang sasakyan.

Ayon naman kay LTFRB chairperson Cheloy Garafil, hindi ito makakaapekto sa mga ipinatupad na price rollback.

Gayunpaman, pag-aaralan pa aniya ng kanilang ahensya ang pagtatakda ng akmang benchmark level depende sa magiging galaw ng presyo ng petrolyo.

Matatandaang naaprubahan ng LTFRB ang pisong dagdag-pasahe para sa Modern Public Utility Jeepneys (MPUV) kamakailan.

Kaugnay nito, magiging P12 na ang minimum fare para sa traditional PUV at P14 naman sa mga MPUV.—sa panulat ni Hannah Oledan

Nailipat na ang ibang pasyente ng COVID-19 sa Manila COVID-19 field hospital.

Ito ay bunsod ng tumataas na bilang ng kaso ng COVID-19 sa Metro Manila.

Pagbibigay-alam ni DOH officer-in-charge Maria Rosario Vergeire, nasa limang lugar sa National Capital Region ang nakitaan nila na halos puno ang mga ospital partikular sa kanilang ward.

Nakipagpulong na rin aniya ang kanilang ahensya sa mga lokal na pamahalaan at hospital administrators sa NCR para mailipat ang mga mild at asymptomatic patients sa decongested na mga ospital gaya ng manila COVID-19 field hospital.

Sa kasalukuyan, sinabi ni Atty. Princess Abante, tagapagsalita ni Manila Mayor Honey Lacuna, nasa 38 pasyente pa lamang ang naka-admit sa naturang ospital, batay sa datos ng Manila Health Department.

Isinusulong ni Commission on Elections na isakriminal ang nuisance candidates.

Kasunod ito ng pagpapawalang bisa ng comelec kamakailan sa pagkapanalo ni Negros Oriental governor Henry Teves noong Mayo 2022 sa gobernatorial race

Matapos na ang mga boto na nakuha ng isang nuisance candidates na   nagngangalang “Ruel Degamo” ay na-credit sa isa pang kalaban nito na si dating gobernador Roel Degamo.

Ayon kay Comelec spokesperson John Rex Laudiangco, dapat itong ma-criminalize dahil sa nagiging uso ito.

Dahil kada eleksyon na lang aniya ay, mayroon at mayroong tumatakbo na halos kapangalan, katunog ng pangalan ng mga lehitimong kandidato na ang tanging dahilan ay para gawing mockery ang eleksyon at lituhin ang mga tao.

Isinusulong ni Surigao Del Norte Rep. Robert Ace Barbers ang pagsailalim sa mandatoryong drug test sa mga artista at iba pang celebrity bago sila magsagawa ng kanilang mga proyekto o serbisyo.

Ayon kay Barbers, dapat drug-free ang mga artista, at iba pang movie celebrity dahil public figure sila na iniidolo ng publiko partikular ang kabataang Pilipino

Aniya magbibigay kasi sila ng masamang halimbawa kung sila ay masasangkot sa paggamit ng droga, o pagbebenta nito

Kasunod ito ng pag-aresto ng Quezon City police sa aktor na si Dominic Roco at sa apat nitong kasamahan.

Pumalo na sa 46,452  ang bilang ng mga lumikas isang linggo matapos ang paghagupit ng bagyong Karding .

Batay ito sa pinakabagong tala ng National Disaster Risk Reduction and Management Council (NDRRMC) ngayong araw.

Kung saan 3,098 mula sa bilang na ito ay nanatili pa rin sa 26 na evacuation centers, habang ang iba ay nasa ibang lugar.

Ang mga naapektuhan ay mula sa 30 probinsya sa Region 1, 2, 3, 4A, 4B, 5 at Cordillera

Habang mahigit isang milyong tao o nasa 300,000 pamilya naman sa buong Luzon ang naapektuhan din ng bagyo.