HOT STORIES OF THE WEEK

Nakaranas ng tinatawag na artificial na pagtaas sa demand ng suplay ng tubig ang Manila Water matapos silang magpatupad ng operational adjustment.

Ayon kay Manila Water Communications Manager Dittie Galang, noong Lunes pa lamang, marso a-kuwatro, kanila nang inanunsyo ang nakatakdang pagpapatupad ng water supply contingency plan o pagbabawas sa pressure ng tubig tuwing peak hours.

Layun aniya nito na mapabagal ang pagbaba ng lebel ng tubig sa La Mesa dam sa gitna na rin ng nararanasang El Niño phenomenon.

Gayunman sinabi ni Galang hindi nila inaasahang tataas ang demand sa tubig kahit off peak hours dahil sa pagtugon ng kanilang mga consumers na mag-imbak na ng suplay ng tubig.

Dahil aniya rito, naubos ang dalawang water reservoir ng Manila Water na nagresulta naman sa mas dumami pang lugar na nawalan ng suplay ng tubig.

“Nangyari po noong Miyerkules hanggang Huwebes ng madaling araw hindi po kami nakapag-puno ng reservoir. Kaya pagdating po ng Huwbwes ng gabi medyo mayroon tayong dalawang reservoir na bumaba ang level. Dahil dito marami tayong kababayan nawalan ng tubig simula pa noong Huwebes ng gabi sa Quezon City, Mandaluyong, San Juan at Pasig,” Pahayag ni Galang.

Tiniyak naman ni Galang na kanila nang ginagawa ang lahat para mabigyan ng suplay ng tubig ang mga apektadong lugar.

Imbestigasyon sa biglaang water service interruption inihirit

Iginiit ni Bayan Muna Representative Carlos Isagani Zarate ang pagsasagawa ng imbestigasyon sa naranasang biglaang pagkawala ng suplay ng tubig sa ilang bahagi ng Metro Manila.

Ayon kay Zarate dapat imbestigahan at panagunitin ng MWSS ang mga water concessionaires sa kanilang hindi maayos na serbisyo at pagpapabaya.

Kasabay nito, hinimok ni Zarate ang publiko na maging mapagmatiyag sa posibilidad na magamit ang nangyaring water service interruption para palabasing may krisis sa tubig sa bansa.

Una nang humingi ng paumanhin ang Manila Water matapos makaranas ng biglaang pagkawala ng suplay ng tubig ang ilang lugar sa Metro Manila partikular nasa Mandaluyong, Pasig at San Juan.

Gayundin ang anunsyo ng Maynilad na water service interruption sa kanlurang bahagi ng Metro Manila hanggang Lunes, Marso 11.

Maynilad nagabiso ng water service interruption

Nagabiso rin ng water service interruption ang Maynilad sa ilang lugar sa Metro Manila ngayong araw.

Ayon sa Maynilad, posibleng makaranas ng mahinang pressure ng tubig o mawalan ng suplay ang ilang bahagi ng Metro Manila simula alas nuwebe ng umaga kanina hanggang ala sais ng gabi mamaya.

Kabilang sa mga apektado ang ilang barangay sa Las Piñas City at Parañaque City.

Gayundin sa pitong barangay sa Bacoor City, Cavite; dalawang barangay sa Muntinlupa City.

Habang hanggang alas otso naman ng gabi ang water service interruption sa barangay almanza dos sa Las Piñas City at mga barangay ng Poblacion at Tunasan sa Muntinlupa City.

Ang nasabing emergency water service interruption ay bunsod naman ng mataas na demand ng suplay sa bahagi ng Putatan Water Treatment Plant ng Maynilad.

Hinimok ni Senador Panfilo Lacson ang Malakanyang na sampahan ng reklamo si dating Philippine Charity Sweepstakes Office General Manager Alexander Balutan matapos itong sibakin sa pwesto dahil sa umano’y katiwalian.

Ayon kay Lacson, sa kanyang palagay ang mga nakalap na impormasyon at naging aksyon ni Balutan nang isalang ito ng Senate committee on games and amusement sa imbestigasyon dahil sa alegasyon ng kurapsyon kaugnay sa STL ang siyang naging batayan sa pagkakasibak nito sa pwesto.

Binigyang diin ni Lacson na nararapat lamang na kasuhan na ng pamahalaan si Balutan ng paglabag sa Anti-Graft and Corrupt Practices Act.

Sinabi naman ni Senador Sherwin Gatchalian, matagal na dapat sinibak sa pwesto si Balutan.

Tinukoy ng senador ang paggasta nitong aabot sa P6 million para sa magarbong Christmas party ng PCSO noong 2017.

