HOT STORIES OF THE WEEK

Nakatanggap ng tawag mula kay US President Donald Trump si Pangulong Rodrigo Duterte kagabi, Linggo, ika-19 ng Abril.

Ito, ayon kay Senador Bong Go, ay upang pag-usapan ng dalawang pinuno ang bilateral cooperation sa pagitan ng Amerika at Pilipinas hinggil sa paglaban sa coronavirus disease 2019 (COVID-19).

Nagtagal umano ng 18-minuto ang pag-uusap ng dalawa, kagabi.

Samantala, sa ngayon ay ang US na ang may pinakaraming bilang ng kaso ng COVID-19 sa buong mundo habang pumapangalawa naman ang Pilipinas sa COVID-19 cases sa Southeast Asia.

Magugunita rin na sa nakaraang public address ni Pangulong Duterte ay inakusahan nito ang US na isa sa mga nagdudulot ng problema sa bansa dahil sa pang-aakit nito sa mga Pinoy healthcare workers na mag-trabaho sa Amerika dahil umano sa malaking pasahod.

Pinaghahanda ni Pangulong Rodrigo Duterte ang hanay ng militar at pulisya sa posibleng pagpapatupad ng mga ito ng social distancing at curfew sa bansa.

Ito ay bilang bahagi pa rin ng mga hakbang ng pamahalaan upang mapigilan ang paglaganap ng coronavirus disease 2019 (COVID-19) lalo na, ani Pangulong Duterte, ay kung ipagpapatuloy ng publiko ang kawalang-disiplina aniya ng mga ito sa pagsunod sa mga panuntunan ng umiiral na enhanced community quarantine (ECQ).

I’m just asking for your disiplina. Kasi pag ayaw ninyo, ayaw ninyong maniwala, mag-takeover ang military pati pulis. I am ordering them now to be ready. Ang pulis pati military ang mag-enforce sa social distancing at yung curfew. Sila na. Parang martial law na rin. Mamili kayo. Ayaw ko, pero pagka naipit na yung bayan at walang disiplina kayo,” ani Duterte.

Dagdag pa ng pangulo, posibleng ipatupad niya ito sa susunod na linggo.

Samantala, batay sa tala ng Philippine National Police (PNP), nakapagtala na ng nasa 108,088 na mga violators o mga lumabag sa guidelines ng ECQ sa Luzon, sa gitna ito ng patuloy na paglobo ng bilang ng COVID-19 cases sa bansa na sa kasalukuyan at nasa mahigit 5,000 na.

Dalawang malalaking pharmaceutical company ang magsasanib-pwersa para trabahuhin ang coronavirus disease 2019 (COVID-19) vaccine.

Umaasa ang Sanofi at GlaxoSmithKline (GSK) na makapapasa ang kanilang gagawin sa clinical trials ngayong taon upang magamit na ito sa ikalawang bahagi ng 2021.

Target ng dalawang pharma giants na makabuo ng bakuna na mayroong Sanofi-developed antigen na magpo-produce ng antibodies at GSK’s adjuvant technology na isang substance na magbu-boost ng immune system.

Naniniwala ang Sanofi at GSK na sa ganitong klaseng krisis na hinaharap ng buong mundo, mas makabubuti na magtulungan ang mga kumpanya para makabuo ng solusyon laban sa COVID-19.

Umarangkada na ang targeted mass testing ng pamahalaan para sa coronavirus disease 2019 (COVID-19).

Ayon kay Inter Agency Task Force Spokesman at Cabinet Secretary Karlo Nograles, unang isasalang sa mass testing ang mga suspected at probable carrier ng coronavirus lalo na ang mga nailipat na sa quarantine facilities.

Dahil dito patuloy anya nilang pinalalakas ang kapasidad ng bansa para maparami pa ang masuri kung carrier ng virus.

Nakipag-ugnayan na ang DOH sa University of the Philippines (UP) para sa deployment ng 300 medical technologists, molecular biologists, lab technicians at researchers.

Nakapagtapos na rin anya ng online biosafety course ang may 1,400 medical workers upang makatulong sa mass testing.

Sa hanay naman ng mga doktor, kung sakali anyang magkulang na ng health workers, nakahanda ang gobyerno na bigyan ng otorisasyon na mag practice ang mga hindi pa lisensyadong medical graduates.

Ina-adopt ng IATF ang mga patakarang ukol sa pagbigay ng special authorization for limited practice ng ating mga medical graduates, nililinaw lang natin na ang mga special authorization na ito ay ibibigay lang bilang last resort at ito ay epektibo lamang habang tayo ay nasa ilalim ng state of public health emergency,” ani Nograles.

Lubhang mas nakamamatay ang coronavirus disease 2019 (COVID-19) kaysa sa swine flu o tinatawag ding H1N1.

