HOT STORIES OF THE WEEK

Arestado ang mag-live in partner na British national at isang Pinay matapos matuklasan ang marijuana farm sa loob mismo ng kanilang bahay sa isang subdivision sa Subic Zambales.

Isang kuwarto sa loob ng kanilang tahanan sa Magdalena Homes Subdivision ang nagsisilbing greenhouse kung saan naroon ang mga paso na may tanim na marijuana.

Abot sa pitumpung puno ng Kush, isang mataas na uri ng marijuana mula sa Afghanistan, Northern Pakistan at North Western India ang nakumpiska ng Philippine Drug Enforcement Agency (PDEA) at Regional Drug Enforcement ng Central Luzon Police.

Kinumpiska rin ang cultivating equipment na ginagamit ng suspects sa mga tanim na marijuana.

TINGNAN:
Ang mga tanim na marijuana na nadiskubre sa loob ng ni-raid na residential house sa Magdalena Homes Subic, Zambales | via @jaymarkdagala
Photo Credit: PDEA pic.twitter.com/SSPULS4cA8

— DWIZ Newscenter (@dwiz882) January 10, 2019

(Ulat ni Jaymark Dagala) / Photo Credit: PDEA

Makakaasa ng omento sa sahod ang mga pampublikong guro ngayong taon.

Ito ang tiniyak mismo ni Pangulong Rodrigo Duterte sa kanyang naging talumpati sa groundbreaking ng Gregorio National High School sa Bulakan Bulacan.

Ayon kay Pangulong Duterte, kanya nang nakausap si Budget Secretary Ben Diokno hinggil sa nabanggit na taas sahod sa mga guro.

Dagdag pa ng Pangulo, nakahanda siyang makipag-usap sa mga kinatawan ng mga guro kasama si Education Secretary Leonor Briones para bumuo ng kasunduan kaugnay ng kanilang omento sa sahod.

Gayunman, binigyang diin ni Pangulong Duterte na hindi dapat kasama sa pulong ang mga miyembro ng makakaliwang grupo.

“I can maybe accommodate your representatives, go to Malacañang, but not the Left. They claim they are not communists. Let us not fool each other. I’ve been there.”

“I am willing to strike a deal in the presence of (education) secretary (Leonor) Briones, with the teachers. You can choose the date, January, do it fast, then we can make even an agreement or manifesto, choose whatever kind of document.” Pahayag ni Pangulong Duterte

—-

Inaasahang tataas pa ang presyo ng produktong petrolyo sa susunod na linggo dahil sa pagtaas ng presyo ng langis sa world market.

Batay sa monitoring ng oil industry, mula Lunes hanggang Miyerkoles ngayong Linggo ay tumaas ng piso at walumpung sentimo (P1.80) ang kada litro ng imported diesel at piso at beinte sentimos (P1.20) ang itinaas naman ng imported gasoline habang nasa piso at limampung sentimo (P1.50) naman sa kada litro ng kerosene.

Subalit ang price adjustment ay depende pa sa takbo ng kalakalan hanggang ngayong araw na ito.

Bukod sa nagbabadyang taas presyo, posible rin ang price adjustment sa ilang gasolinahan dahil sa mas mataas na excise tax.

Dahil dito, may dagdag buwis na mahigit dalawang piso (P2.00), magkakaroon pa ng taas presyo dahil sa paggalaw ng presyo ng imported petroleum.

Nangangahulugan ito na kung 1.80 ang taas presyo ng imported gasoline na papatungan ng 2.24 excise tax, papatak na 4.04 ang dagdag prersyo sa kada litro ng gasolina sa susunod na linggo.

—-

Sinentensyahang makulong ng apat hanggang pitong taon ang dating branch manager ng RCBC bank sa Makati City na nasangkot sa 81 million dollar cyber heist sa Bangladesh central bank noong Pebrero 2016.

Batay sa desisyon ng Makati Regional Trial Court, guilty sa kasong money laundering si Maia Santos Deguito.

Maliban sa pagkakulong, pinagmumulta rin ng mahigit sa isandaang milyong dolyar si Deguito para sa walong kaso ng money laundering.

Si Deguito ang branch manager ng RCBC kung saan napunta ang ilang bahagi ng 81 million dollars na ninakaw ng hackers sa Bangladesh Central Bank.

Mula sa bangko ay inilipat ito sa ilang casino accounts na noong panahong ‘yun ay hindi pa sakop ng money laundering law.

