NATIONAL NEWS

Arestado ang isang babaeng buntis dahil sa umano’y pagtutulak ng shabu sa Faculty Street, Brgy  Sta. Ana, Taguig City.

Kinilala ni Southern Police District Acting Director PCol. Kirby John Kraft ang suspek na si Christie De Castro Santos, alyas Kim, 34 taong gulang, at isa sa mga itinuturing na high-value targets sa lungsod.

Bukod sa limang daang pisong buy-bust money, nasabat din mula kay Santos ang mahigit kalahating milyong pisong halaga ng hinihinalang shabu.

Mahaharap ang suspek sa reklamong paglabag sa Comprehensive Dangerous Drugs Act.

Samantala, pinuri naman ni Kraft ang suporta ng mga komunidad sa kampanya ng SPD laban sa iligal na droga.

Hindi aniya magtatagumpay ang kampanya laban sa ipinagbabawal na droga kung walang suporta ang mamamayan.

Asahan na bukas ang ika-limang sunod na linggong bawas-singil sa presyo ng produktong petrolyo.

Ayon sa ilang kumpaniya ng langis, maglalaro sa .50 centavos hanggang .60 centavos ang magiging tapyas-presyo sa kada litro ng diesel.

Nasa .40 centavos hanggang .50 centavos naman ang magiging bawas-singil sa kada litro ng gasolina habang posible namang pumalo sa P1. 35 centavos ang magiging tapyas sa kada litro ng kerosene.

Sa datos ng Department of Energy, nito lamang September 29, pumalo na sa P61.45 hanggang P71.45 ang presyo sa kada litro ng gasolina habang P65.90 hanggang P74.84 naman sa kada litro ng diesel.

Nagsimula nang magsibalikan sa kani-kanilang mga tirahan ang mga pamilyang naapektuhan ng bagyong Karding.

Ayon sa National Disaster Risk Reduction and Management Council (NDRRMC), nasa mahigit 800 pamilya o katumbas ng 3,000 indibidwal na lamang ang nananatili sa mga evacuation centers makaraang mag-uwian sa kanilang mga tahanan ang nasa 7,000 indibidwal.

Matatandaang sinalanta ng Super Typhoon Karding ang Luzon partikular na ang Regions 1, 2, 3, 5, CALABARZON, MIMAROPA at Cordillera Administrative Region (CAR) kung saan, lumobo pa sa 299,127 pamilya o katumbas ng 1.72 milyong katao ang naapektuhan ng nagdaang bagyo.

Sa ngayon, nananatili sa 12 ang bilang ng mga nasawi; 5 ang patuloy pang pinaghahanap ng mga otoridad; habang 52 naman ang bilang ng mga sugatan bunsod ng pananalasa ni bagyong Karding.

Nagpaabot ng tulong ang Philippine Amusement and Gaming Corporation (PAGCOR) sa pamilya ng limang rescuer na nasawi habang nasa kasagsagan ng kanilang operasyon bunsod ng pananalasa ng bagyong Karding sa San Miguel, Bulacan.

Nakatanggap ng tig-P100-K ayuda ang mga kaanak nina Narciso Calayag, Jr.; Jerson Resurreccion; Marby Bartolome; George Agustin; at Troy Justin Agustin bilang pagkilala ng pagcor sa kabayanihan at katapangan na ipinakita ng limang rescuer para sa kanilang serbisyo.

Nito lamang Setyembre a-30, namahagi rin ang PAGCOR ng relief packs para sa mga apektadong pamilya sa iba’t ibang lugar sa Luzon na pinadapa ng typhoon Karding.

Muling nagpaalala sa publiko ang OCTA Research Group hinggil sa pagsusuot ng face mask sa gitna ng tumataas na kaso ng COVID-19 sa bansa.

Ito’y matapos makapagtala ng 15.2% positivity rate mula September 25 hanggang 30 na mas mataas ng tatlong beses sa 5% sa point of reference na itinakda ng World Health Organization (WHO).

Ayon kay OCTA Research Fellow Prof. Ranjit Rye, hindi nabibigyan ng kahalagahan ng publiko ang mga programa ng gobyerno dahilan kaya tumataas ang kaso ng COVID-19.

Sinabi ni Rye, na dapat maging mapagbantay ang publiko at ikunsidera ang pagsusuot ng face mask lalo na sa gitna ng tumataas na kaso ng nakakahawang sakit.

Iginiit ni Rye, na malaking tulong ang pagsusuot ng face mask lalo na kung nasa loob ng pampublikong sasakyan at mga establisyimento.

Sa kabila nito, naniniwala si Rye, na bababa ang kaso ng COVID-19  kung papahalagahan ng publiko ang mga programa ng gobyerno partikular na ang pagpapabakuna at pagsunod sa minimum health protocols.

Asahan ang maaliwalas na panahon sa Luzon na may tiyansa ng mga thunderstorms sa hapon hanggang sa gabi.

Ayon kay PAGASA weather specialist Patrick del Mundo, magpapatuloy ang mga pag-ulan sa silangang bahagi ng Luzon partikular na sa Isabela, Aurora, Quezon Province, Camarines Province at Catanduanes dahil pa rin sa patuloy na pag-iral ng easterlies.

Magiging maaliwalas naman ang panahon sa Visayas at Mindanao maliban na lamang sa mga tiyansa ng pag-ulan lalo na sa hapon hanggang sa gabi bunsod ng Inter-Tropical Convergence Zone (ITCZ).

Agwat ng temperatura sa Metro Manila ay maglalaro sa 24 hanggang 32°C habang sisikat naman ang haring araw mamayang 5:46 ng umaga at lulubog naman ito mamayang 5:44 ng hapon.