HOT STORIES OF THE WEEK

May resolusyon na ang DOJ para sa unang batch ng Dengvaxia case na isinampa ng PAO o Public Attorneys Office.

Ang nasabing kaso ay nag ugat sa pagkamatay ng siyam na bata matapos umanong maturukan ng Dengvaxia.

Gayunman, tumanggi muna ang DOJ na ilabas ang resolusyon dahil bibigyan muna ng kopya ang complainants at respondents.

Kabilang sa mga kinasuhan sina dating health secretary Janet Garin, Maria Lourdes Santiago at Melody Zamudio mula sa Food and Drug Administration at Socorro Lupisan at Maria Rosario Capending ng RITM o Research Institute for Tropical Medicine.

Kinasuhan din ang mga executive ng Sanofi Pasteur Incorporated na manufacturer ng Dengvaxia at fistributor nitong Zuellig Pharma Vorporation.

Nanindigan si BTA o Bangsamoro Transition Authority Interim Chief Minister Alhaj Murad Ebrahim na walang iregularidad sa appointment ng mga uupo sa transition government ng BARMM o Bangsamoro Autonomous Region in Muslim Mindanao.

Kasunod na rin ito ng pag kuwestyon ni Atty. Ferdausi Abbas ng MNLF sa komposisyon ng BTA na malinaw na hindi pantay ang hatian ng puwesto sa BTA ng MNLF at MILF.

Sinabi ni Ebrahim na malinaw sa ilalim ng Bangsamoro Organic Law na sa transition period ng BARMM, MILF ang mamumuno at halos bubuo sa BTA.

Ito aniya ay para mabigyan na rin ng pagkakataon na ma transform ang kanilang hanay sa MILF mula revolutionary organization patungong governance at bureaucracy.

Umapela si Ebrahim ng pang unawa kay Abbas dahil ang BTA ay tatagal lamang ng tatlong taon at makalipas nito ay maaari nang lumahok ang grupo ni Abbas sa eleksyon para sa BARMM.

Umaabot sa dalawandaang (200) milyong piso ang kinita ng New People’s Army (NPA) mula sa mga kandidato sa eleksyon noong 2016.

Ayon kay Assistant Secretary Jonathan Malaya ng Department of Interior and Local Government (DILG), bagamat wala silang kumpirmasyon, lumalabas sa ilang intelligence reports na hanggang dalawampung (20) milyong piso ang hinihingi ng NPA sa presidential candidates habang nasa sampung (10) milyon ang sa bise presidente na gustong mangampanya sa itinuturing nilang teritoryo.

Sinabi ni Malaya na konserbatibo pang maituturing ang 200 milyong pisong koleksyon ng NPA para sa permit to campaign at permit to win noong 2016.

Una rito, inatasan ni DILG Secretary Eduardo Año ang PNP na i-monitor at bumuo ng kaso laban sa mga pulitikong nagbabayad ng campaign fees sa NPA.

Sinasabing nasa halos 350 opisyal ang nasa watchlist ng DILG kabilang ang labing isang (11) gobernador, limang (5) bise gobernador, mahigit limampung (50) mayors, mga board members, konsehal at barangay captains.

—-

Napaghandaan na ng Department of Transportation (DOTr) ang lahat ng puwedeng maging problema sa pagtatayo ng Metro Manila Subway.

Sa panayam ng DWIZ, tinukoy ni DOTr Assistant Secretary Goddess Hope Libiran ang pagsisikip ng trapiko at mga posibleng maapektuhan kapag naghukay na para sa linya ng subway.

Ipinaliwanag ni Libiran na tanging sa mga istasyon lamang ng subway magkakaroon ng problema sa trapiko.

Hindi aniya makakaabala ang paghuhukay dahil may lalim itong katumbas ng labing anim (16) na palapag ng gusali kaya’t hindi makakaabala sa mga nasa itaas ng lupa.

Sinabi ni Libiran na isa pa sa mga apektado ng konstruksyon ang mga residente sa mga lugar na pagtatayuan ng mga istasyon ng subway.

Tiniyak ni Libiran na walang demolisyong magaganap dahil mahigpit ang direktiba ng Pangulong Rodrigo Duterte na hindi puwedeng mag-demolish hangga’t walang relocation sites para sa mga apektadong residente.