Ilang makapangyarihang personalidad nasa likod ng pagkakasibak kay Ex-PCSO GM Balutan

Itinuturo ni dating PCSO o Philippine Charity Sweepstakes Office General Manager Alexander Balutan sa ilang aniya’y makapangyarihang tao ang kanyang pagkakasibak sa pwesto.

Ayon kay Balutan, tinawagan siya ni Executive Secretary Salvador Medialdea at sinabing may ilang personalidad aniya ang nais na mawala maalis siya sa pcso.

Bagama’t hindi na ito idinetalye pa ni balutan, kanyang ipinahihiwatig na may kinalaman ito sa operayon ng STL o Small Town Lottery.

Binigyang diin pa ni Balutan, mismong siya ang humihiling na maimbestigahan para malinis aniya ang kanyang pangalan laban sa alegasyong sangkot siya sa katiwalian.

Nakahanda rin siyang humarap sa anumang klase ng imbestigasyon maging sa Kongreso.

Papalo sa 6,000 pamilya ang naapektuhan matapos mawalan ng suplay ng tubig mula sa Manila Water.

Ang mga ito ay mula sa Marikina, Pasig, Quezon City, Taguig, Mandaluyong at ilang lugar sa lalawigan ng Rizal.

Reklamo ng mga residente, wala silang natanggap na abiso lalo’t ipinadaan lamang online ng Manila Water ang kanilang advisory.

Ngitngit pa ng mga apektadong residente, wala ring nakalagay sa abiso ng Manila Water sa tiyak na araw at oras kung kailan mawawalan at babalik ang tubig.

Humingi naman ng paumanhin ang Manila Water sa lahat ng mga naperwisyo nilang customer sa east zone.

Tiniyak naman ng Manila Water na ginagawan nila ng paraan upang maibalik agad sa lalong madaling panahon ang suplay ng tubig sa mga apektadong lugar.

Kusang nagbitiw sa kanyang posisyon si dating General Manager Alexander Balutan ng PCSO o Philippine Charity Sweepstakes Office.

PCSO GM Alexander Balutan resigns ⁦@dwiz882⁩ pic.twitter.com/6Jpt8nC5CA

— JILL RESONTOC – DWIZ -882 AM radio (@JILLRESONTOC) March 8, 2019

Ito ang paglilinaw ng PCSO sa ipinadala nilang text message sa DWIZ.

Ayon kay Florante Solmerin, spokesman sa Office of PCSO General Manager, personal ang dahilan ng pagbibitiw ni Balutan.

Tumanggi naman si Solmerin na magbigay ng reaksyon sa report na pinagbitiw ng Pangulong Rodrigo Duterte si Balutan dahil umano sa katiwalian.

Si Balutan ay matatandaang dating marine officer na naging testigo sa imbestigasyon ng senado hinggil sa mga katiwalian sa Armed Forces of the Philippines nuong Arroyo administration.

with report from Jill Resontoc (Patrol 7)

Palasyo kinumpirma na sinibak ng Pangulong Duterte si Balutan

Kinumpirma ng Malakanyang na sinibak ng Pangulong Rodrigo Duterte si General Manager Alexander Balutan ng PCSO o Philippine Charity Sweepstakes Office.

Ayon kay Presidential Spokesman Salvador Panelo, masyadong seryoso ang mga alegasyon ng katiwalian laban kay balutan kayat sinibak ito ng pangulo.

Sinabi ni Panelo na dapat magsilbing babala ito sa lahat ng opisyal ng pamahalaan na walang matatawag na sacred cow sa administrasyong Duterte.

Kabilang di umano sa mga akusasyon laban kay balutan ang illegal solicitation at pag-sub contract ng mga prangkisa at operasyon ng small town lottery.

Patuloy na mino-monitor ng National Water Resources Board o NWRB ang lebel ng tubig sa Angat dam sa Norzagaray, Bulacan sa gitna ng inaasahang kakulangan ng ulan hanggang Hunyo.

Sa pinaka-huling monitoring ng NWRB,  nasa normal level na 202.3 meters ang lebel ng tubig  sa Angat o malayo pa sa critical level na 180 meters.

Ang naturang dam ang pangunahing pinagkukunan ng tubig ng Metro Manila.

Ayon kay NWRB Executive Director, Dr. Sevillo David Jr, posibleng magpatupad sila ng adjustment sa water allocation sa oras na ideklara na ng PAGASA ang pagsisimula ng tag-init.

Magugunitang nagpatupad ng supply adjustment ang Manila Water sa ilang lugar sa east zone   bunsod ng implementasyon ng kanilang El Niño water supply contingency plan simula noong kahapon.

Lebel ng tubig sa La Mesa dam malapit nang umabot sa critical level

Malapit nang umabot sa kritikal ang lebel ng tubig sa La Mesa dam sa Quezon City.

