HOT STORIES OF THE WEEK

Arestado ang 25 katao sa unang araw ng gun ban bilan bahagi ng panahon ng eleksyon.

Sa isang press conference, sinabi ni PNP Chief Director General Oscar Albayalde na 27 armas ang kanilang nakumpiska, 168 rounds ng bala, pitong patalim at mahigit sa 20 gun replicas.

May mga nakumpiskahan rin anya sila ng shabu at gas pipes.

Ayon kay Albayalde, halos 4,500 checkpoints ang nailatag nila sa buong kapuluan para maayos na maipatupad ang gun ban.

Hindi kabilang dito ang mahigit sa 500 checkpoints na inilagay nila sa mga lugar na masasakupan ng bagong bangsamoro in the Autonomous Region in Muslim Mindanao.

“The election period maybe considered generally peaceful yet it depicts that violent incidents may still occur die to the number of confiscated or seized firearms and the entire ARMM with the for coming plebiscite for the Bangsamoro Organic Law will be held. The PNP conducted 580 checkpoint operations with addition to 8 more joint checkpoints with the Armed Forces of the Philippines.”

(with report from Jaymark Dagala)

Hindi kumbinsido si dating foreign affairs secretary Perfecto Yasay na ninakaw ng dating contractor ng DFA ang mga impormasyon sa passport renewal system.

Ayon kay Yasay, maaaring maling impormasyon ang nakarating kay Secretary Teddy Locsin na tinangay ng contractor ang mga datos at wala umanong magagawa rito ang kagawaran.

Maaari anyang nais ilihis ng ilang opisyal ng DFA ang tunay na issue at ito ang pag-award sa  kontrata para sa passport production sa pamamagitan ng “end-to-end basis.”

Sub-contractor para sa personalization system ng mga pasaporte ang french firm na Francois-Charles Oberthur Fiduciare (fran-szwa-sharl o-ber-tur fid-i-sher) noong 2006 alinsunod sa rekomendasyon ng Bangko Sentral.

Libre ang serbisyo ng Oberthur sa DFA simula 2009 hanggang 2014 nang mag-issue ang noo’y  secretary Albert Del Rosario ng purchase order contract pabor sa Apo Production.

Kinuha naman ng Apo na kumpanya sa ilalim ng Presidential Communications Office ang serbisyo ng United Graphic Expression Corporation o UGEC para sa produksyon ng mga bagong e-passports nang walang “bidding.”

Dahil sa pagpasok sa eksena ng Apo at Ugec, itinigil na ng Oberthur ang kanilang libreng serbisyo kaya’t maling sabihin na tinangay ng french company ang datos ng mga passport holder.

Nilinaw ni Foreign Affairs Secretary Teddy Locsin na “wala pa namang information leak” sa gitna ng issue ng passport data breach.

Ito ang inihayag ng kalihim sa kanyang tweet bilang tugon sa reaksyon ng isang netizen na   isang kumpanyang naka-base sa France ang may hawak sa passport information na may mahigpit umanong privacy laws.

Gayunman, aminado si Locsin na  posibleng “corrupted” at hindi na ma-access ang datos ng mga passport holder makaraang tangayin umano ang kanilang mga impormasyon ng dating passport manufacturer ng DFA

Samantala, tiniyak naman ng DFA secretary na kanyang huhubaran ang mga responsable sa passport data breach.

Aabot sa halos apat na piso ang limampung sentimo ang itataas ng presyo ng produktong petrolyo, bukas Enero 15.

Dalawa hanggang tatlumpung sentimo ang tinatayang dagdag sa presyo ng produktong petrolyo, base sa presyo ng krudo sa world market.

Samantala, makakasabay rin sa pagtaas ng presyo ang pagpapatupad sa ikalawang bahagi ng excise tax sa petrolyo na nasasaad sa TRAIN Law.

Batay sa komputasyon, aabot sa dalawang piso at dalawamput apat na sentimo ang dagdag na excise tax sa kada litro ng produktong petrolyo.

Patuloy pa rin umano sa pag-iimprenta ng pasaporte ang dating pribadong printing company ng DFA o Department of Foreign Affairs.

Ito’y ayon kay dating foreign affairs secretary Perfecto Yasay Jr, kahit pa inilipat na ng kagawaran ang mandato sa ibang kumpaniya para gawin ang pagpoproseso sa mga pasaporte.

