HOT STORIES OF THE WEEK

Walang nakikitang pangangailangan ang Department of National Defense o DND na palakasin ang presensya ng militar at maglagay ng base sa pinag – aagawang Spratlys.

Ayon kay Defense Secretary Dlefin Lorenzana, mas gumaganda ang relasyon sa pagitan ng China at mga miyembro ng Association of Southeast Asian Nations o ASEAN matapos ito magpahayag ng commitment na madaliin ang gagamiting Code of Conduct sa South China Sea.

Paliwanag ni Lorenzana, walang dahilan na maghigpit ng seguridad ang Pilipinas sa Spratlys dahil walang anumang banta ng pag – atake.

Nakabatay din aniya ang desisyon sa pangako ng mga miyembrong bansa ng ASEAN na kanilang igagalang ang sobereniya ng bawat isa at pagpapatuloy ng diyalogo para sa masolusyunan ang usapin sa agawan ng teritoryo.

Dagdag ni Lorenzana, magbibigay – daan din ito sa walang tigil na konstruksyon at pagsasaayos ng mga pasilidad sa Pag – asa Island na isa sa mga islang inuukupa ng Pilipinas sa Spratlys.

Inanusyo na ng Partido Demokratiko Pilipino – Lakas ng Bayan ang kanilang 2019 senatorial line up.

Sa isang mass oath taking ng mga bagong PDP – Laban member sa Cebu City, kinumpirma ni House Speaker Pantaleon Alvarez na ilang cabinet member ang sasabak sa senatorial elections.

Pasok sa line up sina Presidential Spokesman Harry Roque, Communications Assistant Secretary Margaux “Mocha” Uson, maging sina Davao City 1st District Representative Karlo Nograles;

Bataan 1st District Representative Geraldine Roman; Negros Occidental 3rd District Representative Albee Benitez at dating Metro Manila Development Authority o MMDA Chairman Francis Tolentino na political adviser ni Pangulong Rodrigo Duterte.

Nagmula sa Liberal Party sina Benitez at Roman, habang dating miyembro ng National Unity Party si Nograles bago umanib sa PDP – Laban.

Inilipat na sa Philippine Coast Guard o PCG ang pagpapatrolya sa West Philippine Sea.

Ito ang inanunsyo ni National Security Adviser Hermogenes Esperon matapos na tanggapin ang dalawang multi – role vessel at tatlo sa sampung bagong speed boat na pangakong donasyon ng Japan.

Ngunit, binigyang – diin ni Esperon, maari pa ring magtungo sa pinag-aagawang bahagi ng West Philippine Sea ang mga barko ng Philippine Navy at Philippine Air Force kung saan sila magsasagawa ng military operation.

Ayon naman kay PCG Spokesman Commander Armand Balilo, agad nilang ide – deploy ang mga bago nilang sea asset pagkatapos ng commissioning ng mga ito.

Samantala, pinangunahan ng PCG ang joint maritime exercise sa Manila Bay kasama ang coast guard ng Japan, US, Malaysia, Indonesia at Vietnam para sa 15th Maritime Law Enforcement Exercise.