HOT STORIES OF THE WEEK

Tuluyan nang sinibak ni Pangulong Rodrigo Duterte sa kanyang puwesto bilang chairman ng Dangerous Drugs Board o DDB si retired General Dionisio Santiago.

Ayon kay Presidential Spokesperson Harry Roque, hindi lamang ito dahil sa isyu ng naging pahayag ni Santiago kaugnay sa mega drug rehabilitation facility sa Nueva Ecija kung hindi dahil sa sangkot aniya ito sa iligal na droga at katiwalian.

Paliwanag ni Roque, nakinabang si Santiago sa ipinagkaloob sa kanyang bahay ni dating Iloilo City Mayor Jed Mabilog na kasama naman sa narco-list ni Pangulong Duterte.

Sinabi pa ni Roque na sangkot din sa katiwalian si Santiago matapos umano nitong gamitin ang pera ng bayan sa kanyang naging biyahe sa Austria at Amerika.

Matatandaang sinabi ni Santiago na isang pagkakamali at “impractical” ang pagtatayo ng mega drug rehabilitation facility sa Nueva ecija dahil kakaunti lamang ang nagpapagamot dito kumpara sa kapasidad nitong 10,000.

(Ulat ni Jopel Pelenio)

Katarungan pa rin ang sigaw ng mga kaanak ng mga biktima ng Maguindanao massacre, walong taon na ang nakakalipas.

Nagkita-kita para sa isang misa at simpleng programa sa massacre site sa barangay Salman sa bayan ng Ampatuan kahapon ang pamilya ng mga biktima ng nasabing masaker para gunitain ang pagkamatay ng mga ito.

Nakiisa rin sa maagang paggunita sa ika-walong anibersaryo ng nasabing masaker sa November 23 ang ilang mamamahayag mula sa Kapisanan ng mga Brodkaster ng Pilipinas o KBP at National Union of Journalist of the Philippines o NUJP.

Ilang aktibidad kaugnay sa nasabing usapin ang nakatakdang isagawa sa Metro Manila sa mismong araw nang paggunita sa Maguindanao massacre kung saan nasawi ang halos 60 katao.

Samantala, binabantayan ng Presidential Task Force on Media Security ang mga kaso kaugnay ng Maguindanao massacre noong 2009.

Tiniyak ito ni Presidential Communications Secretary Martin Andanar bilang tugon sa panawagang hustisya ng pamilya ng mahigit 50 kataong pinatay noong November 23, 2009 kung saan mahigit 30 rito ay mga mamamahayag.

Ayon kay Andanar, isa rin ang Maguindanao massacre sa mga dahilan kung bakit laging kasama sa top 5 ang Pilipinas sa mga bansa na mapanganib para sa mga mamamahayag.

“Nag-commit naman sa atin ang DOJ na bibilis yan of course with Task Force on Media Security ay mas makakaasa tayo na tatakbo itong kaso ng Maguindanao massacre nang mas mabilis, kaya mabagal ang pag-usad sa rating ng pinaka-delikadong mga bansa para sa mga mamamahayag, from number four naging number five na tayo, so kahit papano nag-improve na tayo magmula nang maitatag yung Task Force on Media Security pero ang gusto talaga natin ay maalis tayo sa top five na yun.” Pahayag ni Andanar

Len Aguirre / (Ratsada Balita Interview)

Dumistansya ang dating maintenance provider ng Metro Rail Transit o MRT Line 3 sa anggulo na sabotahe di umano ang insidente ng pagkalas ng dalawang bagon ng MRT-3.

Ayon kay Atty. Charles Mercado, Spokesman ng Busan Universal Rain Incorporated o BURI halos magdadalawang linggo nang kanselado ang kanilang kontrata sa MRT-3 nang maganap ang insidente.

Ipinagtaka ni Mercado ang sinasabi ni Department of Transportation o DOTr na nawawala ang black box ng tren na sangkot sa insidente.

Bukod aniya sa 4 level inspection na dinadaanan ng mga train parts bago bumiyahe, nasa tabi rin ng driver ng train ang black box.

Pinayuhan ni Mercado ang DOTr na mag-focus sa tunay na isyu na posibleng sanhi ng maling disensyo ang pagkalas ng mga bagon ng tren.

Una nang inihayag ni DOTr Undersecretary Cesar Chavez na may natukoy na silang tatlong persons of interest sa anya’y pananabotahe sa MRT-3.

‘3 persons of interest’

Itinanggi ng National Bureau of Investigation o NBI na sa kanila nagmula ang pangalan ng tatlong persons of interest sa di umano pananabotahe sa MRT-3.

Ayon kay NBI Director Dante Gierran, nagpapatuloy pa ang imbestigasyon ng special action unit na kanyang itinalaga sa pamumuno ni Atty. Joel Tovera.

Sinabi ni Gierran na ipauubaya rin nila sa Department of Transportation o DOTr kung isasapubliko, anuman ang kalabasan ng kanilang imbestigasyon.

(May ulat ni Aya Yupangco)