Ito ang ibinabala ng World Health Organization (WHO) kasabay ng panawagan nitong dahan-dahanin lamang ang pagli-lift o pagtatanggal ng mga control measures ng iba’t ibang bansa laban sa COVID-19.

Ayon kay WHO chief Tedros Adhanom Ghebreyesus, mabilis lumaganap ang COVID-19 at sampung beses itong mas nakamamatay kaysa swine flu.

Magugunitang nagdulot din ng pandaigdigang pandemya ang swine flu noong taong 2009.

Posibleng palawigin pa ni Pangulong Rodrigo Duterte ang umiiral nang enhanced community quarantine (ECQ) sa Luzon dahil sa banta ng coronavirus disease 2019 (COVID-19).

Sa public address ng Pangulong Duterte kagabi, ika-6 ng Abril, tinitingnan umano ng gobyerno na pahabain pa ang araw ng pag-iral ng quarantine hanggang sa katapusan ng Abril o ika-30 ng Abril.

We are inclined to extend the lockdown up to April 30. Tingnan natin after that,” ani Duterte.

Aminado rin ang pangulo na hindi sasapat ang P270-bilyong pondo para masustentuhan ang mga residenteng apektado ng COVID-19.

Kasunod nito ay nanawagan si Pangulong Duterte sa pribadong sektor, kabilang na ang mga employers, na may kakayahan na tulungan ang pamahalaan at ang bayan sa kinahaharap na krisis.

Umaasa rin ang pangulo na mayroon nang mangyayaring mabuting pagbabago sa susunod na haharap sya sa publiko.

Kinasuhan na sa Department of Justice (DOJ) si Senador Koko Pimentel dahil sa ‘di umano’y paglabag nito sa mandatory reporting of notifiable diseases act at iba pang regulasyon sa coronavirus disease 2019 (COVID-19) pandemic tulad ng mandatory quarantine.

Ang kaso ay isinampa ni Atty Rico Quicho sa pamamagitan ng electronic mail.

Ginamit na batayan ni Quicho sa isinampa nyang kaso ang 200,000 lagda na nakalap sa change.org na kumukundena sa paglilibot ni Pimentel sa Makati City Medical Center nang dalhin nya sa ospital ang asawang buntis.

Sinabi ni Quicho na malinaw na aminado naman si Pimentel sa kanyang nagawang paglabag sa panuntunan subalit hindi anya ito nakitaan ng pagsisisi.

Nagpahayag ng pag-asa si Quicho na agad aaksyunan ng DOJ ang inihain nyang kaso bilang pagsunod sa batas na walang takot at walang pinapaboran.

Naglaan ng bilyong pisong pondo ang pamahalaan bilang ayuda sa mga pinakamahihirap na komunidad na naapektuhan ang kabuhayan bunsod ng umiiral na enhanced community quarantine (ECQ) kontra coronavirus disease 2019 (COVID-19).

Sa televised address ni Pangulong Rodrigo Duterte, inilarawan nito na ang P200-B ayuda ay ang pinakamalaking social assistance program sa kasaysayan ng bansa sa harap ng malaking epekto ng virus.

Kasunod nito, nanawagan ang Pangulo sa mga nakaluluwag sa buhay na patuloy na magbigay ng tulong sa mga nangangailangan.

Samantala, binantaan naman ng Pangulo ang sino mang mananamantala at mandaraya sa ibibigay na tulong pinansyal, gamit, o pagkain ay sisiguraduhin aniyang makukulong hanggang sa pagtatapos ng umiiral na Luzon-wide enhanced community quarantine.

Sa panulat ni Ace Cruz.

Kumpirmadong kaso ng nagpositibo sa COVID-19, pumalo na sa 552.

Pumalo na sa 552 ang kabuuang bilang ng mga kumpirmadong kaso ng COVID-19 ayon sa Department of Health (DOH).

Sa pulong balitaan, inihayag ni Usec. Maria Rosario Vergeire na nagtala ng 90 panibagong nagpositibo sa COVID-19.

Habang 35 katao na ang namatay bunsod ng virus, at 20 katao naman ang nakarekober dito.

Samantala, ayon kay Vergeire ang pagdami ng mga nagpopositibong kaso ng COVID-19 ay bunsod ng pagtaas ng kakayanan ng bansa na magsagawa ng testing.

Sa panulat ni Ace Cruz.

Pumalo na sa 501 ang kabuuang bilang ng kaso ng coronavirus disease 2019 (COVID-19) sa bansa.

Ito ang kinumpirma ni Health Undersecretary Maria Rosario Vergeire matapos maitala ang 39 na panibagong kaso.

Nananatili naman umano sa 33 ang bilang ng mga nasawi dahil sa sakit.

Nasa 19 naman umano ang bilang ng mga gumaling sa COVID-19.