Gayunman, inabswelto ng Department of Justice ang may-ari ng casino na si Kim Wong, ang junket operator na si Weikang Xu at remittance service na Philem na kabilang rin sa dinaanan ng nakaw na pera.

Ito ay matapos isauli ni Wong ang halos labing limang milyong dolyar ng nakaw na pera na napunta sa casino account.

Samantala, isang welcome development sa Bangladesh ang pagbaba ng guilty verdict ng Makati RTC laban kay dating RCBC Jupiter Branch Manager Maia Santos Deguito.

Subalit sinabi ni Bangladesh Ambassador to the Philippines Asad Alam Siam na nais nilang matapos muna ang kaso at maibalik ang buong 81 million US dollars.

Nabatid na 15 million dollars pa lamang ang nababawi ng Bangladesh Central Bank mula nang imbestigahan ng Senado at korte ng Pilipinas ang nasabing usapin.

RCBC mas lalong tumibay ang posisyon sa money laundering scam

Lalong tumibay ang posisyon ng RCBC o Rizal Commercial Banking Corporation na wala silang kinalaman sa 81 million dollar cyber heist noong 2016.

Laman ito ng statement ng RCBC matapos mahirang na guilty sa kasong money laundering ang dati nilang branch manager na si Maia Santos Deguito.

Ayon kay RCBC spokesperson Thea Dae, ang pagkakasentensya kay Deguito ay pagpapatunay na isa ring biktima ang RCBC at tiwali si Deguito.

Mula apat na taon hanggang pitong pagkakulong ang hatol kay Deguito sa bawat isa sa walong kaso ng money laundering.

—-

Inabot ng mahigit dalawampu’t isang (21) oras ang traslacion ng Itim na Nazareno sa Maynila.

Alas-2:21 ng madaling araw nang makapasok ang andas ng Poong Nazareno sa Quiapo Church.

Sinalubong ng malakas na sigawan ng Viva Señor ang poon sa pagpasok nito sa loob ng simbahan na sinundan pa ng fireworks.

Pasado alas-5:00 ng madaling araw nang magsimulang umusad ang andas ng poon mula sa Quirino Grandstand.

Naging mabagal ang pag-usad dito dahil sa dagat ng tao na nagnanais na makasampa sa andas.

Bandang alas-10:40 ng gabi nang maganap naman ang tradisyunal na dungaw sa San Sebastian Church.

Dito ay dumungaw ang imahe ng Our Lady of Mount Carmel de San Sebastian sa dumadaan na Itim na Poong Nazareno.

Ilang minuto namang tumahimik at nag-alay ng dasal ang mga deboto bago itinuloy ang traslacion.

Generally peaceful

Samantala, pangkalahatang naging mapayapa ang traslacion ng Itim na Nazareno ngayong taon.

Sa pagtataya ng Philippine National Police (PNP), pumalo sa 2.5 milyong tao ang nakilahok sa iba’t ibang aktibidad bago at ang mismong traslacion.

Sa panayam ng DWIZ sinabi ni National Capital Region Police Office (NCRPO) Chief Director General Guillermo Eleazar, walang anumang naitalang casualty ngayong taon at mas kakaunti rin ang binigyan ng medical assistance.

Isang untoward incident lamang ang naitala sa gawi ng Quiapo kung saan naaresto ang isang magnanakaw.

Kaugnay nito, kinilala ni Eleazar ang pagsisikap ng mga awtoridad at iba pang ahensya ng gobyerno para siguruhing maayos at ligtas ang traslacion.

Nagpasalamat din si Eleazar sa mga deboto na nagpakita naman ng disiplina at walang patid na pananampalataya sa Poong Nazareno.

Dagdag ni Eleazar, napakalaki na ng iginanda ng traslacion ngayong taon sa lahat ng aspeto tulad ng seguridad.

Aniya, maliban sa seguridad, makikita ring napaghandaan na Metro Manila Development Authority (MMDA) kung paano tutugon sa malaking kalat na maaaring maiwan ng apat na araw na aktibidad na nagtapos sa traslacion o pag-uwi ng Itim na Nazareno sa Quiapo Church.

Batay sa pagtaya ng PNP-NCRPO, mahigit sa 4 milyon ang dumalo sa mga aktibidad para sa Itim na Nazareno, halos isang milyon dito ang lumahok sa traslacion.

