HOT STORIES OF THE WEEK

Tinapos na ng Senado ang interpellation sa panukalang 2019 national budget na nagkakahalaga ng 3. 7 trillion pesos.

Dahil dito, inaasahan ng mga senador na maaaprubahan sa Lunes, January 21 sa ikatlong pagbasa ang panukalang budget sa taong ito.

Inaprubahan ni Senate President Vicente Sotto III ang mosyon ni Majority Floor Leader Juan Miguel Zubiri matapos na walang senador na kumontra para tapusin na ang interpellation sa General Appropriations Bill.

Sinabi ni Zubiri na si Senate Finance Committee Chair Loren Legarda at siyang sponsor ng bill ang magpiprisinta ng mga amiyenda sa plenaryo.

Magiging mabilis aniya ang amiyenda at puwedeng maaprubahan ang 2019 national budget sa ikalawa at ikatlong pagbasa dahil certified itong urgent.

Matapos ang pag-apruba sa third reading, magko-convene ang Senado at kamara bilang Bicameral Conference Committee para plantsahin ang magkakaibang posisyon sa pagitan ng dalawang bersyo ng panukalang batas.

Inaasahan naman ni Senador Panfilo Lacson na magiging madugo ang bicam subalit igigiit aniya ng Senado ang pagtanggal sa umano’y isiningit na 75 billion pesos na pondo ng Department of Public Works and Highways (DPWH).

—-

Bumaba ang bilang ng mga pamilyang Filipino na nakaranas ng gutom sa huling bahagi ng 2018.

Batay ito sa resulta ng isinagawang survey ng Social Weather Stations (SWS) sa isang libo apatnaraan at apatnapung (1,440) mga adult respondent mula December 16 hanggang 19.

Sa nasabing SWS survey, lumabas na 10.5 percent o katumbas ng tinayang 2.4 million ng mga pamilya ang nagsabing nakaranas sila ng gutom, kahit isang beses sa nakalipas na tatlong buwan.

Mas mababa ito ng halos tatlong puntos sa nakuhang 13.4 percent o tinatayang 3.1 million na mga Filipino sa katulad na survey noong September 2018.

Sa kaugnay ding survey naitala sa 10.8 percent ang average hunger rate sa taong 2018.

Ayon sa SWS, ito na ang naitalang pinakamababang annual average rate sa loob ng labing limang (15) taon simula noong 2003 na 7 percent.

—-

Inamin ng dating pangulo at ngayo’y House Speaker Gloria Macapagal-Arroyo ang paggamit ng marijuana.

Subalit nilinaw ni Arroyo na tanging marijuana pain patch lamang ang ginamit niya para lunasan ang kaniyang cervical pain at ito ay ginawa niya sa bansa kung saan may go signal itong gamitin.

Dahil dito, isinulong ni Arroyo ang panukalang gawing legal ang medical marijuana sa bansa para makatulong sa mga nangangailangang tulad niya.

Ang nasabing panukala ay nasa ikalawang pagbasa na sa Kamara.

—-

Pinag-iingat ng Department of Health (DOH) ang publiko sa trangkaso na nararanasan sa mga panahong ito.

Ayon kay Health Spokesman Undersecretary Eric Domingo, ang Enero at Pebrero ay itinuturing na peak months kung kailan marami ang nagkaka-trangkaso kaya’t dapat mag-ingat laban dito.

Subalit sinabi ni Domingo na kumpara sa kabuuang bilang noong isang taon sa buong bansa, mas mababa pa rin ang naitalang nagka-trangkaso ngayong taon.

Ang 2018 aniya ay maituturing na bad season para sa flu hindi lamang sa Pilipinas kundi maging sa buong mundo.

Ipinabatid ni Domingo na nakakahawa ang iba’t ibang strains ng flu sa sandaling nagkaroon ito ng contact sa katawan ng tao, maging ito man ay sa pamamagitan ng ubo mula sa ibang tao o paghawak sa kontaminadong gamit pagkatapos ay hahawakan ang bibig o ilong.

Hinimok ni Domingo ang mga tao na takpan ang kanilang bibig kapag umuubo o bumabahing para maiwasan ang pagkalat ng flu virus na madali naman aniyang gamutin maliban na lamang kapag tumama sa mga bata, matatanda at may mahinang immune system dahil may ibang sakit.

—-

Personal na dumalo si Senador Antonio Trillanes IV sa itinakdang arraignment ngayong umaga sa Davao City.

Kaugnay ito sa mga kasong libelo na isinampa laban kay Trillanes nina dating Davao City Vice Mayor Paolo Duterte at presidential son in law Atty. Manases Carpio, asawa ni Mayor Inday Sara Duterte.

Nagpasok ng not guilty plea ang senador kasabay ng pagtitiyak na haharapin ang kaso.

“Umiikot ang mundo. Ako, tinatanggap ko lang yung hamon na binibigay nila sakin. Darating ang panahon na sila rin yung tatanggap ng mga hamon. They should be ready also.” Pahayag ni Trillanes

Aniya boluntaryo siyang dumalo sa arraignment bilang pagkilala sa hurisdiksyon at kapangyarihan ng korte.

Magugunitang noong isang taon naglabas ng apat na arrest warrant si Judge Melinda Alconcel-Dayanghirang laban sa senador.

—-

Sinimulan na ng National Privacy Commission ang imbestigasyon sa nangyaring passport data breach o pagkawala ng mga datos ng DFA o Department of Foreign Affairs.

Ayon kay Privacy Commissioner Raymund Liboro, unang-una ay nais nilang malaman ang katotohanan sa likod ng nangyaring pagkawala ng mga datos.

Hangad din anya nilang magkaroong linaw ang pahayag ni Foreign Affairs Secretary Teodoro Locsin kaugnay sa tumakas na passport kontraktor ng ahensya.

Dagdag pa nito, kailangan muna nilang marinig ang panig ng mga nasasangkot sa naturang isyu ngunit pangunahin anya nilang nais pakalmahin at bigyang linaw sa nangyari ay ang taong bayan.

“At this point, kailangan po nating marinig yung lahat ng panig dito pero ultimately, ang gusto ho nating talagang bigyang klaro ay makalma ang taong bayan, kung ano man ang nangyari sa kanilang mga datos at mga dokumento na ipinagkatiwala sa lahat po ng ahensya na nag process po nito.”

(From Balitang Todong Lakas interview)