HOT STORIES OF THE WEEK

Nakaamba ang dagdag singil sa kuryente ng Manila Electric Company o Meralco ngayong buwan.

Paliwanag ni Meralco Spokesman Joe Zaldarriaga, mawawala na kasi ang trenta’y otso sentimos (P0.38) kilowatt hour na refund na ipinatupad noong nakaraang buwan dahil sa sobrang nakolektang universal charge-stranded contract costs.

Dahil dito, tinatayang nasa singko sentimos (P0.05) hanggang trenta sentimos (P0.30) kada kilowatt hour ang magiging dagdag sa overall rate.

I-a-anunsyo umano ang pinal na halaga sa Huwebes.

—-

Bumagal sa 3.8 percent ang inflation rate para sa nakalipas na buwan na siyang pinakamababang inflation rate mula noong March 2018.

Ipinabatid ito ng Philippine Statistics Authority (PSA) kumpara sa 4.4 percent na inflation rate sa unang buwan ng taong ito.

Sinabi ng PSA na malaking kontribusyon sa pagbagal ng inflation ang pagbaba ng presyo ng mga pangunahing bilihin lalo na ng food products.

Ito ang unang pagkakataon makalipas ang isang taon na nakamit ng gobyerno ang target na 2 hanggang 4 percent lamang na inflation.

Kabilang sa major drivers nang paghina ng inflation ay food and non-alcoholic beverages, alcoholic and tobacco at transportasyon.

Naitala ang pinakamataas na inflation sa Mimaropa region may mayroong 5.3 percent mula sa 5.6 percent sa nakalipas na buwan ng Enero.

Ang Cordillera Administrative Region (CAR) pa rin naman ang may pinakamababang inflation na naitala sa 2. 5 percent mula sa dating 3.1 percent noong Enero.

Sa national capital region (NCR) o Metro Manila naman naitala ang 4.8 percent sa buwan ng Pebrero mula sa 4. 6 percent na inflation sa buwan ng Enero.

—-

Itinalaga ni Pangulong Rodrigo Duterte si Budget Secretary Benjamin Diokno bilang bagong governor ng Bangko Sentral ng Pilipinas o BSP.

Ayon kay Executive Secretary Salvador Medialdea, si Diokno na ang papalit sa nabakanteng pwesto matapos pumanaw si BSP Governor Nestor Espenilla dahil sa sakit sa cancer sa dila.

Inanusyo ang appointment ni Diokno bago nagsimula ang cabinet meeting kagabi sa Palasyo.

—-

Vindication sa PAO o Public Attorney’s Office ang desisyon ng DOJ o Department of Justice na may sapat na basehan para kasuhan si dating Health Secretary Janet Garin sa isyu ng dengvaxia.

Sinabi ni PAO Chief Percida Rueda-Acosta na ang paghahain ng kasong reckless imprudence resulting in homicide laban kay garin at labing siyam na iba pa ay patunay na hindi sila nagdulot ng takot sa publiko sa usapin nang pagpapa bakuna.

Tiwala rin si Acosta na kayng mapatunayan ng DOJ prosecutors ang pagkakasala ng mga akusado.

Sa kabila nito ipinabatid ni Acosta na maghahain sila ng partial motion for reconsideration dahil hindi nila ikinatuwa ang pag absuwelto kay Health Secretary Francisco Duque III at iba pang health officials.

Naging papel ng FDA sa dengvaxia controversy ipinaliwanag

Nagpaliwanag ang DOJ Panel of Prosecutors sa naging papel ng mga opisyal ng FDA o Food and Drug Administration sa kontrobersya sa dengvaxia.

Tinukoy ng panel ang ginawang pag apruba ng FDA sa registration ng dengvaxia sa kabila ng hindi kumpletong clinical trials dito.

Sinabi ng panel na dalawa ang parallel clinical trials sa dengvaxia sa limang bansa sa Asya at una at ikalawang clinical trials ay makukumpleto pa lamang nuong November 2017 at April 2018.

January 2015 anila nagsumite ng application sa FDA ang Sanofi Pasteur at December 2017 nang aprubahan ng FDA ang marketing ng dengvaxia kasabay nang pag-iisyu ng product registration.

Lumalabas din na ang purchase request sa dengvaxia ay ginawa nuong January 2016 at ang aktuwal na pagbili ay ginawa kaagad nuong March 2016.

Si dating Health Secretary Janet Garin at dalawang FDA officials ay kabilang sa mga pinakakasuhan ng DOJ ng reckless imprudence resulting in homicide dahil sa iregularidad sa dengvaxia.

Posibleng bawasan na nang hanggang siyamnapung (90) porsyento ng Department of Labor and Employment o DOLE ang deployment ng mga construction worker sa ibayong dagat.

Ito, ayon kay Labor Secretary Silvestre Bello III, ay bilang solusyon sa kakulangan ng mga construction worker sa bansa.

Umapela rin aniya sa DOLE ang mga nasa construction industry na pansamantalang ipatigil ang pagpapadala ng mga construction worker sa ibang bansa dahil sa manpower shortage.

Sa katunayan ay noon pang isang taon sinimulan ng Philippine Overseas Employment Administration (POEA) na bagalan ang pagpo-proseso ng mga ipinadadalang construction worker.

Posibleng tumagal ito ng tatlong taon o hanggang sa katapusan ng termino ni Pangulong Rodrigo Duterte.

—-

Patuloy pa rin ang pagtaas sa bilang ng mga nakakasakit ng tigdas sa bansa.

Ito ay matapos na makapagtala ng dalawang daan at limamput isang bagong kaso ang DOH o Department of Health sa loob lamang ng dalawang araw.

Dahil dito, sumampa na sa halos 14,000 o kabuuang 13,723 ang na-iulat ng DOH na kumpirmadong kaso ng tigdas mula Enero 1 hanggang Pebrero 26.

Habang 215 naman ang naitalang nasawi dahil sa tigdas.

Ayon sa DOH higit na mataas ito sa mahigit 3,000 kasong naitala noong nakaraang taon sa kaparehong panahon.