“Overall maganda ang naging takbo ng traslacion, nagkaroon ng improvement, coordination, magandang arrangement na puwedeng ma-improve pa natin sa mga susunod na taon.” Pahayag ni Eleazar

(Balitang Todong Lakas Interview)

Umabot sa mahigit isang libo at dalawang daan (1,200) ang nilapatan ng lunas ng Philippine Red Cross (PRC) sa naging traslacion ng Itim na Nazareno.

Ayon sa PRC, ilan sa mga deboto ang nahilo dahil sa siksikan sa prusisyon.

Marami ring senior citizens ang nagpatingin ng kanilang blood pressure habang ang ilan ay kinailangan na bigyan ng oxygen para matulungang makahinga.

Isang hijos ang isinugod sa ospital matapos na mahampas ng lubid nang magkaagawan habang isa pang hijos ang nawalan naman ng malay.

Isang libong (1,000) volunteers ng Red Cross ang ipinakalat sa labing dalawang (12) first aid and welfare stations na nasa mga kalsadang dinaanan ng traslacion.

Maliban sa first aid, tumulong rin ang mga Red Cross stations sa mga report ng nawawalang miyembro ng pamilya, nagbibigay ng referral service, counselling at psycho-social support.

Naglagay rin ang PRC ng emergency medical units sa Andres Bonifacio Shrine, isang outdoor hospital arrangement kung saan puwedeng gamutin ang mga sakit o sugat na hindi kaya ng first aid.

Habang ginaganap ang traslacion ay naka-standby lamang ang limampung (50) ambulansya, tatlong rescue boats, amphibian at rescue vehicles.

—-

Nilagdaan na bilang isang ganap na batas ni Pangulong Rodrigo Duterte ang Philippine HIV and AIDS Policy Act.

Layon ng nasabing batas na magpatupad ng mga polisiya na makakatulong sa pagsugpo sa patuloy na pagdami ng bilang ng kaso ng HIV/AIDS sa bansa.

Ayon kay Presidential Spokesman Atty. Salvador Panelo, inamyendahan ng bagong batas Ang Philippine AIDS Prevention and Control Act of 1998 dahil kailangang baguhin ang istratehiya kaugnay sa nasabing problema.

Batay Sa tala ng Department of Health (DOH), nadagdagan ng 8,533 ang bilang ng mga nahawaan ng HIV sa bansa sa pagitan lamang ng Enero hanggang Setyembre ng nakalipas na taon.

Sa nasabing bilang, lumalabas na mayroong 32 bagong kaso ng HIV Infection ang naitatala sa bansa araw-araw.

Kasabay nito, pinapurihan naman ni Panelo ang mga mambabatas kabilang na ang mga stakeholders na nagsulong upang maipasa ang panukalag batas na tutugon sa problema ng HIV/AIDS sa Pilipinas.

Ibinunyag ng Philippine Army ang plano sanang pambobomba ng Bangsamoro Islamic Freedom Fighter (BIFF) sa Mindanao.

Ito ay makaraang madiskubre ng mga militar ang tatlong improvised explosive device (IED) sa ilang mga lugar sa Maguindanao.

Gayunman, sinabi ni Major General Cirilito Sobejana, Commander ng Army’s 6th Infantry Division na hindi nagtagumpay ang BIFF sa kanilang plano matapos maka-engkwentro ng kaniyang mga tauhan ang mga ito sa Sitio Landing Fish Baranga Sultan sa bayan ng Barongis.

Dito aniya naiwan ng BIFF ang ilang IEDs na gawa mula sa mga bala ng 81mm mortar.

Naniniwala naman si Sobejana na layon ng grupo na guluhin ang nakatakdang plebisito sa rehiyon kaugnay sa panukalang Bangsamoro Organic Law (BOL).

Ang BIFF ay binubuo ng ilang mga tumiwalag na miyembro ng Moro Islamic Liberation Front (MILF).

—-

Sumisimbolo sa simpleng pamumuhay ang paglahok sa traslacion nang nakayapak.

Ayon kay Msgr. Hernando Coronel, rector ng Minor Basilica of the Black Nazarene, ipinapaalala aniya sa mga deboto na wala namang sapatos ang tao nang ito ay isilang sa mundo.

Simbolo rin aniya ito ng pagpapakumbaba at hindi paglimot sa ating pinagmulan.

Sa loob ng maraming taon na ginaganap ang traslacion, tinitiis ng mga deboto ang sampu o mahigit pang oras ng paglalakad nang nakayapak para sa traslacion.

—-