HOT STORIES OF THE WEEK

Tiwala ang Social Security System (SSS) na maibibigay sa ilalim ng termino ni Pangulong Rodrigo Duterte ang natitirang isanlibong pisong dagdag pensyon sa kanilang mga miyembro.

Ayon kay SSS President Emmanuel Dooc, target nilang maibigay ang dagdag pensyon na ito sa taong 2020.

Matatandaang unang naibigay ang isanglibo sa dalawanlibong pension increase noong 2017.

Ngunit dahil aniya dito ay umikli o aabot na lamang sa 2032 ang pondo ng SSS.

Dahil dito, gagamitin ng SSS ang pagkakataon ngayong taon para palaguin at mapatatag ang pondo ng ahensya.

—-

Nanganganib umanong maka apekto sa desisyon ng mga botante ang paglaganap ng fake news.

Ayon kay Communications Professor Clarissa David ng University of the Philippines, malaki ang maitutulong ng traditional media upang hindi makaapekto ang fake news sa kung paano pipili ng kanilang mga kandidato ang mga botante.

Sinabi ni David na dapat maging boses ng katotohanan ang traditional media sa harap ng paglaganap ng fake news sa social media mula sa ilang nagpapakilalang media influencers.

Sa pamamagitan aniya ng pagbubunyag ng traditional media, maaaring maglagay ito ng duda sa publiko na posibleng puro peke ang mga balitang lalabas sa isang partikular na media influencer.

—-

Pinaiimbestigahan ng Makabayan bloc sa Kamara ang profiling na umano’y isinasagawa ng Philippine National Police (PNP) sa mga miyembro ng Alliance of Concerned Teachers (ACT).

Kasunod na rin ito nang inihaing House Resolution No. 2233 para maimbestigahan ang lumabas na intelligence memorandum laban sa mga miyembro ng ACT na sinasabing bahagi ng Communist Party of the Philippines (CPP).

Iginiit ng Makabayan bloc na ang nasabing memo ay paraan para targetin ang mga grupo, party list at mga kandidatong suportado ng mga progresibong grupo.

Malinaw anilang paglabag ito sa karapatang pantao maging sa election law.

Kumbinsido ang Makabayan bloc na ang nasabing hakbang ay may kaugnayan sa pinalutang nuong Red October ouster plot laban sa Pangulong Rodrigo Duterte.

Handang handa na ang mga otoridad sa traslacion ng Itim na Nazareno ngayong araw.

7,000 mga pulis ang naka deploy sa kamaynilaan para masigurong magiging ligtas at maayos ang prusisyon.

Kahapon ay sinuyod ng National Capital Region Police Office (NCRPO) ang paligid ng simbahan at magiging ruta ng Traslacion para baklasin ang mga tindahan sa gilid ng daan.

Ginawa ito upang mapaluwag ang mga kalsada at mabigyan ng daan ang mga otoridad sa kanilang pagresponde sakaling magkaroon ng emergency.

Kaagapay naman Philippine National Police (PNP) sa paglalatag ng seguridad ang Armed Forces of the Philippines (AFP), Bureau of Fire Protection (BFP) at Philippine Coast Guard (PCG).

Una nang sinabi ng PNP na wala silang namomonitor na anomang threat sa gaganaping pista ng Itim na Nazareno.

Mahigit 30 floating assets ng PCG nakaantabay na

Mahigit 30 mga floating assets ng Philippine Coast Guard (PCG) ang naka antabay para magbigay ng seguridad at ayuda sa gaganaping traslacion ng Itim na Nazareno.

Ayon kay PCG spokesman Capt. Armand Balilio, kasama sa mga floating assets ay ang dalawang barko ng PCG na naka antabay sa likod ng Quirino Grandstand.

Magsisilbi itong medical facility at evacuation sakaling magkaroon ng aberya sa ground.

Handang harapin at sagutin sa korte ng Philippine National Police (PNP) ang anumang kasong isasampa laban sa kanila ng grupong Alliance of Concerned Teachers (ACT).

Kaugnay pa rin ito sa ginagawang paniniktik at pang-uusisa umano ng ilang kagawad ng pulisya sa kanilang hanay.

Ayon kay PNP spokesman C/Supt. Benigno Durana bukas sila sa kasong isasampa sa kanila dahil ito aniya’y bahagi ng kanilang trabaho na magbigay ng maayos na seguridad sa tamang paraan.

Unang inakusahan ng ACT ng red tagging ang PNP dahil sa pag-uugnay nito sa kanila na bahagi umano ng alyansa ng mga komunista.

Samantala, bukas din ang National Union of People’s Lawyers (NUPL) na tulungan ang ACT at kanila ring hihilingin sa korte na patigilin ang PNP sa ginagawa nitong paniniktik.

Hindi ipagwawalang bahala ng pambansang pulisya ang anumang impormasyon hinggil sa banta sa seguridad.

Iyan ang tiniyak ni PNP Chief Dir/Gen. Oscar Albayalde kasunod na rin ng pagsisiwalat ni Manila Mayor Joseph Estrada na may natanggap siyang impormasyon hinggil sa bantang pag-atake ng Islamist group sa kasagsagan ng Traslacion ngayon.

Ayon kay Albayalde, bagama’t wala naman silang namomonitor na banta sa seguridad, maigi na rin aniyang maging handa.