Sa depot pa lamang aniya ng subway sa Valenzuela ay nasa halos dalawandaang (200) pamilya ang apektado subalit naihanap na ng relokasyon.

“Handa naman po kami diyan ang nasa isip at nasa puso namin ay matapos itong proyekto, kasi ito pong project na ito ay kailangang-kailangan ng mga tao ito eh, kaya ipaiintindi po namin sa kanila ‘yan, kung kailangang makipagtulungan sa mga appropriate agencies ay gagawin po namin.” Pahayag ni Libiran

 (Ratsada Balita Interview)

Ikinakasa na ng mga transport group ang isang malawakang transport strike.

Ito’y bilang protesta sa sunod-sunod na inilargang dagdag-presyo sa mga produktong petrolyo.

Ayon kay Steve Ranjo, Secretary General ng transport group na Pinagkaisang Samahan ng mga Tsuper at Operator Nationwide (PISTON), mas malaking kilos-protesta ang kanilang ikakasa laban sa gobyerno at mga kumpanya ng langis kapag hindi kumilos ang mga ito para mapababa ang presyo ng langis.

Hindi na aniya makasabay ang mga drayber ng jeep at mga operators sa presyo ng diesel na ngayo’y sumampa na sa 44 hanggang 45 piso kada litro.

Iginiit din ni Ranjo na suspendihin na lamang ng gobyerno ang pagpapataw ng excise tax sa petrolyo na tatapyas ng dalawang piso at limampung sentimos (P2.50) sa kada litro nito, kaysa umaray ang mga commuters sakaling itaas na naman ang pamasahe sa jeep.

Sa ngayon ay wala pang sinabing petsa si Ranjo para sa nakaambang malawakang transport strike.

—-

Isinapubliko na ng Malakaniyang ang appointment papers ng mga bumubuo sa BTA o Bangsamoro Transition Authority.

Pebrero 23 nilagdaan ni Pangulong Rodrigo Duterte ang appointment papers kay Ahod Balawag Ebraim o mas kilala bilang MILF Chairman Alhaj Murad Ebrahim bilang interim chief minister at 75 iba pa.

Ilan sa mga miyembro ng BTA na mayroon nang appointment papers sina MILF Chief Peace Negotiator Mohager Iqbal, Gazali Jaafar at ilan pang personalidad na galing sa mga kilalang angkan sa Mindanao.

76 na pangalan pa lamang ang may appointment papers mula sa ,alakaniyang taliwas sa unang napaulat na 80 miyembro ng BTA.

Nabatid na ang tatlo o apat na iba pa ay hindi nakakuha ng clearance sa NBI, PNP at iba pang ahensya ng gobyerno dahil may mga pending case sa korte o sa Office of the Ombudsman.

Pormal nang pinasinayaan ang Metro Manila Subway, ang kauna-unahang underground rail line ng Pilipinas.

Pinangunahan ito ng Department of Transportation (DOTr) at dinaluhan rin ng Ambassador ng Japan sa Pilipinas na si Koji Haneda.

Magsisimula ang Metro Manila Subway sa North Avenue hanggang sa FTI at NAIA Terminal 3.

Konektado rin ito sa lahat ng railway system ng bansa tulad ng lahat ng linya ng MRT, LRT at PNR.

Sa pamamagitan ng Japanese technology, aabot na lamang sa tatlumpu’t isang (31) minuto ang biyahe mula North Avenue hanggang FTI o NAIA Terminal 3.

Tiniyak ng DOTr na ligtas sa baha ang Metro Manila Subway kahit sa mga lugar na bahain at itatayo ito sa mga lugar na malayo sa fault line.

Ayon kay DOTr Undersecretary Timothy Batan, ang Metro Manila Subway ang pinakamabilis na umusad ng proyekto sa ilalim ng Build Build Build.

PH-Japan ‘hand in hand’

Makaka-asa ang Pilipinas sa matagal nang karanasan ng Japan, hindi lamang sa konstruksyon kundi maging sa pagpapatakbo ng operasyon at maintenance ng subway system.

Tiniyak ito ni Japanese Ambassador to the Philippines Joji Haneda sa groundbreaking ceremony para sa Metro Manila Subway.

