HOT STORIES OF THE WEEK

Kumpleto nang hawak ng PNP o Philippine National Police ang anim na suspek sa pagpatay kay AKO BICOL Partylist Rep. Rodel Batocabe.

Ito’y makaraang sumuko na rin sa mga tauhan ng Albay Provincial Police Office ang isa sa mga suspek na si Nonsol Arimando alyas “RR” sa lalawigan kaninang alas siete ng umaga

Ayon kay PNP Chief Dir/Gen. Oscar Albayalde, naka-check in si Arimando sa isang hotel sa Masbate nang isuko ito ng kaniyang asawa at anak na isang active CAFGU dahil nakararamdam na umano ito ng banta sa kaniyang buhay.

Una rito, sumuko na rin sa regional intelligence office 5 ang isa pang suspek at malapit kay Daraga Mayor Carlwyn Baldo na si Danilo Muella alyas “Manoy Dan” kaninang ala una ng madaling araw.

Magugunitang kahapon, sumuko na rin sa mga awtoridad si Jaywin Babor alyas “Gie” gayundin ang gunman na si Henry Yuson alyas “Rommel” na sumuko sa kampo militar sa Sorsogon.

Habang nakakulong na rin sa tanggapan ng CIDG o Criminal Investigation and Detection Group sa kampo Crame sina Christopher Naval Alayas “Tuping”, Emmanuel Rosello alyas “Boboy” at ang testigong si Emmanuel Judavar alyas “Jude”

Sa kasalukuyan, si Mayor Baldo na lamang na itinuturing na mastermind sa kaso ang nag-iisang at-large at pinaniniwalaang nasa labas na ng bansa.

May dalawang persons of interest na ang militar at pulisya hinggil sa mga nasa likod ng pagpapasabog sa South seas mall sa Cotabato city noong bisperas ng bagong taon.

Ito’y ayon kay Capt. Arvin Encinas, tagapagsalita ng 6th infantry division ng Philippine Army kasunod ng ginawa nilang pakikipagpulong kay National Defense Secretary Delfin Lorenzana kahapon.

Ipinakita sa nasabing pulong ang ginamit na bomba na gawa sa plastic container at mayroon ding electric blasting cap, isang nine volt battery at mga conrete nails na nakadikit sa isang cellphone na may sim card.

Ayon naman kay Police Regional Office 12 Director C/Supt. Eliseo Tam Rasco, nakakuha na rin sila ng kopya ng CCTV kung saan nakuhanan ng camera ang dalawang tao na huling nakita bago mangyari ang pagsabog.

Nag-alok na rin ng kalahating milyong piso ang lokal na pamahalaan ng Cotabato City para sa sinumang makapagbibigay ng impormasyon hinggil sa kinaroroonan ng dalawang persons of interest.

Magugunitang dalawa ang nasawi habang aabot sa tatlumpu’t apat ang sugatan makaraang sumabog ang isang improvised explosive device malapit sa entrada ng naturang mall.

Habang dalawang IED rin ang nakita hindi kalayuan sa pinangyarihan ng unang pagsabog gayundin sa loob mismo ng nasabing mall na agad din namang nai-alis ng mga awtoridad.

Larawan ng mga suspek sa naganap na pagsabog sa Cotabato City noong bisperas ng bagong taon, inilabas na ng PNP | via @jaymarkdagala pic.twitter.com/EsEpzy2qg5

— DWIZ Newscenter (@dwiz882) January 5, 2019

Bukas pa rin ang pamahalaan na makipagnegosasyon sa Communist party of the Philippines.

Ayon sa Pangulo, mananatiling bukas ang pintuan ang gobyerno para sa kapayapaan hangga’t hindi aniya iginigiit ng rebelde komunista ang pagkakaroon ng coalition government.

Sinabi naman ni National Democratic Front of the Philippines Chair Fidel Agcaolli na handa pa rin ang kanilang hanay sa pagpapatuloy ng usapang pangkapayapaan sa ilalim ng administrasyong Duterte.

Matatandaang bumagsak nuong nakaraang taon sa pagitan ng pamahalaan at komunistang grupo dahil sa patuloy na pag-atake ng mga miyembro ng New People’s Army sa tropa ng pamahalaan kahit pa nasa kalagitnaan ng negosasyon.

Umapela si Pangulong Rodrigo Duterte sa mga pulitiko na protektahan ang integridad ng eleksyon 2019.

Sa pagdiriwang ng kaarawan ni Presidential Adviser on Political Affairs Secretary Francis “Tol” Tolentino sa Tagaytay City, nakiusap ang Pangulo sa mga kandidato na huwag gumawa ng anomang pandaraya at pananabotahe sa magiging halalan.

Sa halip na manggulo, sinabi ng Pangulo na maaari naman siyang tumulong para ikampanya ang mga mahihinang kandidato.

