HOT STORIES OF THE WEEK

Hinimok ni Presidential Peace Adviser Carlito Galvez ang publiko lalo ang mga muslim na makibahagi sa plebesito para sa Bangsamoro Organic Law o BOL sa Lunes, Enero 21 at Pebrero 6.

Ayon kay Galvez, hindi dapat mag-aksaya ng panahon sa isang bihirang pagkakataon na makaboto.

Napakahalaga at makasaysayan anyang kaganapan para sa Mindanao ang plebesito para sa mga moro at non-moro people na naninirahan sa itatatag na Bangsamoro Autonomous Region.

Titiyakin sa ilalim ng BOL ang matagal nang inaasam na kapayapaan sa Mindanao na magreresulta sa kaunlaran sa naturang lugar.

Nagsagawa ng mock elections sa animnapung (60) mga lugar sa bansa sa pangunguna ng Commission on Elections (Comelec) bilang paghahanda sa May 13 midterm elections.

Nagsimula kaninang alas-5:00 ng umaga ang naturang aktibidad at inaasahang tatagal hanggang ala-1:00 ng hapon.

Kabilang sa animnapung (60) mga lugar kung saan nagsagawa ng mock elections ang Quezon City, Maynila, Pasig, Taguig, Pateros, Valenzuela, Muntinlupa, Pangasinan, Cagayan, Sorsogon, Camarines Sur, Cebu, Bohol, Sulu at Basilan.

Palalawigin naman hanggang alas-6:00 ng gabi ang mock elections sa ilang mga barangay patikular na sa Quezon City na may malaking bilang ng mga botante.

Samantala, mag-iikot din ngayong araw si Comelec Spokesperson James Jimenez sa ilang mga distrito sa nabanggit na lugar para mag-inspeksyon at mag-obserba sa naturang aktibidad.

—-

Nanawagan ng suporta si Pangulong Duterte para plebisito ng ratipikasyon ng Bangsamoro Organic Law (BOL) sa darating na Lunes.

Sa kanyang talumpati sa pro-BOL assembly sa Cotabato City, hinikayat ng Pangulo ang residente na bumoto pabor sa BOL para sa maitama aniya ang historical injustice laban sa mga mamamayang Muslim.

Ayon sa Pangulo, panahon na para kalimutan ang nakaraan at pagtuunan ng pansin ang kinabukasan.

Binigyang diin ng Punong Ehekutibo na ang pag-apruba sa BOL ay di lamang pagpapahayag ng mga Moro ng mithiin nilang tapusin ang matagal nang armadong pakikibaka kundi magsisilbi itong tipanan ng determinasyong magdadala ng kapayapaan at kaunlaran sa Mindanao.

—-

Plano ni Pangulong Rodrigo Duterte na makipag-usap kay Moro National Liberation Front (MNLF) Founder Nur Misuari matapos ang plebisito para sa ratipikasyon ng Bangsamoro Organic Law (BOL) na nakatakda sa Lunes, Enero 21 at Pebrero 6.

Sinabi ito ng Pangulo sa kanyang talumpati sa Cotabato City kung saan kanyang hiniling sa mga residente na suportahan ang ratipikasyon ng panukalang Organic Law.

Ayon sa Pangulo, nais niyang i-alok ang pagkakaibigan at kapayapaan kay Misuari at umaasa siyang may mabubuong kasunduan na di lamang para sa kapakanan ng MNLF kundi ng lahat ng mga Moro sa Mindanao.

Matatandaang Agosto nang nakaraang taon nang magkita ang Pangulo at si Misuari sa Davao City, isang buwan bago maisabatas ang BOL.

—-

Kasado na sa susunod na linggo ang joint investigation ng mga mambabatas kaugnay sa passport data breach sa Department of Foreign Affairs (DFA).

Ayon kay Bayan Muna Party-list Representative Carlos Isagani Zarate, dapat mabusisi ang ginawang pagtangay ng passport maker firm ng lahat ng impormasyon ng mga indibiduwal na kumuha ng passport dahil malalim ang epekto nito at maaaring gamitin sa krimen ang mga nakuhang impormasyon.

Ipinabatid ni Zarate na noong isang taon pa sila nagsimulang mag-imbestiga dahil sa hinalang nagkaroon ng anomalya sa pagbibigay ng gobyerno ng kontrata sa paglilimbag ng passport sa isang pribadong kumpanya.

—-

Mas lumala pa ang krisis sa karapatang pantao sa Pilipinas nitong 2018 sa ilalim ng pamumuno ni Pangulong Rodrigo Duterte.

Batay ito sa ipinalabas na taunang world report ng Human Rights Watch (HRW).

Ayon sa grupo, umabot na sa halos limang libo (5,000) ang bilang ng mga nasawing suspected drug user at pusher sa mga ikinasang operasyon ng pulis sa ilalim ng war on drugs ng administrasyong Duterte simula July 1, 2016 hanggang September 30, 2018.

Hindi pa anila kasama sa nasabing bilang ang libu-libong pinatay ng mga hindi pa nakikilalang mga gunmen na tinatawag ng pulisya na homicide under investigation.

Sinabi pa ng HRW, hindi nila matukoy ang eksaktong bilang ng mga nasawi sa war on drugs dahil sa kabiguan ng pamahalaan na magpalabas ng mga datos hinggil dito.

Binanggit din ng HRW ang pasiya ni Pangulong Duterte na kumalas sa International Criminal Court (ICC) dahil sa pasiya ng nasabing korte na imbestigahan ang mga kaso ng pagpatay na may kinalaman sa kampanya kontra iligal na droga ng pamahalaan.

—-