HOT STORIES OF THE WEEK

Nilinaw ng Department of Health (DOH) na 33 lamang ang kumpirmadong kaso ng COVID-19 sa bansa.

Sa press conference sinabi ni Health Assistant Secretary Maria Rosario Vergeire na siyam at hindi 11 tulad nang unang napaulat ang nadagdag na kaso mula sa 24 na nai-report noong Lunes ng gabi.

Samantala ipinabatid ni Vergeire na walang nasawi sa mga naitalang bagong kaso ng sakit at stable naman aniya ang kondisyon ng 4th, 5th, 9th at 10th cases sa bansa.

Isa aniya sa mga posibleng dahilan kung bakita sa Metro Manila naitatala ang karamihan sa COVID-19 cases ay dahil nasa National Capital Region (NCR) ang karamihan sa port of entry sa Pilipinas.

Sumampa na sa 35 ang kabuuang bilang ng kaso ng 2019 coronavirus disease (COVID-19) sa Pilipinas.

BREAKING: Kaso ng COVID-19 sa Pilipinas, sumampa na sa 35; ito’y makaraang ianunsyo ng Department of Health ang karagdagan pang 11 na kumpirmadong kaso ng naturang virus https://t.co/HHOy7zaafm pic.twitter.com/TxjBgS3bC4

— DWIZ Newscenter (@dwiz882) March 10, 2020

Ito’y makaraang kumpirmahin ng Department of Health ang 11 karagdagang kaso ng naturang virus ngayong hapon ng Martes, ika-10 ng Marso.

Sa Facebook page ng DOH, makikita ang kanilang anunsyo kaugnay sa latest tally ng mga naturang kaso.

Samantala,magugunita namang nagdeklara na ng state of public health emergency si Pangulong Rodrigo Duterte dahil sa pagtaas ng bilang ng COVID-19 cases sa bansa.

Nasa kritikal na kondisyon ang dalawa sa 24 na kumpirmadong kaso ng 2019 coronavirus disease (COVID-19).

Ayon ito kay Health secretary Francisco Duque III kung saan ang mga nasabing biktima ay isang Pilipino at isang Amerikano.

Ang pasyenteng Pinoy ay 62-taong gulang na una nang na-diagnose na mayroong severe pneumonia at iba pang sakit tulad ng diabetes at hypertension.

Ganito rin umano ang kondisyon ng American national bago pa man nagkaroon ng COVID-19.

Sinabi ni Duque na ang mga nasabing kondisyon ay kapareho rin ng mga critical at serious cases na naobserbahan sa Wuhan at kabuuan ng Hubei Province sa China na siyang sentro ng COVID-19.

Ibinunyag ni Senador Richard Gordon ang tangkang panunuhol sa kanya upang huwag nang paharapin sa hearing ng senate blue ribbon committee ang Pamilya Rodriguez na nasasangkot sa money laundering.

Ayon kay Gordon, chairman ng komite, isang emisaryo ang nag-alok sa kanya ng P5-milyong donasyon para sa Philippine Red Cross (PRC) na kanya ring pinamumunuan.

Sinundan pa anya ito ng alok na P20-milyon.

Sinabi ni Gordon na ang tangkang panunuhol sa kanya ay isang indikasyon na mayroong itinatago ang Pamilya Rodriguez kaya’t natatakot humarap sa pagdinig ng blue ribbon committee.

Nagbabala si Gordon na ipacontempt ang Pamilya Rodriguez sakaling hindi pa sila humarap sa pagdinig ng komite sa Huwebes.

Do you know, that even bribe offers have been sent to me? May nagsasabi P5-million, may nagsasabi P20-million, ‘wag ko lang paharapin ‘yang mga ‘yan,” ani Gordon. —ulat mula kay Cely Ortega-Bueno (Patrol 19)

Umakyat na sa 20 ang bilang ng mga nagpositibo sa coronavirus disease 2019 (COVID-19) sa bansa.

Ito ang kinumpirma ng Department of Health (DOH) matapos na maitala ang 10 bagong kaso ng COVID-19.

Ayon kay Health Assistant Secretary Maria Rosario Vergeire, ang resulta ay batay sa lumbas na test mula sa mga samples na nakolekta mula March 6 hanggang 8.

Kaugnay nito, nagsimula na ang contact tracing sa mga nakahalubilo ng mga nag positibo sa naturang sakit.

Stable ang kalagayan ng mga COVID-19 patient number 7 hanggang 10 at kasalukuyang naka-confined sa iba’t-ibang ospital sa Metro Manila.