Samantala, nagbabala si Pangulong Rodrigo Duterte sa mga pulitikong magbabanta sa buhay ng naiwang pamilya ni Ako Bicol Party-list Rep. Rodel Batocabe.

Sinabi ng Pangulo na posibleng palitan si Batocabe ng kanyang asawa o anak sa pagtakbo bilang alkalde ng Daraga, Albay.

Kung magkagayon, sakaling makaranas ang mga ito ng pagbabanta mula sa hindi pinangalanang pulitiko ay hindi siya magdadalawang-isip na sampalin ito.

Bago ang naging pahayag ng Pangulo ay una nang pinangalanan ng Philippine National Police si Daraga, Albay Mayor Carlwyn Baldo bilang mastermind sa pagpatay kay Batocabe.

—-

Kinasuhan na sa Albay Provincial Prosecutors Office si Daraga, Albay Mayor Carlwyn Baldo kaugnay sa pagpatay kay Ako-Bicol Party-list Representative Rodel Batocabe at sa police aide nito.

Sinampahan ng double murder case at anim na bilang ng multiple frustrated murder si Mayor Baldo at anim pa nitong mga kasama.

Sa inisyal na impormasyon na nakuha ng Philippine National Police (PNP), hindi mahagilap sa ngayon ang alkalde at may usap-usapang nakalabas na ito ng bansa.

Nakikipag-ugnayan na ang PNP sa Bureau of Immigration (BI) para kumpirmahin kung talagang nagbiyahe nga sa ibang bansa si Baldo.

Kasunod nito ay kinansela na ng PNP ang permit to carry firearms outside residence at mga lisensya ng baril ni Baldo.

Ayon kay PNP Firearms and Explosives Division Chief Police Senior Supt. Val de Leon, agad na ipinag-utos ni PNP Chief Director General Oscar Albayalde ang pagbawi sa mga lisensya ng baril ni Baldo.

Kaugnay nito, hinimok ni De Leon na isuko na ni Baldo ang kanyang mga baril sa pinakamalapit na istasyon ng pulis o sa tanggapan ng PNP Firearms and Explosives Division.

NBI investigation

Samantala, kinukumpleto pa ng National Bureau of Investigation (NBI) ang kanilang isinagasawang imebstigasyon sa kaso ng pagpatay kay Ako-Bicol Party-list Representative Rodel Batocabe.

Ito ay kahit pinangalanan na PNP si Daraga, Albay Mayor Carlwyn Batocabe bilang mastermind sa Batocabe slay case.

Ayon kay Justice Secretary Menardo Guevarra, tatapusin ng NBI ang sarili nitong imbestigasyon kahit pa kinasuhan na si Baldo.

Tiniyak naman ni Guevarra ang patuloy na pakikipag-ugnayan nila sa PNP para sa iba pang detalye ng kaso ng pagpatay sa mambabatas.

—-

Nakatakdang bumisita si Pangulong Rodrigo Duterte sa mga lugar na sinalanta ng bagyong Usman sa Bicol ngayong araw.

Ayon kay Presidential Spokesperson Salvador Panelo, pupulungin ng Pangulo ang mga opisyal ng probinsya para matukoy kung ano pa ang mga kinakailangang ayuda na maaring ipagkaloob ng gobyerno.

Sinabi ni Panelo na ikinalungkot ng Pangulo ang naging kalamidad bagama’t naghanda ang mga opisyal ng pamahalaan ay may mga bagay pa rin na hindi makontrol tulad nga ng bagyo.

Magsasagawa ang Pangulo ng aerial inspection bago dumalo sa gagawing briefing sa Pili, Camarines Sur.

Naitala ang pinakamaraming bilang ng nasawi sa Bicol Region na umabot sa humigit-kumulang 100 katao.

—-

Inihayag ng Department of Justice (DOJ) na kasalukuyang tinatapos na ng National Bureau of Investigation (NBI) ang kanilang isinagawang parallel investigation kaugnay sa pagpatay kay Ako Bicol Party list Rep. Rodel Batocabe.

Ito’y sa kabila nang ipinalabas ng pahayag ng Philippine National Police (PNP) kung saan isinasangkot si Daraga Mayor Carlwyn Baldo sa nasabing krimen.

Ayon kay Justice Secretary Menardo Gueverra, pinaplantsa na ng NBI ang kanilang investigation report kung saan inaasahang ipapalabas sa mga susunod na araw.

Matatandang sinabi ng NBI sa kanilang paunang report kay Gueverra na hindi nila isinasantabi ang anggulong may kaugnayan nga sa pulitika ang motibo sa pagpaslang kay Batocabe.

Samantala sinabi ni Guevarra na nasa desisyon naman ng PNP at gayundin ng pamilya Batocabe kung saan nila nais ihain ang kaso laban sa mga akusado.