Kasunod niyan, binanatan din ni Yasay ang pagiging tiwali umano ng ilang opisyal ng DFA para payagan pa rin ang dating service contractor nito na iligal na makapag-imprenta ng mga pasaporte kahit ito aniya’y labag na sa batas.

Taong 2006 aniya nang pumasok sa isang kasunduan ang DFA at ang Bangko Sentral ng Pilipinas para sa isahang pagbili at paggawa ng mga machine readable passports alinsunod sa pamantayan ng International Civil Aviation Organization.

Dahil dito, napunta ang kontrata sa Francois – Charles Oberthur Fiduciare (Franzua Charles Avetwa – Fadushey), isang kumpaniyang pranses na nakabase sa Makati City noong 2015.

Subalit binigyan din ng kontrata ng DFA ang Apo Production Unit na pagmamay-ari ng gobyerno sa kundisyong hindi ito kukuha ng pribadong kumpaniya bilang sub-contractor.

Ang mga ito aniya ay nangyari noong 2015 sa ilalim ng panunungkulan ni dating DFA Sec. Albert Del Rosario.

Opisyal nang nagsimula ang election season, apat na buwan bago ang midterm polls.

Eksakto alas dose kaninang hatinggabi nang ipatupad ng Commission on Elections ang gun ban kasabay ng  paglalagay ng mga checkpoint sa iba’t ibang panig ng bansa katuwang ang Philippine National Police.

Dinaluhan nina Comelec Chairman Sheriff Abas at Spokesman James Jimenez ang isang kick-off ceremony sa Camp Karingal, Quezon City kasabay ng nationwide checkpoint operations ng PNP.

Nag-inspeksyon naman sina PNP Chief Director General Oscar Albayalde at National Capital Region Police Office Chief, Director Guillermo Eleazar sa mga checkpoints sa San Juan at Maynila.

Muling inibisuhan nina Abas at Jimenez ang mga motorista na hindi sila obligadong bumaba sa kanilang sasakyan o magbukas ng compartment dahil sapat na  ang pagsilip ng mga pulis sa mga sasakyan  subalit nang walang physical contact.

Samantala, mino-monitor na ng Comelec at PNP ang labing walong  election hot spots dahil sa mga naitalang karahasan at presensya ng private armed groups.

España, Manila; N. Domingo, San Juan, Elliptical Road, QC – tonight’s checkpoint inspection tour #NLE2019 #GunBan pic.twitter.com/tlxk7QUD9w

— James Jimenez (@jabjimenez) January 12, 2019

220 FB pages at 73 accounts na karamiha’y mula sa Filipino community ang binura ng social media at social networking company na Facebook.

Ito’y dahil sa paglabag sa spam policy ng Facebook at pag-manipula sa public information sa pamamagitan ng paggamit ng fake accounts at pagbebenta ng administration access.

Ayon kay Nathaniel Gleicher, head ng Facebook cybersecurity policy, kabilang sa binura ang Filipino page na Twinmark Media Enterprises, na pina-follow ng 43 milyong FB accounts kung saan mayorya ay Pinoy;

Filipino Channel Online, Gorgeous Me, Unhappy, Text Message at TNP media na mayroon ding milyun-milyong followers.

Ipinabatid na aniya nila sa gobyerno ng Pilipinas ang naging hakbang ng Facebook subalit wala naman silang rekomendasyon kung anong dapat gawin ng pamahalaan.

Patunay na nasa tamang direksyon ang administrasyon ni Pangulong Rodrigo Duterte.

Ito ang inihayag ni Presidential Communications Secretary Martin Andanar matapos lumabas ang pinaka-bagong survey ng Pulse Asia na umangat sa 81 percent mula sa dating  76 percent ang trust at approval rating ni Pangulong Duterte.

Ayon kay Andanar, patuloy ang Duterte administration sa pagsasakatuparan ng pangarap ng pangulo na bigyan ng komportableng buhay ang lahat, paglaban sa illegal drugs, kriminalidad at korapsyon.

Tiniyak din ng PCOO official na habang katuwang ng punong ehekutibo ang buong gabinete ay hindi mananawa ang pamahalaan na tuparin ang mga programang para sa mga mamamayan.