Habang umabot na sa 468 ang na – trace ng DOH epidemiology bureau na nakahalubilo ng mga patient 4 hanggang 10.

Nilagdaan na ng Pangulong Rodrigo Duterte ang deklarasyon para sa state of public health emergency.

Ayon kay Presidential Spokesman Salvador Panelo, nakatakda nilang isapubliko ang nilalaman ng executive order mamayang tanghali.

Sinabi ni Panelo na sa ilalim ng state of public health emergency, mas makakakilos ang pamahalaan para tugunan ng maayos ang pangangailangan ng bansa sa harap ng dumaraming kaso ng 2019 coronavirus disease (COVID-19).

Tinukoy ni Panelo ang pagbili ng mga medical equipment tulad ng testing kits na hindi na kailangang dumaan sa bidding.

Una rito, umakyat na sa 10 ang bilang ng kumpirmadong kaso ng COVID-19 sa bansa.

Kinumpirma ng Department of Health (DOH) ang kauna – unahang kaso ng local transmission ng 2019 corona virus disease (COVID-19) sa Pilipinas.

Ayon kay Health Secretary Francisco Duque III, ito aniya ang 62 taong gulang na lalaki na una Greenhills, San Juan.

Dagdag ni Duque, naipasa umano ng COVID-19 victim ang virus sa kaniyang asawa at nagpositibo rin ito matapos isailalim sa masusing pagsusuri sa Research Institute for Tropical Medicine (RITM).

Dahil dito, sinabi ni Duque na nadagdagan pa ang kaso ng mga kumpirmadong apektado ng COVID-19 sa Pilipinas na ngayo’y nasa anim na.

The DOH is currently exhausting all its efforts to identify others who may have come in contact with the confirmed cases to ensure this localize transmission does not progress to community spread. In light of the confirmation of the localize transmission in the country and anticipation of possible sustained community transmission DOH has raised COVID-19 alert system to code red sublevel 1, I repeat code red sublevel 1,” ani Duque.

Kasunod nito, sinabi ni Duque na kasama si Senador Bong Go, inirekumenda na nila kay Pangulong Rodrigo Duterte na magdeklara ng state of public health emergency na posibleng gawin sa Lunes, Marso 9.

At this stage of localize transmission, intensified contact tracing and home quarantine of close contacts of confirmed cases improved hospital preparedness, enhance severe acute respiratory illness surveillance and activation of other laboratories outside of RITM to increase capacity to diagnose are now being implemented. This declaration is a signal to all concerned agencies, local government units and health care providers to be ready to implement plan response measures,” ani Duque.

Nadagdagan pa ang kaso ng 2019 coronavirus disease (COVID-19) sa Pilipinas.

Ito ay makaraang kumpirmahin mismo ng Department of Health (DOH) ang dalawang karagdagang kaso ng COVID-19 sa bansa, dahilan para sumampa na sa lima ang kabuuang kaso ng naturang sakit.

Ayon kay DOH secretary Francisco Duque III, isa sa dalawang naturang kaso ay isang 48-taong gulang na Pinoy at may travel history o nagtungo sa Japan.

Umuwi aniya ito sa bansa noong ika-25 ng Pebrero at nagsimulang makaranas ng lagnat noong ika-3 ng Marso.

Agad naman aniya itong nagpakonsulta sa doktor kung saan kinuhanan ito ng sample para sa pagsusuri.

Ika-5 ng Marso nang makumpirma itong positibo sa COVID-19.

Samantala, isang 62-taong gulang na Pinoy din mula sa San Juan City ang panglimang kaso ng virus.

Ayon kay Duque, wala itong anumang travel history sa ibang bansa ngunit madalas umanong bumisita sa Muslim prayer hall at mayroon ding hypertension at diabetes.

Ika-1 naman ng Marso nang magpakonsulta ito sa doktor at na-admit dahil sa severe pneumonia.

Ika-4 naman nang Marso nang kuhanan ng sample ang naturang pasyente at nakumpirmang positibo sa COVID-19 kinabukasan, ika-5 ng Marso.

Kasalukuyan namang naka-admit ang dalawang nagpositibo sa COVID-19 sa Research Institute for Tropical Medicine (RITM) sa Muntinlupa.

Dagdag pa ng DOH, ang 48-taong gulang na pasyente na isa ring abogado ay nasa stable na kondisyon, habang ang 62-taong gulang na pasyente naman ay nakararanas ng severe pneumonia.

Magugunitang tatlo na ang naunang kaso ng COVID-19 sa Pilipinas at lahat ng mga ito ay mga turista na nanggaling sa China —dalawa sa mga ito ay naka-recover at ang isa ay nasawi.