HOT STORIES OF THE WEEK

Kabilang ang Pilipinas sa mga bansa sa buong mundo na mayroong pinakamalaking paglobo sa bilang ng mga nagkakasakit ng measles o tigdas.

Batay ito sa naging UNICEF o United Nations Children’s Fund kasunod ng pagsampa sa alarming high level ng measles sa buong mundo.

Ayon sa UNICEF, Ukrain, Pilipinas at Brazil ang may pinakamalaking itinaas sa bilang ng nagkakasakit ng tigdas sa loob lamang ng isang taon.

Sa bansa batay sa DOH, umabot na sa 15,599 ang nagkasakit ng tigdas mula Enero hanggang Pebrero ngayong taon kumpara sa 2,407 na kaso nuong 2017.

Una nang idineklara ang measles outbreak sa Metro Manila, Central Luzon, CALABARZON, Western Visayas at Central Visayas.

Naniniwala ang Malakanyang na nagsimula nang gumulong ang hustisya laban sa ilang personalidad na may kaugnayan sa dengvaxia controversy.

Ito ay matapos na makitaan ng probable cause ng Department of Justice o DOJ si dating Health Secretary Janet Garin at iba pa sa kasong reckles imprudence resulting to homicide dahil sa pahkamatay ng walong batang nabakunahan ng dengvaxia.

Ayon kay Presidential Spokesman Salvador Panelo, dapat ay tigilan na ang pamumulitika sa isyu lalot nagdulot na ito ng takot sa mga magulang na pabakunahan ang kanilang mga anak.

Maganda aniyang pagkakataon ito para linisin at idepensa ng mga akusado ang kanilang pangalan sa korte.

Sa huli, siniguro ni Panelo na hindi makikialam ang malakanyang sa gagawing pagdinig ng doj sa naturang kaso.

Bukod kay Garin, kasama rin sa inirekomendang makasuhan ay ang ilang mga dating opisyal ng Department of Health o DOH, Food and Drug Administration o FDA, Research Institute for Tropical Medicine at ang kumpanyang Sanofi Pasteur.

Pinakakasuhan na ng Department of Justice o DOJ si dating Health Secretary Janet Garin at 19 na iba pa dahil sa pagkamatay ng ilang batang nabakunahan ng dengvaxia.

Ayon sa DOJ panel, may nakita silang sapat na basehan para kasuhan ng reckless imprudence resulting to homicide si Garin, siyam na health officials, dalawang opisyal ng Food and Drug Administration o FDA, dalawang opisyal ng research institute for tropical medicine at anim mula sa Sanofi Pasteur, ang manufacturer ng dengvaxia.

Malinaw anila na nagkulang sa pag-iingat at foresight si Garin at iba nang madaliin nila ang registration at pagbili ng dengvaxia at gamitin agad ito sa school based mass immunization program.

Pinuna rin ng DOJ panel na tila hindi nasunod ang proseso at regulasyon sa pagbili ng tatlo at kalahating bilyong pisong halaga ng dengvaxia.

Ang kasong dinesisyunan ng DOJ panel ay para pa  lamang sa siyam mula sa 35 na reklamo na inihain ng mga magulang ng mga batang nabakuhanan ng dengvaxia subalit sumakabilang buhay.

Samantala, ibinasura ng DOJ panel ang kaso laban kay Health Secretary Francisco Duque III at Zuellig Pharma Corporation.

Tiniyak ni US Secretary of State Michael Pompeo na magiging kakampi at kasangga ng Pilipinas ang Amerika sakaling magkaruon ng military aggression o giyera sa South China Sea.

Ito ayon kay Pompeo ay base na rin sa mutual defense treaty ng Amerika at Pilipinas.

Sinabi ni Pompeo na malaking banta rin sa Amerika sakaling maging banta sa seguridad, soberanya at ekonomiya ng Pilipina ang anumang military activity ng China sa South China Sea.

US handang mag supply ng armas sa PH

Handa ang Amerika na mag supply ng armas sa Pilipinas kung kakailanganin ito.

Ito ayon kay Presidential Spokesman Salvador Panelo ang pinasasabi ni US President Donald Trump sa pangulong rodrigo duterte sa pamamagitan ni US Secretary of State Michael Pompeo.

Sinabi ni Panelo na kinumpronta ng pangulo si Pompeo kaugnay sa naging pagtanggi nuon ng Amerika na bentahan ng mga armas ang pilipinas na malapit na kaalyado ng Estados Unidos.

Tila ayaw pang mag commit ng Pangulong Rodrigo Duterte sa imbitasyon ng US government na bumisita sa nasabing bansa.

Ito ayon kay Presidential Spokesman Salvador Panelo ay dahil walang malinaw na pag-uusap sina Pangulong Duterte at US Secretary of State Mike Pompeo kaugnay sa posibleng state visit ng pangulo sa Amerika.

Sinabi ni Panelo na maliban sa malayo hindi pa rin kaya ng pangulo ang sobrang lamig ng temperatura duon.

Unang inimbitahan ni Trump ang pangulo na bumisita sa Amerika sa kanilang phone conversation nuong May 2017 at July 2018 nang ipabatid naman ni US Ambassador to the Philippines Sung Kim na inaayos pa nila ang posibilidad na Washington visit ng Pangulong Duterte.

Itinanggi ng Chinese Embassy sa Pilipinas na gagantihan ng kanilang gobyerno ang mga Pilipino sa sandaling ipa-deport ng pamahalaan ang Chinese nationals na mapapatunayang iligal na nagtatrabaho sa bansa.

