HOT STORIES OF THE WEEK

Irerekomenda ng Metro Manila Council (MMC) ang pagpapalawig pa ng enhanced community quarantine (ECQ) sa National Capital Region (NCR) pagkatapos ng May 15.

Ayon kay Parañaque City Mayor Edwin Olivares, chairman ng konseho na binubuo ng mga alkalde ng Metro Manila, ibinatay ng mga alkalde ang kanilang rekomendasyon sa payo ng kani-kanilang task force na binubuo ng mga eksperto.

Sinabi ni Olivares na tututulan nila sakaling may mga lugar sa Metro Manila na ilagay na sa general community quarantine (GCQ) at ilang lugar na mananatili sa ECQ.

Mas mahirap anya itong bantayan dahil halos dikit-dikit lamang naman ang mga syudad sa NCR.

Kapag po nag-GCQ ang isang bayan sa NCR at magkakadikit po ‘yan, at nagpa-implement po kami ng hard lockdown sa isang barangay at hindi rin po all over sa munisipyo, ano po ang magiging epekto no’n? Gano’n din po, ‘di po ba? Kailangan talaga i-implement lang po ng ating LGU ‘yung ECQ sa bawat city sa Metro Manila,” ani Olivares.

Tiniyak ni Olivares na kakayanin pa ng mga local government units sa Metro Manila na mabigyan ng ayuda ang kanilang mamamayan kahit pa ma-extend hanggang May 30 ang ECQ.

Tuluy-tuloy po ang pagbibigay ng mga food packs ng ating local government units, pero dito po sa lungsod ng Parañaque, kami po ay nag-usap-usap po ng aming vice mayor at ng ating city council na nag-allocate po kami ng budget, kasi alam naman po natin na hindi po suspisyente ‘yung number na inallocate sa bawat LGU all over the country at lalong-lalo na po sa NCR,” ani Olivarez. —sa panayam ng Ratsada Balita

Ipapatawag ng house committee on legislative franchises ang National Telecommunications Commission (NTC) matapos itong mag isyu ng cease and desist order sa ABS-CBN.

Sinabi ni Committee Chair Franz Alvarez na pagpapaliwanagin nila sa pagdinig na gagawin sa lalong madaling panahon ang mga opisyal ng NTC dahil sa tila panghihimasok sa trabaho ng kongreso.

Magpapalabas din aniya sila ng show cause order laban sa NTC kung bakit hindi kailangang i-cite for contempt dahil sa kanilang naging aksyon.

Masama aniya ang timing ng kautusan ng NTC na nakadagdag pa sa problema ng bansa sa COVID-19.

Inamin ni Alvarez na nagulat ang komite sa naging hakbang ng NTC na una nang nangakong magpapalabas ng provisional authority base sa naging pasya ng Korte Suprema.

Pinatitigil na ng National Telecommunications Commission (NTC) ang ABS-CBN sa lahat ng TV at radio broadcast operations nito.

Ito ayon sa cease and desist order na inisyu ng NTC ay dahil sa pagpaso ng legislative franchise ng kapamilya network.

Binigyan ng NTC ng 10 araw ang ABS-CBN para tumugon kung bakit hindi dapat mabawi ang prangkisa nito.

Magpapatupad naman ng closure order ang NTC regional offices sa nasasakupan nito.

Magtatakda ang NTC ng pagdinig sa kaso sa lalong madaling panahon matapos maalis ang enhanced community quarantine (ECQ).

Itinakda na ng Department of Education (DepEd) sa Agosto 24 ang pagbubukas ng klase para sa school year 2020 – 2021.

Ayon kay Education Secretary Leoner Briones, ito ang napagpasiyahan nilang petsa matapos ang isinagawang konsultasyon sa mga stakeholders tulad ng mga magulang at estudyante.

Gayunman, sinabi ni Briones na hindi ito nangangahilugang kinakailangan ang pisikal na pagpasok sa paaralan ng mga estudyante.

Aniya, maaaring magsagawa ng virtual o online classes lalo na sa mga lugar na maisasailalim pa rin sa mahigpit na community quarantine.

Samantala, sisimulan naman ng mga guro ang paghahanda para sa pagbubukas ng klase sa Hunyo 1 hanggang 30 na siya ring tinukoy bilang enrollment period.

Ibinasura ng Taiwan ang panawagang ipa-deport ang Pinay caregiver na nagpost ng mga pagbatikos laban sa Pangulong Rodrigo Duterte sa social media.

Batay sa report ng Taiwan News Online, binigyang diin ng Ministry of Foreign Affairs ng Taiwan na protektado ng kanilang mga batas ang karapatan ng mga dayuhang manggagawa kabilang ang kanilang kalayaang makapagpahayag.

Wala anilang karapatan ang sinumang tao o institusyon na gipitin o i-pressure ang employer o broker ng foreign worker para sya ay ipa-deport nang walang nangyayaring konsultasyon sa pagitan ng pamahalaan ng Taiwan at pinagmulang bansa ng manggagawa.

Ipinauubaya na ng Philippine Army sa National Bureau of Investigation (NBI) ang pagkakasa ng imbestigasyon ukol sa pagkamatay ni Cpl. Winston Ragos.

Ayon kay Col. Ramon Zagala, tagapagsalita ng Philippine Army, ang naging pasya ng kanilang pinuno na si Lt/Gen. Gilbert Gapay ay para malinawan sa tunay na pangyayari sa pagkamatay ni Ragos.

Binigyang diin ni Zagala na hindi nila nais lumikha ng hidwaan sa Philippine National Police (PNP) na kanilang katuwang sa pagpapanatili ng kapayapaan at kaayusan sa bansa.