Ayon kay Haneda, siguradong magiging malaking game changer ang Metro Manila Subway sa matagal nang problema sa trapiko sa Metro Manila.

Sa panig ni Transportation Secretary Arthur Tugade, sinabi nito na ang dating pangarap lamang ng mga Pilipino ay magkakaroon na ng katuparan.

Bago matapos ang Duterte administration ay posbileng masimulan na ang operasyon ng tatlong istasyon ng subway sa Quirino Avenue, Tandang Sora at North Avenue.

Ang proyekto ay may pondong mahigit sa 350 billion pesos mula sa Japan International Cooperation Agency (JICA).

—-

Aminado ang Moro National Liberation Front (MNLF) faction ni Chairman Nur Misuari na hindi nila kayang tanggapin ang Bangsamoro Organic Law (BOL).

Ayon kay Atty. Emmanuel Fontanilla, Spokesman ni Misuari, hindi nila puwedeng kilalanin ang BOL dahil para na rin nilang nilusaw ang Tripoli agreement at ang kanilang nilagdaang peace agreement sa pamahalaan noong 1996 na nagresulta sa pagkakatatag ng Autonomous Region in Muslim Mindanao (ARMM).

Gayunman, nilinaw ni Fontanilla na bagamat hindi nila kinikilala ang BOL, iginagalang naman nila ang proseso ng pagkakabuo dito.

Sa ngayon, sinabi ni Fontanilla na nagmamasid lamang sila at nakahandang mag-antay hanggang sa mapalitan ng federalismo ang sistema ng pamahalaan dahil pangako ito sa kanila ng Pangulong Rodrigo Duterte.

“Itong BOL na ito will be absorbed also in that form of government, so I don’t see any problem kasi the President committed to us, the MNLF that we will work on the federal form of government and we are very contented with that one, so walang conflict ang BOL sa kung ano pa man, but we cannot of course recognize the process for the simple reason that we have agreement, we have the Tripoli agreement and the final phase agreement, kung ire-recognize namin ang process ng BOL eh di wala na ‘yung aming agreement.” Ani Fontanilla

Ayon kay Fontanilla, hindi lamang ang problema ng kapayapaan sa Mindanao ang kayang resolbahin ng federalismo.

Wala aniya silang nakikitang problema para hindi pumasa ang federalismo lalo pang pawang kaalyado ng Pangulo ang mga miyembro ng Kongreso.

“We respect the process and we do not in any way intervene, ang point natin is we have to work hard on the federal government kasi ang BOL will be incorporated sa federal form of government, ‘yun ang trabahuhin natin. Ulitin ko ang panawagan ko sa media agency ng government, let us produce these documents and let our people read in their dialects para maintindihan kung ano ang isinusulong natin, kasi kung ganitong sila lang sa taas ang nakakaalam, paano ‘yung mga tao?” Pahayag ni Fontanilla

(Ratsada Balita Interview)

Handa si Pangulong Rodrigo Duterte na bigyan ng Filipino citizenship ang mga Rohingya refugee.

Ito ang inihayag ni Pangulong Duterte sa kanyang talumpati sa general assembly ng League of Municipalities of the Philippines sa Manila Hotel.

Ayon sa Pangulo,  hindi makatuwiran ang akusasyon ng United Nations (UN) na may nagaganap na genocide sa Myanmar maging ang pakikialam ng ilang western nation sa internal conflict sa nasabing bansa.

“Sige sila pakialam diyan sa ano.. I’am willing to accept Rohingyas. Kung talagang walang mapuntahan, tatanggapin ko yan. Gawin kong Pilipino. I’am ready to accept refugees. Tutulungan natin yan.” Ani Pangulong Duterte

Nakasaad aniya sa 1987 Constitution na karapatan ng sinuman kabilang ang mga dayuhan sa Pilipinas na magkaroon ng maayos na tirahan kaya’t hindi siya magdadalawang-isip na bigyan ng citizenship ang mga Rohigya.

“I can only lean on the principle of our constitution that no man shall be deprived if life, liberty, or property without due process of law. Everyone. Foreigners or citizens are entitled to it. No exceptions.” Pahayag ni Pangulong Duterte

---

—-