HOT STORIES OF THE WEEK

Target ng pamahalaan na magkaroon na ng kahit partial resolution ang Maguindanao massacre sa susunod na taon.

Ayon kay Undersecretary Joel Egco ng Presidential Task Force on Media Security, pinag-usapan sa pulong ng Pangulong Rodrigo Duterte at pamilya ng mga biktima sa Maguindanao massacre kung paano bibilis ang pag-usad ng kaso.

Sinabi ni Egco na ipinaliwanag ng Pangulo sa pamilya ng mga biktima na bilang isang dating prosecutor, naunawaan niya kung bakit inabot na ng walong taon ay wala pang nakukuhang hustisya para sa mga napatay noong November 23, 2009 sa Maguindanao.

Matatandaan na 58 katao na kinabibilangan ng mahigit sa 30 miyembro ng media ang pinatay at tinangka pang ilibing sa isang bakanteng lupain sa Maguindanao.

Sa 190 suspects, pitumpu (70) na rito ang pinayagang makapagpiyansa dahil sa kakulangan ng ebidensya kabilang ang isa sa pangunahing suspect na si Datu Sajid Islam Ampatuan.

Apat ang sumakabilang buhay na habang nakakulong kabilang ang isa pa sa primary suspect na si dating Governor Andal Ampatuan Sr. samantalang 102 ang nananatiling sa kulungan kasama sina Andal Ampatuan Jr. at Zaldy Ampatuan.

“Huwag po kayong mainip dahil ganun po talaga ang ikot ng hustisya, kaya sabi niya sa totoo lang makapagpakulong lang tayo ng mga tatlong principal suspects na talaga panalo na po tayo doon.” Pahayag ni Egco

 (Balitang Todong Lakas Interview)

Nagbitiw na sa puwesto si Department of Transportation o DOTr Undersecretary for Rails Cesar Chavez.

Inanunsyo ni Chavez kaninang umaga ang paghahain niya ng irrevocable resignation.

Ito ay sa gitna ng hindi matapos-tapos na problema at aberya sa Metro Rail Transit o MRT- Line 3 na kamakailan lang ay muling nabatikos ng publiko.

Ayon kay Chavez, responsibilidad niya ang mga nangyaring problema sa MRT-3 kaya naman binibigyan niya ngayon ng pagkakataon si Pangulong Rodrigo Duterte at Transporation Secretary Arthur Tugade na tingnan muli ang management ng MRT-3.

“Nag-iimprove ba ang system mula nang mag-take over kami? Opo, kung hindi lang nagkaroon ng unfortunate accident, nag-improve at kung hindi nagkahiwalay ang 2 bagon. Otherwise nakikita niyo na isa o dalawa na lang ang unloading incidents natin, nadali lang tayo sa nagkahiwalay na bagon.

 

“Hindi naman puwedeng lagi tayong naninisi sa nakaraan dahil responsibilidad na namin ito. Ang tingin namin more particularly ay responsibility po ito, bilang undersecretary for railways, makailang ulit na akong humingi ng paumanhin sa publiko sa maraming interviews, sa tingin ko ay may magagawa pa, mas marami pang magagawa, in my 7 years in the rail sector under two presidents, President Arroyo and President Duterte, I learned something, spare parts and management are replaceable, kung hindi nakakabili ng spare parts ay nagkaka-aberya, kung kulang ang performance ng management ay nagkaka-problema, I’m tendering my irrevocable resignation.” Pahayag ni Chavez

Kasabay nito, nagpasalamat si Chavez sa tiwalang ibinigay sa kanya ni Pangulong Duterte sa loob ng isang taon niyang panunugkulan sa DOTr.

LOOK: Resignation letter ni DOTr Usec. Chavez na naka-address kay Pangulong Rodrigo Duterte. pic.twitter.com/E16ri8LOnz

— DWIZ Newscenter (@dwiz882) November 23, 2017

—-

Aprubado na ng Senado ang mas mataas na tax exemption para sa mga may annual income na  P250,000 pababa.

Ayon kay Senate Ways and Means Committee Chairman Sonny Angara,  saklaw ng exemption ang lahat ng manggagawa   upang madagdagan ang  take home pay ng mga taxpayer simula sa Enero ng susunod na taon.

Sa oras na maisabatas,  ang mga sumusweldo ng  P21,000 kada buwan  pababa ay  walang babayarang income at withholding taxes.

Una ng ipinanukala ni Angara na gawing “utay-utay” o magsisimula sa P150,000 ang tax exemption at magkaroon ng  schedule kada taon pero  inihirit naman ni Senate President Pro-Tempore na ipako na lamang sa P250,000 ang bagay na sinang-ayunan ng mga kapwa senador.

—-