Kumikilos naman aniya ang Intelligence Group ng PNP para bantayan ang sitwasyon upang agad na maabisuhan ang publiko sakaling mayruong mga pagkilos na ginagawa ang mga terrorista.

Bukas Enero 9, araw ng Traslacion, aabot sa humigit kumulang 7,000 pulis mula sa NCRPO, iba’t-ibang support units at maging sa Armed Forces of the Philippines (AFP) na ipakakalat para magbantay.

Epektibo rin simula mamayang ika-walo ng gabi ang Liquor gayundin ang gun ban sa Lungsod ng Maynila bilang bahagi ng security measures.

Samantala, nanawagan naman si NCRPO Chief P/Dir. Guillermo Eleazar sa mga mananampalataya na sasama sa Traslacion na makipag ugnayan sa mga awtoridad kung may kahinahinalang tao sila na mapapansin sa kasagsagan ng okasyon.

Itinanggi ni Philippine National Police (PNP) Chief Director General Oscar Albayalde na ipinag-utos niya ang pagsasagawa ng profiling sa mga miyembro ng grupong Alliance of Concerned Teachers (ACT).

Ayon kay Albayalde, wala siyang pinirmahang anumang direktiba hinggil dito.

Gayunman nilinaw ng PNP chief na sakaling nagkaroon ng pagkuha ng listhan ng mga miyembro ng ACT, bahagi lamang aniya ito ng kanilang intelligence monitoring.

Dagdag ni Albayalde, hindi rin ito maiiwasan lalo’t una na aniyang sinabi ni CPP founding chairman Joma Sison sa isang video na ipinost sa YouTube noong 2009 na kabilang ang mga militanteng grupo tulad ng ACT sa kanilang front organizations.

Iginiit pa ni Albayalde, kung wala namang ginagawang masama ang mga miyembro ng ACT ay wala silang dapat ikatakot.

Kasundo nito, hinimok naman ni Albayalde ang ACT na kumilos para maihiwalay ang kanilang grupo mula sa CPP at NPA.

Pagsibak sa 3 intelligence officers ipinag-utos

Ipinag-utos na ni Philippine National Police (PNP) Chief Director General Oscar Albayalde ang pagpapasibak sa tatlong hindi pinangalanang intelligence officers.

Kasunod ito ng pagleak o pagkalat ng impormasyon hinggil sa umano’y pagkuha ng pulisya ng mga listahan ng mga gurong miyembro ng Alliance of Concerned Teachers (ACT).

Ayon kay Albayalde, may ranggong senior inspector hanggang chief inspector ang mga nasabing intelligence officers na mula sa Manila City Station 3, Quezon City Station 6 at Zambales PNP.

Dagdag pa ni Albayalde, nagsasagawa na rin ng imbestigasyon ang PNP kaugnay ng posibilidad sa pagkakaroon ng leak sa kanilang intel operation na nagdulot ng negatibong epekto at takot sa mga miyembro ng ACT at publiko.

Nagpa-umaga na sa Quirino Grandstand sa Manila ang ilang mga deboto ng Itim na Nazareno.

TINGNAN: Daan-daang mga deboto ng Itim na Nazareno, nakatulog na sa pila sa gilid ng mga plastic barriers para sa tradisyunal na ‘Pahalik’ sa Quirino Grandstand. | via @gilbertperdez pic.twitter.com/IQ3S04Cyat

— DWIZ Newscenter (@dwiz882) January 7, 2019

Ito ay upang hintayin na lamang ang pagbubukas ng tradisyunal na pahalik sa poong Itim na Nazareno ngayong umaga.

Kagabi nagsimula nang pumila ang ilang mga debotong maagang nagtungo sa Quirino Grandstand.

Samantala, nilagyan na ng mga metal at plastic barries ang venue para matiyak na magiging maayos ang pila ng mga debotong magtutungo para sa pahalik.

Iniba na rin ng mga organizers ang paraan ng pagpila para sa pahalik dahil pinagsama na ang pila para sa mga babae at lalaking deboto, hindi tulad noong isang taon.

Tanging nakahiwalay na lamang ay ang pila para sa mga senior citizens, persons with disabilities (PWDs) at mga buntis.

Nakaantabay na rin ang first aid station gayundin ang mobile clinic ng mmda para na rin sa kaligtasan ng mga deboto.

(with report from Gilbert Perdez)

Diniskuwalipika ng Comelec ang 40 kandidato sa pagka-senador.

Ito ayon kay Comelec Spokesman James Jimenez ay maaari pang madagdagan dahil naka apela pa ang ilan dito.

Sinabi ni Jimenez na karamihan sa mga disqualified ay mga nuisance o panggulong kandidato lamang.

Pangunahin aniya nilang tinitingnan sa kanilang ginawang evaluation ang kakayahan ng kandidato sa national position tulad ng senador ang magsagawa ng nationwide campaign.

Tumanggi naman si Jimenez na ibunyag ang mga disqualified senatoriables.

Sa ikatlong linggo ng Enero ilalabas ng Comelec ang opisyal na listahan ng ma kandidato sa pagka senador na susundan naman nang pag-imprenta sa mga balota.

Sa kabuuang ay nasa isandaan at limamput dalawang indibidwal ang nagsumite ng kanlang certificate of candidacy (COC) kabilang ang labing apat na kasalukuyan at mga dating senador na maglalaban laban sa 12 senate seats.