HOT STORIES OF THE WEEK

Bigo si Senador Antonio Trillanes sa hirit na ibasura ang kasong rebelyon na nakasampa sa Makati Regional Trial Court (RTC) Branch 150.

Ayon kay Branch 150 Clerk of Court Diosfa Valencia, hindi nakumbinsi ni Trillanes si Judge Elmo Alameda na nakapaghain ng amnesty application ang senador.

Nakasaad sa desisyon na bigo si Trillanes na ipakita ang mga hawak na dokumento na naghain siya ng aplikasyon para sa kasong rebelyon.

Binigyang diin din ng korte na mananatili ang bisa ng Proclamation No. 75 ng Pangulong Rodrigo Duterte kung saan ipinapawalang bisa ang amnestya na ibinigay ng dating Pangulong Noynoy Aquino kay Trillanes.

Ang nasabing desisyon ay ginawa ni Alameda nuon pang December 18 subalit kahapon lamang isinapubliko ng naturang korte.

Nagsimula na ngayong araw ang mga malalaking aktibidad kaugnay sa traslacion 2019.

Naganap kaninang ala 1:30 ng hapon ang pagbasbas sa lahat ng mga replika ng Itim na Nazareno na mula pa sa iba’t ibang lugar sa bansa.

Magkakaroon naman ng isang send-off mass para sa mga boluntaryo sa traslacion sa Quirino Grandstand 7:00 ng umaga bukas.

Susundan ito ng pahalik sa poon at ang pagsisimula ng magdamagang bihilya sa hapon.

Sa hatinggabi naman ng Enero 9, sisimulan sa isang banal na misa ang araw ng pista na susundan ng oras oras na misa sa Quiapo Church hanggang sa makabalik ang Itim na Nazareno.

Ayon sa mga awtoridad ng simbahan, tinatayang alas 2:00 ng madaling araw ng Huwebes, Enero 10, darating ang Itim na Nazareno sa Quiapo Church.

Inaasahan namang aabot sa mahigit 21 milyon ang bilang ng mga makikiisa sa buong linggong pagdiriwang ng pista.

Umakyat na sa isang daan at dalawampu’t anim (126) ang nasawi sa pananalasa ng bagyong Usman noong Disyembre.

Habang dalawampu’t anim (26) na iba pa ang patuloy na pinaghahanap at pitumpu’t lima (75) naman ang nasugatan.

Batay rin sa tala ng National Disaster Risk Reduction and Management Council o NDRRMC, umabot na sa mahigit apat punto dalawang (4.2) milyon ang halaga ng pinsalang idinulot ng bagyong Usman.

Mahigit siyam na raang libong piso (900,000) rito ay sa agrikultura at tatlo punto tatlong (3.3) milyon naman sa imprastraktura.

Samantala, nasa siyam na libo limang daan at apatnapu’t apat (9,544) na kabahayan naman ang nawasak ng bagyong Usman.

—-

Nasa 850 personnel ang idedeploy ng Metropolitan Manila Development Authority (MMDA) sa traslacion ng Itim na Nazareno sa Maynila.

Ayon kay MMDA Chairman Danilo Lim, itatalaga ang kanilang mga tauhan sa Quirino Grandstand sa Luneta; Quiapo Church at sa mga rutang daraanan ng prusisyon sa Miyerkules, Enero 9.

Simula naman bukas hanggang Martes ay mahigit 350 MMDA personnel ang ipakakalat para sa taunang prusisyon ng mga replika ng imahe ng Black Nazarene at “pahalik” sa Quirino Grandstand.

Makakatuwang ng mga tauhan ng ahensya ang mga pulis at lokal na pamahalaan ng Maynila sa pagpapanatili ng kaayusan sa translacion maging sa kabuuan ng pista ng Quiapo.

Inilabas na ng Manila Police District-Traffic Enforcement Unit ang listahan ng mga saradong kalsada para sa traslacion ng Itim na Nazareno sa Miyerkules, Enero 9.

Kasabay ng pagbabasbas at prusisyon ng mga replica ng Black Nazarene sa Lunes, kabilang sa isasara simula alas onse ng umaga hanggang ang southbound lane ng Quezon Boulevard sa Quiapo;

Westbound lane ng España Boulevard mula P. Campa hanggang Lerma Streets habang sarado rin simula Martes, Enero 8 simula ala singko ng madaling araw sa Martes ang Katigbak Drive, South Drive at Independence Road.

Ito’y para naman sa “pahalik” sa imahe ng Black Nazarene sa Quirino Grandstand.

Milyun-milyong deboto ang inaasahang lalahok sa taunang traslacion maging sa iba’t-ibang aktibidad na may kaugnayan sa pista ng Itim na Nazareno.

Translacion 2019 sa Maynila ‘all systems go na’

“All systems go” na ang mga otoridad para sa traslacion 2019 ng Itim na Nazareno maging sa pista ng Quiapo sa Maynila, sa Miyerkules, Enero 9.

Ayon kay Monsignor Hernando Coronel, rector ng Basilica of the Black Nazarene o Quiapo Church,  nakatalag na ang lahat ng preparasyon para sa inaasahang pagdagsa ng milyun-milyong deboto.

Plantasado na rin anya ang koordinasyon ng mga organizer sa National Capital Region Police Office (NCRPO) at Manila Police District (MPD) para sa seguridad.

Asahan na muli ang signal shut down ng mga telecommunications company sa mga lugar na daraanan ng traslacion.

Ini-anunsyo na rin ng mga organizer ang rutang daraanan ng andas na magsisimula ala singko ng madaling araw ng matapos ang misa alas kwatro naman ng madaling araw sa Quirino Grandstand sa Luneta.

Samantala, inihayag naman ni NCRPO Chief Dir. Guillermo Eleazar na magpapatupad ng “no fly zone” at “no sail zone” sa naturang lugar.

Nagsagawa ng inspeksyon si National Capital Region Police Office (NCRPO) chief Guillermo Eleazar sa magiging ruta ng prusisyon ng Itim na Nazareno.

Kasunod ito ng paglalabas ng opisyal na ruta para sa transalacion na magsisimula sa ganap na alaskwatro ng umaga sa Quirino Grandstand.

Nag-ikot si Eleazar sa mahigit 20 kalsada na dadaanan mula sa Quirino Grandstand sa Luneta hanggang sa simbahan ng Quiapo bilang bahagi ng paghahanda sa traslacion.

Ecowaste coalition umapela sa mga deboto ng Black Nazarene

Umapela ang Ecowaste Coalition (EWC) sa mahigit dalawang milyong debotong lalahok sa traslacion ng Itim na Nazareno na huwag magkalat at mag-iwan ng tone-toneladang basura pagkatapos ng pagdiriwang.

Sinabi ni EWC coordinator Aileen Lucero na huwag gawing “trashlacion” ang naturang pagdiriwang at maging responsable ang mga deboto sa pagtatapon ng kanilang mga basura.

Kung maaari aniya ay i-uwi na lamang o di kaya’y itapon sa mga garbage bag ang kanilang mga basura.

Ito’y upang hindi na rin maulit ang nangyari sa mga nakalipas na taon kung saan tone-toneladong basura ang hinahakot ng mga truck ng Metropolitan Manila Development Authority (MMDA) tuwing idinaraos ang traslacion.