HOT STORIES OF THE WEEK

Inabswelto ng Department of Justice o DOJ si dating Customs Commissioner Nicanor Faeldon sa kasong isinampa laban sa kanya ng Philippine Drug Enforcement Agency (PDEA) na may kaugnayan sa paglusot ng 6.4 na bilyong pisong shabu shipment mula sa China.

Ito ay matapos na mabigo ang PDEA na magharap ng matibay na ebidensya laban sa isinampang kaso sa dating opisyal.

Samantala, sinampahan naman ng DOJ ng kasong paglabag sa Republic Act 9165 o Dangerous Drugs Act ang sinasabing fixer sa Bureau of Customs o BOC na si Mark Taguba at ang negosyanteng si Kenneth Dong.

Kabilang din sa mga kinasuhan sina chen ju Long alyas Richard Chen at Richard Tan na pawang may – ari ng Longfei Logistics Warehouse, kung saan nadiskubre ang 600 kilo ng shabu; negosyanteng si Li Guang Feng alyas Manny Li; Eirene Mae Tatad, ang may – ari ng EMT Trading;

Customs broker na si Teejay Marcellana, pati ang mga Chinese national na sina Chen Min, Jhu Mhing Jyun, Hen Rong Huan at ilan pang Jane at John Does.

Wala namang piyansang inirekomenda ang DOJ laban sa mga akusado.

Nakatakdang bumalik si Pangulong Rodrigo Duterte sa Marawi City, Lanao del Sur, sa susunod na buwan.

Gayunman, nilinaw ni Presidential Spokesman Harry Roque na hindi sa battle ground ang destinasyon ni Pangulong Duterte kundi sa lugar kung saan titira ang mga internally displaced person o IDP.

Ito ay sa Barangay Sagonsongan kung saan matatagpuan ang transitional shelters na titirhan ng mga bakwit na naapektuhan ng limang (5) buwang giyera sa Marawi.

500 transitional shelters ang nakatakdang ipamahagi sa pagbisita ng Pangulo sa Disyembre.

1,175 transitional shelters ang target na maipatayo sa 14 na ektaryang lupain sa naturang barangay na ang bawat isa’y may sukat na 22 square meters.

(Ulat ni Patrol 17 Jopel Pelenio)

Isa – isang ipinaliwanag ni Atty. Larry Gadon sa House Committee on Justice ang mga alegasyon sa impeachment case na isinampa niya laban kay Supreme Court Chief Justice Maria Lourdes Sereno.

Kabilang aniya sa mga paglabag na nagawa ni Sereno sa ilalim ng alegasyong Culpable Violation of the Constitution ang pamemeke ng ilang resolusyon at temporary restraining order (TRO) ng Korte Suprema na taliwas o hindi sinang – ayunan sa Supreme Court En Banc.

Ayon kay Gadon, mayroon siyang mga hawak na dokumento para patunayan ang pamemeke ni Sereno sa ilang resolusyon at TRO, subalit mas makakabuti kung maimbitahan ng komite si Associate Justice Teresita De Castro.

Inamin ni Gadon na hindi niya personal na narinig ang mga alegasyon mula kay De Castro kundi sinabi sa kanya ng Manila Times Reporter na si Jomar Canlas.

Dahil dito, inaprubahan na ng komite ang pag – imbita kina De Castro at Canlas sa pagdinig.

Mga abogado ni CJ Sereno ‘di naka–porma

Agad nag – alisan sa hearing ng House Committee on Justice ang mga abogado ni Supreme Court Chief Justice Maria Lourdes Sereno.

Ito’y matapos ibasura ng komite ang mosyon ni Sereno na payagan ang kanyang mga abogado na ma – cross examine ang mga te – testigo sa kanyang impeachment case.

Ipinarating ni Congressman Kit Belmonte kay Congressman Rey Umali na chairman ng komite ang kagustuhan ng mga abogado na huwag nang pakinggan ang takbo ng pagdinig.

Iginiit naman ni Umali na pagbibigay payo lamang ang papel ng mga abogado kay Sereno subalit hindi nila ito magagawa dahil tumanggi namang dumalo sa pagdinig ang Chief Justice.

Labing isa (11) ang abogado ni Sereno sa pangunguna ni Atty. Alex Poblador.

Tuloy pa rin ang pagdinig ng House Committee on Justice ngayong araw para sa determination of probable cause kaugnay sa impeachment complaint laban kay Supreme Court Chief Justice Maria Lourdes Sereno.

Ito’y sa kabila ng naging pahayag ni Sereno na hindi siya dadalo sa pagdinig at sa halip, ang mga abogado na lang niya ang haharap para magtanong sa complainant na si Atty. Larry Gadon gayundin sa mga testigo nito laban sa punong mahistrado.

Ayon kay House Justice Committee Chairman at Mindoro Representative Reynaldo Umali, bagama’t iginagalang nila ang pasya ni Sereno pagbobotohan pa rin naman ng mga miyembro ng komite kung pagbibigyan ang hirit nito na hayaan ang kaniyang mga abogado na magtanong sa mga testigo.

Una rito, kapwa inihayag nila House Speaker Pantaleon Alvarez at Umali na hindi nila papayagang magtanong ang mga abogado dahil mas nais nilang si Sereno mismo ang humarap at siyang mag-cross examine sa mga saksi.

—-