HOT STORIES OF THE WEEK

Direktang nakipag-ugnayan sa Research Institute for Tropical Medicine (RITM) ang ilang ‘VIPs’ upang humiling na makapagpa-test para sa coronavirus disease 2019 (COVID-19).

Ito ang inamin ni Health Secretary Francisco Duque III sa kabila ng kakulangan ng testing kits para sa COVID-19 sa bansa.

Gayunman, depensa naman ni Duque, pasok ang mga naturang VIP sa guidelines ng Department of Health (DOH) sa kung sinu-sino ang mga kwalipikado upang magpa-test – gaya ng mga indibiduwal na may exposure sa COVID-19 patient at may travel history sa mga bansang nakapagtala na ng local transmission ng virus.

Dagdag pa ni Duque, posibleng magkaroon ng pagbabago sa testing criteria ng ahensya dahil sa karagdagang 100,000 testing kits mula sa China.

Samantala, nasa 34 na opisyal na gobyerno, na walang sintomas ng COVID-19, ang nag-demand umano sa RITM na gawing prayoridad para sa COVID-19 testing pati na ang kanilang pamilya.

Labinganim (16) na panibagong kaso ng COVID-19 ang naitala ngayon ng Department of Health (DOH).

Dahil dito, umakyat na sa 396 ang kaso sa buong bansa.

Nasa 33 naman ang nasawi habang 18 na ang gumaling mula sa sakit.

Inaprubahan na ng house committee of the whole ang panukalang magbibigay sa Pangulong Rodrigo Duterte ng emergency powers sa gitna ng banta ng COVID-19 sa bansa.

Sa pamamagitan ng viva voce voting inaprubahan ng committe of the whole ang House Bill 6616 na naglalayong magdeklara ng national emergency sa gitna nang banta ng COVID-19 at nagpapahintulot sa Pangulo na gamitin ang kapangyarihan nito para sa COVID response sa limitadong panahon at subject sa restrictions ng batas.

Sa kaniyang pagharap sa committee of the whole ng Kamara binigyang diin ni Executive Secretary Salvador Medialdea ang kahalagahan nang pag apruba ng kongreso sa nasabing panukala.

Binibigyan nito aniya ang executive department ng legal authority para maresolba ang krisis dulot ng COVID-19.

Sinabi pa ni Medialdea na mas mapapabilis din ang pagbibigay ng serbisyon sa mga apektado at mapipigilan din ang pagkalat pa lalo ng nakakabahalang sakit.

Ayon pa kay Medialdea mapapadali rin ng nasabing batas ang pagbili ng mga mahahalagang kagamitan na kinakailangan ng health workers.

Bukod kasi sa padadaliin ang procurement process dahil sa krisis binibigyan din ng kapangyarihan ng panukalang ito ang Pangulong Duterte para ire-allocate ang pondo sa ilalim ng 2020 General Appropriations Act para magamit sa COVID-19 response.

Samantala nilinaw naman ni Medialdea na inamiyendahan na nila ang kahilingan nilang payagan ang gobyerno na ang take over sa mga privately owned public utilities na gagawin lamang nila kung kinakailangan.

Pitumpu’t pitong (77) panibagong kaso ng coronavirus disease 2019 (COVID-19) ang naitala ngayon sa bansa.

Ito ang kinumpirma ni Health Undersecretary Maria Rosario Vergeire dahilan para umakyat na ang kaso ng COVID-19 sa bansa sa 307.

Samantala, umabot na sa 19 ang bilang ng nasawi dahil sa virus habang 13 naman ang gumaling mula sa nasabing sakit.

Epektibo kaagad ang enhanced community quarantine sa Luzon.

Ayon kay Presidential Spokesman Salvador Panelo hahayaan naman ng gobyerno na makauwi pa sa kani-kanilang tahanan ang mga manggagawa.

Tiniyak ni Panelo na sapat ang magiging supply ng pagkain sa Luzon at bahala na ang Local Government Units (LGU) sa Metro Manila na pangasiwaan ang delivery ng mga pagkain sa mga tahanan.

Bukas naman aniya ang mga supermarket at palengke gayundin ang ATM bagamat sarado ang mga bangko.

Suspendido rin ang trabaho sa buong Luzon.

Sa ilalim ng enhanced community quarantine mahigpit na ipatutupad ang home quarantine.

Sinabi ni Panelo na walang galawan at walang transportasyon maliban lamang sa frontline health workers, otorisadong government officials, medical o humanitarian reasons gayundin ang transportasyon ng mga pangunahing serbisyon at pangangailangan.

Nakatakdang maglabas ng bagong pahayag ang Pangulong Rodrigo Duterte ngayong araw, ika-16 ng Marso, hinggil sa patuloy na pagdami ng kaso ng coronavirus disease 2019 (COVID-19) sa bansa.