Kahapon ay naitala ng PAGASA Hydro-Meteorology Division ang 69.35 meters na water level sa La Mesa kumpara sa 69.47 meters noong Martes.

Ito ang dahilan kaya’t magbabawas pa ang Manila Water ng produksyon sa kanilang mga customer sa east zone na kasalukuyang nakararanas ng mahinang pressure hanggang sa walang supply ng tubig simula noong Lunes.

Ayon kay Manila Water Spokesman Jeric Sevilla, posibleng lumala pa ang sitwasyon lalo’t papalapit na ang tagtuyot o dry season dahil sa El Niño phenomenon.

Ang mga maaapektuhang lugar ay ang Marikina, Pasig, Taguig at Quezon cities maging ang mga bayan sa lalawigan ng Rizal.

Pinayuhan naman ng Manila Water ang kanilang mga customer na mag-imbak ng tubig.

—-

Idinepensa ng Malacañang ang paggamit ng wiretapped information sa narco-list na ilalabas nila sa susunod na linggo.

Ayon kay Presidential Spokesman Salvador Panelo, walang batas na nagsasabing illegal ang pagtanggap ng wiretapped information mula sa ibang bansa.

Ang bawat bansa aniya ay nagtutulungan at nagpapalitan ng mga impormasyon para labanan ang terorismo at kriminalidad.

Una nang sinabi ni Panelo na nagmula sa dayuhang bansa ang wiretapped information na ginamit sa pagbuo ng narco-list.

Matatandaan na inamin ng Pangulong Rodrigo Duterte noong September 2017 na pinayagan nya na i-wiretap sina dating Iloilo City Mayor Jed Patrick Mabilog at yumaong Ozamiz Mayor Reynaldo Parojinog Sr. na una na niyang inakusahang sangkot sa illegal drugs operations sa bansa.

Ipinagbabawal ang wiretapping sa ilalim ng Republic Act 4200 o Anti-Wiretapping Law maliban kung may basbas ng korte.

Samantala, blangko ang Philippine Drug Enforcement Agency (PDEA) kung may nagmulang wiretapped information mula sa ibang bansa hinggil sa mga opisyal ng pamahalaan na sangkot sa illegal drugs.

Ayon kay PDEA Director General Aaron Aquino, nadatnan na niya sa PDEA ang intelligence reports hinggil sa mga narco-politicians.

Sinabi ni Aquino na hindi niya alam ang prosesong ginawa para makuha ang mga impormasyon at kung may nakialam na ibang bansa.

Tiniyak ni Aquino na paulit-ulit ang ginawa nilang pag-validate sa mga intelligence reports bago nila ito isapubliko sa susunod na linggo.

Dumistansya rin ang Department of Interior and Local Government (DILG) sa pag-amin ng Malacañang na nagmula sa wiretapped information sa ibang bansa ang ginamit nilang basehan sa ilalabas na bagong narco-list.

Ayon kay DILG Undersecretary Martin Diño, ang PDEA ang nangunang ahensya sa pagbuo ng narco-list.

Tiniyak ni Diño na malaking tulong ang pagpapalabas ng narco-list upang matiyak na mga matitinong halal na opisyal ang mailuklok sa puwesto.

Katunayan, marami aniya sa mga nasama sa inilabas nilang ‘narco-list’ noong barangay elections ang natalo sa eleksyon.

—-

Sinimulan ang dredging operations o paghuhukay sa Manila Bay bilang bahagi ng malawakang rehabilitation project.

Sa pangunguna ng Department of Environment and Natural Resources (DENR), katuwang ang Public Works and Highways, 28 equipment ang idineploy para maghukay.

Sinimulan ang dredging operation sa layong 50 metro mula sa Baywalk Area o mula sa US Embassy hanggang sa Manila Yacht Club.

Nasa 50 personnel naman mula sa DPWH ang nakatutok sa operasyon na pinondohan ng isang bilyong piso.

Inaasahang aabot sa 50 hanggang 100 truck ng basura ang makokolekta kada araw sa nagpapatuloy na dredging operation.

—-

Maglalaan ang gobyerno ng 67 bilyong piso para sa implementasyon ng Expanded Universal Health Care program.

Ang karagdagang pitong bilyong piso ay kukunin sa pamamagitan ng approval ng Kongreso sa increase ng subsidy para sa Philhealth ngayong taon kumpara sa 60 billion pesos noong isang taon.

Kabilang ang subsidiya sa hindi pa inaaprubahang 3.7 trilyong pisong 2019 proposed national budget.

Sa ilalim ng proposed budget, 4% ng 67.3 billion pesos ay ilalaan naman para sa administrative expenses.