Una nang ipinagharap ng kasong homicide ng Quezon City Police District (QCPD) ang mismong tauhan nito na si P/Msgt. Daniel Florendo Jr. na nakabaril at nakapatay kay Ragos.

Muling pinalawig ni Pangulong Rodrigo Duterte ang umiiral na enhanced community quarantine (ECQ) sa Metro Manila, Central Luzon at Calabarzon hanggang Mayo 15 sa harap ng banta ng coronavirus disease 2019 (COVID-19).

Sa televised briefing, inihayag ni Presidential Spokesperson Sec. Harry Roque ang desisyon ng Pangulo, aniya tinanggap nito ang rekomendasyon ng Inter Agency Task Force (IATF) na palawigin pang muli ang ECQ sa mga lugar na may mataas na bilang ng mga nadapuan ng virus.

Sakop ng 15 araw na ECQ extension ay ang mga sumusunod na lugar:

• National Capital Region (NCR)
• Region III (Central Luzon) – Bataan, Bulacan, Nueva Ecija, at Pampanga
• Region IV-A (CALABARZON)
• Oriental Mindoro
• Occidental Mindoro
• Albay
• Catanduanes
• Benguet

Gayundin ang Pangasinan, Tarlac at Zambales pero muling sasailalim sa review at maaring mabago pagsapit ng Abril 30.

Magpapatupad na rin ng ECQ sa iba pang lalawigan sa Visayas at Mindanao hanggang sa Mayo 15. Habang ang Antique, Iloilo, Cebu, Cebu City, Aklan at Capiz ay sasailalim pa sa re-checking.

Samantala, ikinukunsidera ring high-risk ang Davao Del Norte at Davao City kung kaya’t mananatili ang ECQ doon habang ang Davao De Oro ay mananatili pa rin sa ilalim ng ECQ pero muling sasailaim sa re-checking.

Nagsampa ng dalawang diplomatic protest ang Pilipinas laban sa China dahil sa paglabag sa international law at soberanya ng Pilipinas sa West Philippine Sea.

Sa Twitter post ni Foreign Affairs Secretary Teodoro Locsin, Jr. ipinabatid nito na isinampa ang mga protesta sa Chinese embassy at may kaugnayan sa umano’y harassment sa isang barko ng Philippine Navy at pagtatayo nito ng dalawang distrito na sumasakop sa teritoryo ng Pilipinas sa West Philippine Sea.

At 5:17 pm today the Chinese embassy received 2 diplomatic protests: 1. on the pointing of a radar gun at a Philippine Navy ship in PH waters & 2. declaring parts of Philippine territory as part of Hainan province—both violations of international law & Philippine sovereignty.

— Teddy Locsin Jr. (@teddyboylocsin) April 22, 2020

Ang dalawang bagong distrito, isa sa Paracels at isa sa Spratlys, kung saan ilang lugar ang kini-claim ng Pilipinas, ay nasa ilalim ng otoridad ng local government ng Sansha –isang lungsod sa southern island ng Hainan.

Dedesisyunan ni Pangulong Rodrigo Duterte kung dapat pa bang ipagpatuloy, luwagan o dapat na itigil na ang umiiral na Luzon-wide community quarantine sa darating na Huwebes, ika-23 ng Abril.

Ito, ayon kay dating Special Assistant to the President at ngayo’y Senador Christopher “Bong” Go, ay upang magkaroon ng sapat na oras ang publiko na makapaghanda anuman ang ipatutupad na mga pagbabago.

Ani Go, na kabilang sa mga dumalo sa pagpupulong ni Pangulong Duterte kasama ang mga health experts, masusi pang pinag-aaralan ng Pangulo ang mga impormasyon na nagmula sa mga dating kalihim ng Department of Health (DOH) at infestious disease experts.

Nagpahiwatig naman si Go na maaaring isang ‘modified’ o pagkakaroon ng kaluwagan sa umiiral na quarantine ang ipatutupad.

Isa aniya sa mga ikinokonsidera ng Inter-Agency Task Force (IATF) ay ang pagluwag ng quarantine measures sa mga lugar na mababa o walang kaso ng coronavirus disease 2019 (COVID-19), habang posible namang paigtingin pa ito sa Metro Manila kung saan naroon ang maraming kaso ng virus.

Dagdag ni Go, pupulungin muli ng Pangulong Duterte ang ilang miyembro ng IATF para makapagdesisyon ito.

Samantala, nakatakdang matapos ang pinalawig na enhanced community quaratine (ECQ) sa Luzon sa katapusan ng buwan ng Abril.

Nilinaw ng Joint Task Force COVID-19 na wala pang ipinag-uutos ang Pangulong Rodrigo Duterte ng martial law type law enforcement sa enhanced community quarantine.

Gayunman, ayon kay Lt. General Guillermo Eleazar, hepe ng Joint Task Force, handa ang puwersa ng PNP at maging ng AFP na ipatupad ito sakaling ipag-utos ng Pangulo.

Sinabi ni Eleazar na mas mahigpit lang ang pagpapatupad nila sa mga panuntunan ng ECQ dahil sa dami ng mga paglabag na nangyari pagkatapos ng holy week.

Ito naman masasabi natin na just strictly enforcing the guidelines, hindi naman ‘to martial law pero sinasabi nga ng ating Pangulo sa kanyang frustration na kung hindi pa rin susunod ang ating mga kababayan, may makikita na iilan-ilan na may nagsasabong, ginagamit yung mga financial assistance na nakuha nila, sabi niya dapat dyan lalo pang tindihan ng PNP at AFP itong gagawin nilang pagpapatupad na parang ala martial law,” — mula sa panayam ng Ratsada Balita.