Kasunod na rin ito ng naging pahayag ng malakaniyang hinggil sa umanoy nasabing banta ni Chinese Ambassador Zhao Jinhua.

Sinabi ng Chinese Embassy na walang dahilan para hindi ipatupad ng kanilang gobyerno ang mga batas at panuntunan may kinalaman sa illegal foreign workers.

Iginagalang anito ng Beijing ang mga regulasyon ng Pilipinas at hindi nila kinukunsinti ang mga kababayan nilang iligal na nagta trabaho sa Pilipinas.

Ayon sa Chinese Embassy mahigpit ang paalala nila sa kanilang mga nationals na sundin ang mga batas ng mga bansang pinupuntahan nila.

Maaga nang inani ng mga magsasaka sa Hilagang Luzon ang kanilang mga pananim na mais bago pa ito maapektuhan ng mataas na temperatura.

Ito ay dahil nagsisimula nang maramdaman sa ilang bahagi ng bansa ang epekto ng El Niño partikular na sa Laoag City, Ilocos Norte.

Ayon naman sa ilang magsasaka ng kamote, maaga na rin nilang inani ang kanilang mga pananim dahil sa mga peste na dulot ng kakulangan ng supply ng tubig at mainit na panahon.

Samantala, bumuo na ng task force ang Albay Provincial Agricultural Office na tututok sa epekto ng El Niño na nagsisimula nang ring maramdaman sa lalawigan.

—-

Nakipag-ugnayan na ang Department of Information and Communications Technology (DICT) sa social media networking company na Facebook na siyang may hawak ng messaging app na WhatsApp.

Kasunod ito ng umano’y kumakalat na Momo Challenge, isang online gaming challenge sa Whatsapp na sinasabing nagiging dahilan ng pananakit sa sarili hanggang pagpapatiwakal ng ilang mga kabataan.

Ayon kay DICT Secretary Eliseo Rio Jr., nangako na sa kanila ang Facebook na iba-block ang nasabing nakamamatay na challenge sakaling gamitin bilang platform ang Whatsapp o kanilang messaging app para ipakalat ito.

Sinabi ni Rio, noong nakaraang taon pa simulan ng mga awtoridad sa ibang bansa ang pagsisiyasat kung saan nagsimula ang nasabing challenge.

“Mga July of last year ay reported na itong Momo challenge sa iba-ibang bansa at ang mga awtoridad doon ay hinahanap na rin ang source, pero bina-block na rin, actually ang nag-umpisa nito ay ang tinatawag na blue whale challenge at yun effectively ay blocked na rin kaya nag-evolve na naman dito sa isa.” Ani Rio

Kasabay nito, pinayuhan ni Rio ang mga magulang na maging alerto sa mga aktibidad ng kanilang mga anak sa social media.

Kanya ring inimbitahan ang mga magulang na dumalo sa isinasagawang seminar ng DICT para maiging mabantayan ang mga social media activity ng kanilang mga anak.

“Kailangan vigilant tayo, i-monitor natin palagi, sa DICT may program kami na digital parenting na pagtuturo at pag-inform sa mga magulang kung paano nila i-monitor at i-guide ang kanilang mga anal, alam niyo naman ang mga bata ngayon mas marunong pa sa pagpunta sa mga website kaysa sa mga magulang.” Pahayag ni Rio

Balitang Todong Lakas (Interview)

Timbog ang isang doktor na dating empleyado ng Department of Health (DOH) at anim (6) na iba pa sa ikinasang operasyon ng mga awtoridad sa Mandaluyong City.

Nagtuturok umano ang doktor na kinilalang si Dr. Vanjoe De Guzman ng nilusaw na shabu sa mga parokyano nito.

Nasabat ng Philippine Drug Enforcement Agency (PDEA) ang nasa 300,000 pisong halaga ng shabu at liquid ecstasy pati na mga injection na ginagamit umanong pangturok sa nilusaw na shabu.

Aminado naman ang doktor na gumagamit ito ng droga ngunit mariing itinatanggi na nagbebenta siya nito.

Nadiskubre rin ng mga awtoridad ang mga malalaswang larawan at video sa cellphone ng isa sa mga naarestong suspek.

Batay sa imbestigasyon, nagsasagawa pa ng “sex party” ang mga suspek kasunod ng kanilang mga drug session sa isang condominium unit sa Mandaluyong.

Samantala, kinumpirma naman ng DOH na empleyado nila ang naturang doktor ngunit Nobyembre noong nakaraang taon nang nag-AWOL o absent without leave na ito sa trabaho.

—-

Nagkaharap na sina Pangulong Rodrigo Duterte at U.S Secretary of State Mike Pompeo, kagabi.

Bago magtungo ng Davao City, nagkita si Pangulong Duterte at Pompeo pagdating sa Villamor Airbase sa Pasay City mula Hanoi, Vietnam.

Bagaman hindi pa idinedetalye ang nilalaman ng napag-usapan ng pangulo at U.S official, inihayag ng mga opisyal mula Malakanyang na kabilang sa mga tinalakay ang Philippines-U.S Mutual Defense Treaty.

Kasama ni Pangulong Duterte sina Foreign Affairs Secretary Teodoro Locsin Jr, Executive Secretary Salvador Medialdea, Assistant Secretary Lumen Esleta ng Office of American Affairs at dating presidential Aide Christopher Go.

Kasama naman si Pompeo nina Ambassador Sung Kim, Senior Bureau Official Patrick Murphy at State Department Deputy Spokesman Robert Palladino.