HOT STORIES OF THE WEEK

Ipinauubaya na ng Malacañang sa Kongreso ang tuluyang pagbuwag sa National Food Authority o NFA.

Ayon kay NFA Council Chairman at Cabinet Secretary Leoncio Evasco, nakahain na at pinag-uusapan na sa Kongreso ang panukala ng Department of Finance (DOF) na magbibigay daan para mapawalang saysay ang NFA.

Sa panukala ng DOF, hahayaan na ng pamahalaan ang mga private rice traders na direktang makapag-import ng bigas nang hindi na dumadaan sa NFA.

Sa ganitong sitwasyon ay magmumukha aniyang inutil at walang saysay ang NFA na posibleng mauwi sa tuluyang pagbuwag sa naturang tanggapan.

NFA Administrator

Samantala, tanging si Pangulong Rodrigo Duterte lamang ang maaaring sumibak sa puwesto kay NFA Admnistrator Jason Aquino.

Kasunod ito ng panawagang magbitiw na sa puwesto si Aquino dahil sa kakulangan ng suplay ng NFA rice.

Ayon kay NFA Council Chairman at Cabinet Secretary Leoncio Evasco, tanging rekomendasyon lamang ang maaaring isumite ng NFA Council hinggil sa mga panawagang sibakin si Aquino.

Una na aniyang inatasan ni Pangulong Duterte si Aquino na huwag nang magsalita ukol sa suplay ng bigas bagkus ipaubaya na lamang sa NFA Council upang maiwasan na magkaroon ng kalituhan ang publiko sa lumalabas na impormasyon ukol sa bigas.

—-

Tuloy na ang pagsasara sa isla ng Boracay sa Abril 26.

Sa naging cabinet meeeting kagabi, sinabi ni Presidential Spokesman Harry Roque na inaprubahan na ng Pangulo ang 6-month closure ng Boracay para bigyang daan ang paglilinis sa buong isla.

Bora closed for 6 mos effective 26 April

— Harry Roque (@attyharryroque) April 4, 2018

Matatandaang inirekomenda ng Department of Environment and Natural Resources o DENR, Department of Tourism o DOT at Department of Interior and Local Government o DILG ang rehabilitasyon sa naturang tourist destination.

Kaugnay nito, i-aactivate na rin ang calamity fund sa nasabing isla para bigyang ayuda ang mga manggagawang maapektuhan ng temporary closure.

Inaasahang muling bubuksan ang Boracay sa mga turista sa Oktubre.

—-

Binigyan na ng go signal ni Pangulong Rodrigo Duterte ang pagpapatuloy ng usapang pangkapayapaan sa CPP-NPA.

Sa naging cabinet meeting kagabi, iniutos ng Pangulo kay Presidential Adviser on the Peace Process Jesus Dureza ang resumption of peace talks.

Ayon kay Dureza, sinabi ng Pangulo na bigyan ng isa pang huling tiyansa ang peace talks ngunit kailangan ay mayroong malinaw na usapan sa pagkakakaroon ng ceasefire agreement upang maiwasan ang pag-atake ng magkabilang panig habang nasa gitna ng usapang pangkapayapaan.

Handa rin aniya ang Pangulo na magkaloob ng suporta kung kinakailangan kapalit ang kinokolektang revolutionary tax ng rebeldeng grupo.

—-

Pinabulaanan ng kampo ni Justice Secretary Vitaliano Aguirre na sinibak sa puwesto ni Pangulong Rodrigo Duterte ang kalihim.

Ayon kay Justice Undersecretary Erickson Balmes, hindi nakapasok sa kaniyang tanggapan si Aguirre dahil sumailalim ito sa kaniyang routine check-up.

Nilinaw din ni Balmes na walang pormal na anunsyo mula sa Malacañang hinggil sa pagkakasibak ng Pangulo kay Aguirre.

Nag-ugat ang naturang balita matapos madismaya si Pangulong Duterte sa pagkakabasura ng drug case laban kina Peter lim, Peter Co, Kerwin Espinosa at iba pa.

—-

Nakahanda ang kampo ni Supreme Court Chief Justice On Leave Maria Lourdes Sereno sa oral arguments ng Korte Suprema sa quo warranto petion na inihain ni Solicitor General Jose Calida.

Ayon kay Atty. Jojo Lacanilao, Spokesman ni Sereno, inaasahan na nilang magkakaroon ng oral arguments sakaling aksyunan nga ng Korte Suprema ang quo warranto petition.

Gayunman, nanindigan si Lacanilao sa kanilang posisyon na hindi dapat inaksyunan ang quo warranto petition dahil impeachment lamang ang tanging paraan para matanggal ang Chief Justice ng Korte Suprema.

Hindi naman makumpirma ni Lacanilao kung dadalo si Sereno sa oral arguments.

Sa resolusyong inilabas ng Supreme Court, inaatasan nito si Sereno na personal na humarap sa oral arguments.

—-

Welcome sa National Democratic Front of the Philippines (NDFP) ang panibagong pahayag ni Pangulong Rodrigo Duterte na bukas itong muli na magkaroon ng usapang pangkapayapaan sa pagitan ng pamahalaan at ng komunistang grupo.

Ayon kay NDF Legal Counsel Atty. Edre Olalia, magandang balita ang pagbabago ng isip na ito ng Pangulo.

“Palagi namang sinasabi natin na basta sa kabutihan ng mamamayan kahit magbago ang isip ay okay naman ‘yan, tinatanggap ‘yan ng ating mga kliyente.” Ani Olalia

Gayunman, iginiit ni Olalia na mainam kung unahin muna ang pag-uusap bago maglatag ng anumang kondisyon ang pamahalaan.

Ayon kay Olalia, maraming isyu ang mareresolba kung uupuan at pag-uusapan ang hinaing ng partido ng pamahalaan at ng rebeldeng komunista.

Una nang sinabi ng Pangulo na handa siyang buksan muli ang peace talks sa kondisyong dapat magkaroon muna ng tigil-putukan.

“Imbes na ‘yung agad agad ay sasabihing gawin mo ito, gawin mo ‘yan bago tayo mag-usap, hindi nga, kailangan mag-usap tayo ‘yun ang ibig sabihin ni Joma Sison at kahit si Fidel Agcaoili na pinuno ng kanilang negotiating panel.” Pahayag ni Olalia

 (Ratsada Balita interview)