Ito, ayon kay Senador Bong Go, ay dahil makikipagpulong muli ang pangulo sa Inter-Agency Task Force (IATF) on Emergency Infectious Disease at mga opisyal ng Armed Forces of the Philippines (AFP) at Philippine National Police (PNP) hinggil sa naturang sitwasyon.

Noong nakaraang linggo lamang ay nakipagpulong na ang Pangulong Duterte sa IATF at Metro Manila mayors matapos nitong ideklara ang state of public health emergency dahil sa banta ng COVID-19.

Inaprubahan din ng pangulo ang kasalukuyan nang umiiral na community quarantine sa Metro Manila para mapigilan ang pagkalat pa ng virus.

Sa ngayon ay mayroon nang 12 bilang ng mga nasawi dahil sa COVID-19 habang nasa 140 na ang kaso nito sa bansa.

Epektibo nang ipinatutupad ang community quarantine sa Metro Manila upang pigilan ang paglaganap ng 2019 coronavirus disease (COVID-19).

Matatandaang inanunsyo kamakailan ni Pangulong Rodrigo Duterte ang implementasyon ng quarantine sa buong National Capital Region (NCR) na sinimulan kaninang alas-12:01 ng madaling araw.

Itoy matapos na itaas noong Huwebes sa Code Red Sub-Level 2 ang buong bansa dahil sa banta ng COVID-19.

Ngayong nasa ilalim na ng community quarantine ang Metro Manila, mahigpit ng ipagbabawal ang pagbyahe papasok at palabas ng Metro Manila hanggang sa hatinggabi ng April 14, 2020.

Ngunit exempted o hindi naman kabilang sa kautusang ito ang mga cargo supply, mga pasyenteng kailangang dalhin sa NCR, mga government officials at mga nagtatrabaho sa Metro Manila ngunit naninirahan sa mga lalawigan.

Naglabas na ng guidelines ang Malacañang kaugnay sa implementasyon ng community quarantine sa Metro Manila.

Ito’y matapos itaas sa Code Red Sub Level 2 ang alert status ng bansa kaugnay sa 2019 coronavirus disease (COVID-19).

Batay sa ibinabang memorandum order, lahat ng namumuno sa local government units (LGUs), Philippine National Police (PNP), Philippine Coast Guard (PCG) at iba pang government agency ay mahigpit na ipatutupad ang social distancing measures sa Metro Manila sa loob ng 30-araw.

UPDATE: Malacañang, naglabas na ng guidelines kaugnay sa implementasyon ng isang buwang quarantine sa Metro Manila para malabanan ang pagkalat ng COVID-19 | via @jaymarkdagala pic.twitter.com/A0E5g6cKC0

— DWIZ Newscenter (@dwiz882) March 14, 2020

Ipinagbabawal ang mass gatherings gaya ng pagtungo sa mga sinehan, concert, sport events at iba pang entertainment activities.

Kailangan din makipag-ugnayan at sundin ng LGUs ang mga direktiba ng Department of Health (DOH), Department of Interior and Local Government (DILG).

Nakasaad din na layon ng general community quarantine ay limitahan ang physical presence ng mga tao sa labas upang maiwasan ang pagkalat ng COVID-19.

Pumalo na sa anim (6) ang bilang ng mga nasawi dahil sa 2019 coronavirus disease (COVID-19) sa bansa.

Ayon sa Department of Health (DOH), sumakabilang-buhay na ang isang COVID-19 patient mula sa Cagayan De Oro City sa Misamis Oriental.

UPDATE: Bilang ng mga nasawi sa Pilipinas dahil sa COVID-19, nadagdagan pa ng isa, ayon sa DOH; kabuaang COVID-19 death toll sa bansa, 6 na https://t.co/HHOy7zaafm pic.twitter.com/Ifo5f2mTFH

— DWIZ Newscenter (@dwiz882) March 14, 2020

Tinukoy ang pasyente bilang ‘Patient 40′ na nasawi dakong alas-9 kagabi, March 3.

Dagdag pa ng kagawaran, dumanas ito ng acute respiratory distress syndrome bunsod ng severe pneumonia at acute kidney injury.

Magugunitang unang nakaranas ang naturang pasyente ng sintomas ng COVID-19 noong February 24 at na-confine sa Northern Mindanao Medical Center noong March 3.

Isinailalim na sa community quarantine ang buong Metro Manila.

Itoy matapos itaas na sa code red alert sub level 2 ang banta ng coronavirus disease 2019 (COVID-19) sa bansa.

Sa ilalim ng resolusyon ng Inter Agency Task Force (IATF) na binasa Ng Pangulong Rodrigo Duterte, ang mga local government units ay inaatasang magpatupad ng localized quarantine sa kanilang nasasakupan kung kinakailangan.

Kailangan ring magpatupad ng quarantine sa isang barangay sakaling magkaroon ng dalawang kaso ng COVID-19 sa iisang lugar.

Aminado ang Pangulong Duterte na ang community quarantine ay kahalintulad rin ng lockdown.